ប្រធានាធិបតីកូរ៉េខាងត្បូង លោក យូន សុកយ៉ល និងនាយករដ្ឋមន្រ្តីឥណ្ឌា លោក នារិន្ទ្រា ម៉ូឌី នៅថ្ងៃទី២០ ខែឧសភា បានជួបគ្នានៅក្រៅកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង ៧ (G7) ដើម្បីពិភាក្សាពីកិច្ចសហប្រតិបត្តិការទ្វេភាគី ពាណិជ្ជកម្ម ក៏ដូចជាវិស័យការពារជាដើម។ 

 

«មេដឹកនាំទាំងពីរ បានឯកភាពពង្រឹងកិច្ចសហប្រតិបត្តិការមិនត្រឹមតែអាវុធប៉ុណ្ណោះទេ ប៉ុន្តែនៅក្នុងវិស័យបច្ចេកវិទ្យាចុងក្រោយដូចជាឌីជីថល សុខាភិបាល និងអវកាសជាដើម»។ អ្នកនាំពាក្យប្រធានាធិបតីកូរ៉េខាងត្បូង លោក Lee Do-woon បានបញ្ជាក់បែបនេះ នៅថ្ងៃទី២០ ខែឧសភា។ 

 

បន្ថែមពីនេះ មេដឹកនាំកូរ៉េខាងត្បូង បានអំពាវនាវឱ្យប្រទេសទាំងពីរទទួលខុសត្រូវរួមគ្នាលើបញ្ហាតំបន់ និងពិភពលោក ដោយផ្អែកលើការសាមគ្គីភាពគ្នាក្នុងនាមជាប្រទេសប្រជាធិបតេយ្យ។ 

 

មិនតែប៉ុណ្ណោះ មេដឹកនាំទាំងពីរ បានយល់ព្រមពង្រីកកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្មផង ដោយផ្អែកលើកិច្ចព្រមព្រៀង ដែលមានកន្លងមក។ 

 

ជំនួបមេដឹកនាំប្រទេសទាំងពីរ ធ្វើឡើងស្របពេលឥណ្ឌា និងកូរ៉េខាងត្បូង មានទំនាក់ទំនងការទូតទ្វេភាគីរយៈពេល ៥០ឆ្នាំ នៅក្នុងឆ្នាំ២០២៣៕