ជាតិ
សេដ្ឋកិច្ច
កិច្ចប្រជុំរវាងមន្ដ្រីគយនិងរដ្ឋាករកម្ពុជា និងមន្ត្រីរដ្ឋបាលគយចិន កាលថ្ងៃទី១០ ខែមិថុនា ។ រូបថត៖ អគ្គនាយកដ្ឋានគយនិងរដ្ឋាករ
×![]()
រដ្ឋបាលគយកម្ពុជា និងចិន សម្រេចរួមគ្នាធ្វើទំនើបកម្មដើម្បីក្លាយជារដ្ឋបាលគយ វៃឆ្លាត (Smart Customs) តាមរយៈការប្រើប្រាស់បច្ចេកវិទ្យាព័ត៌មាន និងជំរុញការរៀបចំសេចក្តីព្រាងអនុស្សរណៈយោគយល់គ្នាលើការងារតភ្ជាប់ប្រព័ន្ធបញ្ជរតែមួយជាតិរវាងរដ្ឋបាលគយទាំងពីរ។ ការសម្រេចនេះ គឺធ្វើឡើងក្នុងកិច្ចប្រជុំរវាងលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ជាមួយលោកWang Lingjun អនុរដ្ឋមន្រ្តីនៃរដ្ឋបាលគយចិន។
ប្រទេសចិនជាដៃគូពាណិជ្ជកម្មនិងវិនិយោគយ៉ាងសំខាន់របស់កម្ពុជា ហើយតាមរយៈនេះរដ្ឋបាលគយនៃប្រទេសទាំងពីរ ត្រូវសហការគ្នាឱ្យបានសកម្ម។ នេះជាការលើកឡើងរបស់លោក គុណ ញឹម ដោយបាននិយាយថា ជាពិសេសគឺការអនុវត្តរួមគ្នាឱ្យរលូន និងមានប្រសិទ្ធភាព នៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន(CC-FTA)និងកិច្ចព្រមព្រៀងភាពជាដៃសេដ្ឋកិច្ចគ្រប់ជ្រុងជ្រោយតំបន់ (RCEP) ខណៈ កម្ពុជា បានធ្វើទម្រង់និងទំនើបកម្មរដ្ឋបាលគយកម្ពុជា ជាបន្តបន្ទាប់។
បើតាមការចុះផ្សាយរបស់អគ្គនាយកដ្ឋានគយនិងរដ្ឋាកម្ពុជា កិច្ចប្រជុំជាមួយថ្នាក់ដឹនាំរដ្ឋបាលគយប្រទេសចិនកាលពីថ្ងៃទី១០មិថុនា កន្លងមក ភាគីទាំងពីរបានឯកភាពក្នុងការធ្វើទំនើបកម្មរដ្ឋបាលគយជារដ្ឋបាលវៃឆ្លាត (Smart Customs) តាមរយៈការប្រើប្រាស់ បច្ចេកវិទ្យាព័ត៌មានដើម្បីពង្រឹងកិច្ចសម្រួលពាណិជ្ជកម្ម និងការគ្រប់គ្រងតាមព្រំដែន។ លើសពីនេះ ភាគីទាំងពីរ នឹងជំរុញការរៀបចំសេចក្តីព្រាងអនុស្សារណៈយោគយល់គ្នាលើការងារតភ្ជាប់ប្រព័ន្ធបញ្ជរតែមួយជាតិ(National Single Window)។
រដ្ឋបាលគយកម្ពុជានិងចិន នឹងបង្កើនកិច្ចសហការគ្នា ដើម្បីទប់ស្កាត់ និងបង្ក្រាបអំពើរត់គេចពន្ធ និងបទល្មើសឆ្លងដែននានា។ ដូចជា៖ ការរត់ពន្ធគ្រឿងញៀន ទំនិញហាមឃាត់ និងការជួញដូរសត្វព្រៃជិតផុតពូជជាដើម (CITES) ដោយត្រូវបង្កើតចំណុចទំនាក់ទំនង ដើម្បីផ្លាស់ប្តូរព័ត៌មានឲ្យបានទាន់ពេលវេលា។ ជាមួយគ្នានេះ ភាគីទាំងពីរក៏បន្តជំរុញការផ្លាស់ប្តូរព័ត៌មានតាមប្រព័ន្ធអេឡិចត្រូនិចនៃវិញ្ញាបនបត្របញ្ជាក់ដើមកំណើតទំនិញ (E-Certificate of Origin) ដើម្បីពន្លឿនការបំពេញបែបបទគយ និងពិភាក្សាអំពីការអនុវត្តរួមគ្នានូវកម្មវិធីប្រតិបត្តិករសេដ្ឋកិច្ចទទួលបានការអនុញ្ញាត (AEO) ដើម្បីបង្កើនកិច្ចសម្រួលពាណិជ្ជកម្ម ផងដែរ។
ដើម្បីការអនុវត្តទាំងនេះបានប្រសិទ្ធភាពកាន់តែប្រសើរ លោក គយ ញឹម បានស្នើរដ្ឋបាលគយចិនឱ្យផ្ដល់ជំនួយបច្ចេកទេសក្នុងការកសាងសមត្ថភាព ដើម្បីបន្តអនុវត្តយុទ្ធសាស្ត្រកែទម្រង់ និងទំនើបកម្មរដ្ឋបាលគយកម្ពុជា។ លោកWang Lingjun ដែលអនុរដ្ឋមន្រ្តីនៃរដ្ឋបាលគយចិន បានគាំទ្រនូវសំណើនេះ និងប្រាប់ដល់គយកម្ពុជាឱ្យលើកឡើងនូវតម្រូវការជាក់លាក់ តាមរយៈនាយកដ្ឋានសហប្រតិបត្តិការគយអន្តរជាតិនៃរដ្ឋបាលគយទាំងពីរ។
សូមជម្រាបថា ត្រីមាសទី១ឆ្នាំ២០២៣ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលចូលជាតិបានជាង៥៦៤លានដុល្លារ។ ចំណូល នេះថយចុះជាង៥,២ភាគរយ បើធៀបនឹងរយៈពេលដូចគ្នា លើឆ្នាំ២០២២៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
