ជាតិ
សង្រ្កាន្តស្វាយរៀង បន្តរៀបចំកម្មវិធី«តំបន់ត្រជាក់ចិត្ត»នៅរាល់ចុងសប្តាហ៍ នាខែមេសានេះ រូបភាពពី រដ្ឋបាលខេត្តស្វាយរៀង
×
ភ្នំពេញ៖ ក្រុមការងារសង្រា្កន្តស្វាយរៀង ក្រោមកិច្ចសហការជាមួយអង្គភាពរដ្ឋាករទឹកខេត្តស្វាយរៀង នឹងបន្តកម្មវិធី «តំបន់ត្រជាក់ចិត្ត» នៅរាល់ចុងសប្តាហ៍នៃខែមេសា ឆ្នាំ២០២៣។ ការបន្តព្រឹត្តិការណ៍នេះ ដើម្បីបង្កភាពរីករាយដល់ពលរដ្ឋក្នុងខេត្ត និងទាក់ទាញទេសចរកាន់តែច្រើនកុះករ។
«តំបន់ត្រជាក់ចិត្ត» នៃកម្មវិធីសង្រា្កន្តស្វាយរៀង ប្រារព្ធឡើងនៅទីតាំងនៅរង្វង់មូលវិមានឯករាជ្យខេត្តស្វាយរៀង។ ព្រឹត្តិការណ៍នេះ នឹងធ្វើឱ្យប្រជាពលរដ្ឋក្នុងខេត្តស្វាយរៀង មានភាពសប្បាយរីករាយ និងចូលរួមថែរក្សាវប្បធម៌ ប្រពៃណីជាតិខ្មែរផងដែរ។
បើតាមហ្វេសប៊ុកផេក សង្រ្កាន្តស្វាយរៀង ការបន្តកម្មវិធី «តំបន់ត្រជាក់ចិត្ត»នេះ ធ្វើឡើងតាមអនុសាសន៍របស់លោក ម៉ែន វិបុល អភិបាលខេត្តស្វាយរៀង។ កម្មវិធី«តំបន់ត្រជាក់ចិត្ត» នឹងប្រព្រឹត្តទៅរាល់ចុងសប្តាហ៍ ចាប់ពីថ្ងៃទី២២-២៣ និងថ្ងៃទី២៩-៣០ ខែមេសា ឆ្នាំ២០២៣។
តាមរយៈការរៀបចំព្រឹត្តិការណ៍សង្រ្កាន្តស្វាយរៀងនៅថ្ងៃទី១៤-១៦ មេសា កន្លងទៅ ខេត្តស្វាយរៀង ទទួលបានទេសចរជាង ៧៦ម៉ឺននាក់ មានការកើនឡើងបើធៀបនឹងឆ្នាំ២០២២ ទទួលបានទេសចរជាង ៣ម៉ឺននាក់តែប៉ុណ្ណោះ។ លើសពីនេះ សម្រាប់បញ្ហា សុវត្ថិភាព សន្តិសុខវិញ មានការរក្សាសណ្ដាប់ធ្នាប់ និងបរិស្ថានជុំវិញបរិវេណបានល្អផងដែរ នាអំឡុងពេលចូលឆ្នាំខ្មែរ៕
Tag:
សង្រ្កាន្តខេត្តស្វាយរៀង
© រក្សាសិទ្ធិដោយ thmeythmey.com