ក្រៅពីនេះ លោក ប្រាជ្ញ ច័ន្ទ ថែមទាំងដាស់តឿនគ្រប់គណបក្ស មិនឲ្យគំរាមកំហែង បំផិតបំភ័យ ឬលួងលោមអ្នកណាម្នាក់ ដើម្បីឲ្យគេបោះឆ្នោតជូនខ្លួន។ ចំណុចសំខាន់១ទៀត ដែលលោកបានប្រាប់ឲ្យគ្រប់គណបក្សចៀសវាងដែរនោះ គឺការញុះញង់ឲ្យមានការរើសអើងណាមួយក្នុងអំឡុងឃោសនារកសំឡេងឆ្នោត និងក្នុងថ្ងៃបោះឆ្នោត។ 
 

បន្ថែមពីនេះ ប្រធាន គ.ជ.ប អំពាវនាវឲ្យគ្រប់គណបក្សគោរពតាមក្រមសីលធម៌ នីតិវិធី បទប្បញ្ញត្តិ និងច្បាប់ដែលពាក់ព័ន្ធនឹងការបោះឆ្នោត។ មិនត្រឹមតែគណបក្សនយោបាយនោះទេ សូម្បីអង្គការជាតិនិងអន្តរជាតិ ក៏លោកក្រើនរម្លឹកដែរ ដោយលោកប្រាប់ឲ្យអង្គការជាតិ-អន្តរជាតិ ប្រកាន់យកគោលការណ៍អព្យាក្រឹត្យ។ 
 

ការឃោសនារកសំឡេងឆ្នោតសម្រាប់ការបោះឆ្នោតជាតិលើកទី៧ មានរយៈពេល២១ថ្ងៃ គឺចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣។ រំលង១ថ្ងៃ នឹងដល់ថ្ងៃបោះឆ្នោត គឺនៅថ្ងៃទី២៣ ខែកក្កដា៕