ការប្រើប្រាស់ពូជស្រូវដែលរក្សាទុកច្រើនដង ធ្វើឲ្យផលិតកម្មធ្លាក់ចុះ និងងាយក្នុងការកើតជំងឺថែមទៀត។ ទន្ទឹមនឹងនេះគ្រាប់ពូជស្រូវផលិតតាមប្រព័ន្ធ ប.គ.ព ត្រូវបានផលិតឡើងក្រោមការត្រួតពិនិត្យ និងគ្រប់គ្រងគុណភាពដោយអគ្គនាយកដ្ឋានកសិកម្ម និងមន្ទីរកសិកម្មខេត្ត រុក្ខាប្រមាញ់ និងនេសាទ។ លើសពីនេះ គ្រាប់ពូជស្រូវផលិតតាមប្រព័ន្ធ ប.គ.ព មានអត្រាកើតជំងឺ នឹងពូជលាយក្នុងគ្រាប់ពូជតិចតួចបំផុត ខុសពីគ្រាប់ពូជដែលកសិកររក្សាទុកផ្ទាល់ខ្លួន។
 

លោក ងិន​ ឆាយ ជាអគ្គនាយក នៃអគ្គនាយកដ្ឋានកសិកម្មបានបញ្ជាក់ថា កសិករគឺមិនទាន់ប្រើប្រាស់ គ្រាប់ពូជសុទ្ធ ដែលមានគុណភាពល្អនៅឡើយ។ ជាមួយគ្នានេះ ក្រសួងកំពុងធ្វើការជាមួយគម្រោង «ការជំរុញផលិតកម្ម និងការប្រើប្រាស់គ្រាប់ពូជស្រូវ» ដែលឧបត្ថម្ភដោយ JICA។
 

គ្រាប់ពូជស្រូវផលិតតាមប្រព័ន្ធ ប.គ.ព ដូចជាពូជស្រូវផ្ការំដួល និងពូជស្រូវសែនក្រអូប គឺមិនមាននៅសម្រាម ផ្កាឈើ និងកម្ទេចកម្ទីអ្វីទេ។ លើសពីនេះពេលចេញពន្លកឡើងគឺចេញពន្លកបានស្មើរ និងយកធ្វើអង្ករទុកហូបមានលក្ខណៈងាយស្រួល មិនមាននៅចុង ឬកម្ទេចកម្ទី និងមានគុណភាពល្អ។
 

លោក ងិន​ ឆាយ ក៏អំពាវនាវ ដល់ប្រជាកសិករទាំងអស់ ឲ្យចូលរួមក្នុងការផលិត និងប្រើប្រាស់គ្រាប់ពូជស្រូវដែលមានគុណភាពល្អ ដើម្បីបង្កើនទិន្នផល និងគុណភាពស្រូវអង្ករ នឹងរក្សាបាននៅតម្លៃនៅលើទីផ្សារ៕