បើតាមសេចក្តីសម្រេចរបស់សម្តេច ហ៊ុន សែន ចុះហត្ថលេខា នៅថ្ងៃទី៧មិថុនា ការបង្កើតគណៈកម្មការអន្តរក្រសួង ដែលមានលោក ស៊ុន ចាន់ថុលជាប្រធាន គឺដើម្បីដឹកនាំការពិនិត្យ និងផ្តល់យោបល់អំពីនីតិវិធី ក្របខណ្ឌគតិយុត្ត និងវាយតម្លៃប្រសិទ្ធភាពសេដ្ឋកិច្ច រួមទាំងការស្នើទម្រង់នៃការវិនិយោគលើគម្រោងផ្លូវនាវាចរណ៍«ព្រែកជីកហ្វូណនតេជោ» ដែលតភា្ជប់ពីព្រែកតាកែវនៃដៃទន្លេមេគង្គ ទៅសមុទ្រកែប។ 

 

លើសពីនេះ​ គណៈកម្មការអន្តរក្រសួងត្រូវជំរុញដំណើរការអនុវត្តគម្រោងវិនិយោគឱ្យបានច្បាស់លាស់ ​និងស៊ីជម្រៅលើគ្រប់ទិដ្ឋភាព។ ជាពិសេស គឺស្វែងរកដៃគូវិនិយោគ ដើម្បីអនុវត្តគម្រោងផ្លូវនាវាចរណ៍ «ព្រែកជីកហ្វូណនតេជោ» ឱ្យមានគុណភាព និងប្រសិទ្ធភាព ព្រមទាំងពិនិត្យ វាយតម្លៃ និងចរចាលើកិច្ចព្រមព្រៀងវិនិយោគលើគម្រោងនេះ។ 

 

គណៈកម្មការអន្តរជាតិ ត្រូវជំរុញយ៉ាងណាឱ្យដំណើរការអនុវត្តគម្រោងផ្លូវនាវាចរណ៍«ព្រែកជីកហ្វូណនតេជោ» បានសម្រេចជាស្ថាពរ ដើម្បីរួមចំណែកពន្លឿនការអភិវឌ្ឍវិស័យដឹកជញ្ជូនតាមផ្លូវទឹក និងផ្លូវសមុទ្ររបស់កម្ពុជាឱ្យកាន់តែមានប្រសិទ្ធភាព ធ្វើឱ្យថ្លៃដឹកជញ្ជូនចុះទាប និងធានាចីរភាពនៃកំណើនសេដ្ឋកិច្ចជាតិ។

សូមជម្រាបថា គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់(គម្រោងព្រែកជីកហ្វូណនតេជោ)  ត្រូវបានរដ្ឋាភិបាលអនុម័ត​នៅព្រឹកថ្ងៃទី១៩ឧសភា ឆ្នាំ២០២៣​។ គម្រោងដឹកជញ្ជូនទំនិញ  និងអ្នកទេសចរតាមផ្លូវទឹករបស់កម្ពុជាដែលមានលក្ខណៈតភ្ជាប់ប្រព័ន្ធទន្លេ និងផ្លូវសមុទ្រ នេះ គឺត្រូវការទុនវិនិយោគប្រមាណ១ ៧០០លានដុល្លារអាម៉េរិក និងប្រើការសាងសង់ក្នុងរយៈពេល៤ឆ្នាំ។​
 

 
ការរៀបចំគម្រោងផ្លូវនាវាចរណ៍នេះឡើង គឺដើម្បីពង្រីកវិសាលភាពនៃការប្រើប្រាស់សក្ដានុពលលើការដឹកជញ្ជូនតាមផ្លូវទឹក។ ការអនុវត្តគម្រោងនេះ គឺសំដៅលើការចូលរួមលើកកម្ពស់សកម្មភាពសេដ្ឋកិច្ច-សង្គម ឱ្យកាន់តែមានការរីកចម្រើនឈានទៅមួយកម្រិតថែមទៀត និងផ្ដល់ជាដំណោះស្រាយសមស្របលើបញ្ហាប្រឈម និងឧបសគ្គនានានៃវិស័យដឹកជញ្ជូនតាមផ្លូវទឹក  ដែលយើងបាននិងកំពុងតែជួបប្រទះនាពេលបច្ចុប្បន្ន៕