ជាតិ
ក្រសួងទេសចរណ៍ រំពឹងទទួលបានភ្ញៀវទេសចរជប៉ុនជាង ៧ម៉ឺននាក់ ក្នុងឆ្នាំ២០២៣ រូបភាពពី ក្រសួងទេសចរណ៍
×
ដោយ៖ សែម ប្រាក់ដាវ
ភ្នំពេញ៖ កម្ពុជានឹងទទួលបានភ្ញៀវទេសចរជប៉ុនជាង ៧ម៉ឺននាក់ក្នុងឆ្នាំ២០២៣នេះ ក្រោយស្ថានភាពវិស័យទេសចរណ៍កម្ពុជា មានសភាពល្អប្រសើរឡើងវិញ។ កម្ពុជាជំរុញការផ្សព្វផ្សាយសក្តានុពលទេសចរណ៍កម្ពុជានៅលើទីផ្សារជប៉ុន ក្នុងពិព័រណ៍កម្ពុជា Cambodia Festival 2023 នៅទីក្រុងតូក្យូ ប្រទេសជប៉ុន ។
ក្រសួងទេសចរណ៍ តាមរយៈឯកអគ្គរាជទូតកម្ពុជាប្រចាំប្រទេសជប៉ុន បានរៀបចំពិព័រណ៍កម្ពុជា (Cambodia Festival2023) ដើម្បីអនុវត្តយុទ្ធសាស្ត្រនៃចក្ខុវិស័យស្តីពីផែនការស្តារ និងលើកស្ទួយវិស័យទេសចរណ៍កម្ពុជាឡើងវិញ។ ជាពិសេសផ្សព្វផ្សាយសក្កានុពលទេសចរណ៍កម្ពុជា លើទីផ្សារជប៉ុន ក៏ដូចជាការពង្រឹងចំណងមិត្តភាពកម្ពុជា-ជប៉ុនផងដែរ។
កម្មវិធីតាំងពិព័រណ៍កម្ពុជា ជាផ្នែកមួយនៃប្រព័ន្ធផ្សព្វផ្សាយដ៏មានសក្តានុពល ដែលបង្ហាញឱ្យឃើញនូវភាពច្នៃប្រឌិតខ្ពស់ឥតឈប់ឈរ និងការបង្កើនទំនាក់ទំនង ចែករំលែកបទពិសោធចំណេះដឹងថ្មីៗដល់គ្នាទៅវិញទៅមករវាងដៃគូសហការ។ កម្មវិធីពិព័រណ៍កម្ពុជាឆ្នាំ២០២៣នេះ មានការតាំងបង្ហាញផលិតផល ម្ហូបអាហារខ្មែរ និងការបង្ហាញសិល្បៈ វប្បធម៌ និងមានការរៀបចំស្ដង់ចំនួន ១០០ផងដែរ។
ក្នុងរយៈពេល២ខែដើមឆ្នាំ២០២៣ កម្ពុជាទទួលបានទេសចរជប៉ុនមានជាង១ម៉ឺននាក់ កើនឡើងជាង១០០០ ភាគរយ។ កាលពីឆ្នាំ២០២២កន្លងទៅនេះ កម្ពុជាទទួលបានទេសចរអន្តរជាតិប្រមាណ ២,២៨លាននាក់ កើនឡើង១០៥៩ភាគរយ និងទេសចរបរទេសផ្ទៃក្នុង ចំនួន ១,៨៨លាននាក់ ។ ក្នុងនោះទេសចរជប៉ុនជិត ៣ម៉ឺននាក់ មានការកើនឡើង ១ ៣៧៨ភាគរយ បើធៀបនឹងរយៈពេលដូចគ្នាកាលពីឆ្នាំទៅ៕
Tag:
ក្រសួងទេសចរណ៍
ទេសចរជប៉ុន
© រក្សាសិទ្ធិដោយ thmeythmey.com