អន្តរជាតិ
ជនជាតិអូស្ត្រាលីពីរនាក់ដែលប្រឈមមុខប្រហារជីវិតនៅវៀតណាម ទទួលការលើកលែងទោស
× នាយករដ្ឋមន្ត្រីអូស្ត្រាលី អាន់តូនី អាល់បានីស លើកឡើងថា ជនជាតិអូស្ត្រាលីពីរនាក់ដែលត្រូវបានកាត់ទោសប្រហារជីវិតនៅវៀតណាម បានទទួលការលើកលែងទោស ស្របពេលទំនាក់ទំនងការទូតប្រទេសទាំងពីរបានប្រសើរឡើងបន្ថែមទៀត។
ក្រោយបានធ្វើដំណើរទស្សនកិច្ចផ្លូវការទៅកាន់វៀតណាម នាយករដ្ឋមន្ត្រីអូស្ត្រាលីលោក អាន់តូនី អាល់បានីស ប្រាប់ទូរទស្សន៍ ABC ពីការស្នើសុំការលើកលែងទោសប្រហារជីវិតដល់ជនជាតិអូស្ត្រាលីទៅរដ្ឋាភិបាលវៀតណាម។
«អូស្ត្រាលីមានជំហររឹងមាំប្រឆាំងនឹងការកាត់ទោសប្រហារជីវិត ហើយយើងធ្វើតំណាងក្នុងនាមពលរដ្ឋអូស្ត្រាលី។ យើងរីករាយណាស់ដែលវៀតណាមបានយល់ព្រមតាមសំណើនេះ។ យើងសូមអរគុណពួកគេសម្រាប់ការសម្រេចចិត្តមួយនេះ»។ លោក អាល់បានីស បានសង្កត់ធ្ងន់បែបនេះ ហើយបញ្ជាក់ថា លោកមិនអាចបញ្ចេញឈ្មោះនៃបុគ្គលដែលទាំងពីរនោះទេ ខណៈដែលក្រុមគ្រួសារបានស្នើសុំរក្សាឯកជនភាព។
ក្រុមគ្រួសារបុគ្គលទាំងពីរនោះក៏បានថ្លែងអំណរគុណចំពោះមន្ត្រីក្រសួងការបរទេស និងក្រសួងពាណិជ្ជកម្មអូស្ត្រាលីដែលបានធ្វើការក្នុងរយៈពេលមួយនេះ។
អូស្ត្រាលីក៏បានធ្វើតំណាងស្នើសុំការលើកលែងទោសឱ្យឈ្មោះ Chau Van Kham វ័យ៧៣ឆ្នាំ ជាបុរសជនជាតិវៀតណាម-អូស្ត្រាលីដែលត្រូវបានកាត់ទោសក្នុងឆ្នាំ២០១៩ ឱ្យជាប់គុក១២ឆ្នាំដោយ តុលាការវៀតណាមពីបទភេរវកម្ម។ យ៉ាងណាមិញ លោក អាល់បានីស បញ្ជាក់ថា នេះជាករណីផ្សេងគ្នា ប៉ុន្តែអូស្ដ្រាលីនឹងបន្តធ្វើការលើបញ្ហាទាំងនេះ ហើយសង្ឃឹមសម្រាប់លទ្ធផលវិជ្ជមាន។
លោក អាល់បានីស បានធ្វើដំណើរទៅកាន់វៀតណាមកាលពីចុងសប្តាហ៍មុន ហើយបានជួបនាយករដ្ឋមន្ត្រីវៀតណាម Pham Minh Chinh ។ លោកនិយាយថា ដំណើរទស្សនកិច្ចនេះបានផ្តល់កម្លាំងរុញច្រានសម្រាប់លទ្ធផលល្អដូចខាងលើ។
ប្រទេសទាំងពីរក៏បានយល់ព្រមក្នុងការបង្កើនទំនាក់ទំនងក្នុងវិស័យពាណិជ្ជកម្ម ទេសចរណ៍ ការវិនិយោគ ថាមពល និងការអប់រំ។ ក្នុងដំណើរនោះ មេដឹកនាំះអូស្ដ្រាលីក៏បានប្រកាសថវិកាចំនួន១០៥លានដុល្លារដើម្បីជួយវៀតណាមក្នុងការទទួលយកថាមពលស្អាតផងដែរ៕
© រក្សាសិទ្ធិដោយ thmeythmey.com