ជាតិ
មន្ទីរពទ្យកុមារអង្គរបំពាក់ម៉ាស៊ីនស៊ីធីស្កេន សម្រួលដល់ការព្យាបាលកុមារកាន់តែប្រសើរ ម៉ាស៊ីនស៊ីធីស្កេនដែលបំពាក់នៅក្នុងមន្ទីរពេទ្យកុមារអង្គរ។ រូបភាព៖ មន្ទីរពេទ្យកុមារអង្គរ
×
ហឿន សុភ័ក្រ្ត
សៀមរាប៖ មន្ទីរពេទ្យកុមារអង្គរ បានប្រកាសពីការរៀបចំបំពាក់ម៉ាស៊ីនស៊ីធីស្កេន ដែលម៉ាស៊ីននេះ នឹងជួយព្យាបាលជំងឺកុមារជាច្រើនដែលកំពុងមានតម្រូវការប្រចាំថ្ងៃ។
មន្ទីរពេទ្យកុមារអង្គរ បានរៀបរាប់លើហ្វេសប៊ុកផ្លូវការខ្លួន នៅថ្ងៃទី១៣ មិថុនា ថា ម៉ាស៊ីនស៊ីធីស្កេន ជាបច្ចេកវិទ្យាទំនើប ដែលអាចធ្វើការពិនិត្យរាងកាយផ្តល់រូបភាពបានយ៉ាងលម្អិត និងអាចជួយសម្រួលដល់ការធ្វើរោគវិនិច្ឆ័យអ្នកជំងឺ ឱ្យកាន់តែប្រសើរជាងមុន ដូចជាការធ្វើរោគវិនិច្ឆ័យជំងឺមហារីក រលាកផ្លូវដង្ហើម និងការរងរបួសធ្ងន់ធ្ងរផ្សងៗ។
«ហេតុអ្វីម៉ាស៊ីនស៊ីធីស្កេននេះ មានសារៈសំខាន់សម្រាប់មន្ទីរពេទ្យកុមារអង្គរ? មុនពេលមានម៉ាស៊ីននេះ អ្នកជំងឺមន្ទីរពេទ្យកុមារអង្គរ ដែលត្រូវការម៉ាស៊ីនស៊ីធីស្កេន ត្រូវធ្វើដំណើរទៅក្រៅមន្ទីរពេទ្យ ជាមួយនឹងក្រុមគ្រូពេទ្យ ដើម្បីទទួលសេវាស្កេនម៉ាស៊ីនស៊ីធីស្កេន។ កត្តានេះ អាចបណ្តាលឱ្យមានហានិភ័យខ្ពស់ដល់អ្នកជំងឺ មានតម្លៃថ្លៃ ព្រមទាំងចំណាយពេលវេលារបស់គ្រូពេទ្យ ត្រូវព្យាបាលដល់អ្នកជំងឺផ្សេងទៀត»។ នេះជាការបញ្ជាក់ពីមន្ទីរពេទ្យ។
លោកវេជ្ជបណ្ឌិត ងួន ច័ន្ទភក្រ្តា ប្រធានមន្ទីរពេទ្យកុមារអង្គរ បានផ្ដល់បទសម្ភាសឱ្យសារព័ត៌មានថ្មីៗតាមទូរស័ព្ទថា ម៉ាស៊ីនស៊ីធីស្កេនខាងលើនេះ បានបញ្ជាទិញពីក្រៅប្រទេសតាមរយៈក្រុមហ៊ុនឯកជនមួយ នាំចូលសម្ភារៈបរិក្ខារពេទ្យ ដែលបានដេញថ្លៃឈ្នះ ដើម្បីទិញចូលមកឱ្យមន្ទីរពេទ្យ។ ម៉ាស៊ីនស៊ីធីស្កេននេះមានតម្លៃ ៣៥ម៉ឺនដុល្លារ ជាតម្លៃជាកញ្ចប់រួមទាំងបច្ចេកទេសតម្លើង ការថែទាំ និងការជួសជុល ដែលជាថវិកាបានមកពីសប្បុរសជនជួយឧបត្ថម្ភដល់មន្ទីរពេទ្យ»។
លោក ភក្រ្ដាបន្ថែមថា «ចំពោះម៉ាស៊ីនស៊ីធីស្កេនហ្នឹងយើងបានសប្បុរសជនមួយរូបដែលគាត់តែងតែផ្ដល់និងជួយមន្ទីរពេទ្យកុមារអង្គរ អញ្ចឹងគាត់ក៏ជួយថវិកាដើម្បីឲ្យយើងអាចទិញម៉ាស៊ីនធីស្កេន ដើម្បីដំណើរការជួយសង្គ្រោះក្មេង»។
លោកវេជ្ជបណ្ឌិតបានបន្ថែមទៀតថា ដើម្បីដំណើរការបានគេត្រូវការទាំងអ្នកបច្ចេកទេសដើម្បីដំណើរការម៉ាស៊ីនស៊ីធីស្កេន ដូចជាស្កេនអ្នកជំងឺ ហើយទីពីរត្រូវការអ្នកជំនាញផ្នែករូបភាព (Radiologist) ដើម្បីថតមើលថាតើមានបញ្ហាអ្វីដើម្បីជារោគវិនិច្ឆ័យ អញ្ចឹងយើងបានបញ្ជូនគ្រូពេទ្យជំនាញចំនួនពីររូបទៅហ្វឹកហាត់ពង្រឹងជំនាញបន្ថែមនៅមន្ទីរពេទ្យកុមារជាតិរយៈពេលមួយខែ មុននឹងដាក់អោយដំណើរការកាលពីខែមីនា ឆ្នាំ២០២៣។
សម្រាប់លោក ងួន ច័ន្ទភក្រ្តាម៉ាស៊ីនស៊ីធីស្កេនគឺសំខាន់ណាស់ដើម្បីរករោគ វិនិច្ឆ័យឱ្យបានច្បាស់លាស់នូវជំងឺធ្ងន់ៗ ដូចជា ជំងឺមហារីក បាក់ឆ្អឹង ការប៉ះទង្គិច ជំងឺរលាកប្រព័ន្ធប្រសៃប្រាសាទធ្ងន់ធ្ងរ ឬក៏បញ្ហាជំងឺរាំរៃ ដើម្បីជួយព្យាបាលជំងឺកុមារឱ្យបានទាន់ពេលវេលា។
ម៉ាស៊ីននេះជួយឱ្យអ្នកជំងឺ និងទាំងគ្រូពេទ្យចំណេញទាំងពេលវាលា និងថវិកាព្រោះកន្លងមកមន្ទីរពេទ្យត្រូវការម៉ាស៊ីនស៊ីធីស្កេនច្រើន និងត្រូវរកសេវាខាងក្រៅដើម្បីពិនិត្យ និងព្យាបាលជំងឺ៕
© រក្សាសិទ្ធិដោយ thmeythmey.com