ប៉ុន្មានខែចុងក្រោយនេះ អត្រា​អតិផរណារបស់​​ឡាវ បើទោះបី​ជា​បាន​ថយបន្តិច​ ប៉ុន្តែ​នៅ​តែ​ស្ថិតនៅកម្រិតខ្ពស់។ ចរន្តនេះបូកជាមួយនឹងប្រាក់ខែគោលទាប បានធ្វើឱ្យពលកររបស់ប្រទេសនេះមានទំនោរទៅក្រៅប្រទេសដើម្បីស្វែងរកការងារធ្វើ ជាពិសេសកម្មករវ័យក្មេង និងកម្មករជំនាញ។

 

យោងតាមស្ថិតិរបស់ក្រសួងការងារ និងសុខុមាលភាពសង្គមឡាវ បច្ចុប្បន្នមានប្រជាជនអាយុធ្វើការប្រហែល ២,៥លាននាក់។ តួលេខនេះមានទំហំស្មើនឹង ៣៤ភាគរយនៃចំនួនប្រជាជនសរុប។ 

 

វិបត្តិសេដ្ឋកិច្ច និងអតិផរណានៅតែមានកម្រិតខ្ពស់ បណ្តាលឱ្យកម្មករជាង ៦១ពាន់នាក់អត់ការងារធ្វើ ឬ មិនអាចស្វែងរកការងារសមរម្យបានដោយសារប្រាក់ឈ្នួលអប្បបរមាមិនអាចឆ្លើយតបនឹងកម្រិតជីវភាពរបស់កម្មករនាពេលបច្ចុប្បន្ន។

 

ជាងនេះទៅទៀត ពលករឡាវមួយផ្នែកមានទំនោរទៅក្រៅប្រទេសដើម្បីស្វែងរកការងារធ្វើ ជាពិសេសកម្មករវ័យក្មេង និងជំនាញខ្ពស់ ដែលធ្វើឲ្យប្រទេសនេះប្រឈមនឹងហានិភ័យនៃ ការខ្វះកម្លាំងពលកម្ម។

 

ដើម្បីរក្សា  និងជំនះភាពអត់ការងារធ្វើរបស់កម្មករ រដ្ឋាភិបាលឡាវកំពុងដោះស្រាយបញ្ហាលំបាកនានា ដូចជាការធ្វើបច្ចុប្បន្នភាពព័ត៌មានស្តីពីតម្រូវការពលកម្មតាមជំនាញ ដើម្បីបង្កើតការងារថ្មីសម្រាប់កម្មករដែលគ្មានការងារធ្វើ ការបណ្តុះបណ្តាលជំនាញសម្រាប់និយោជិត ក៏ដូចជាការបង្កើនប្រាក់ឈ្នួលអប្បបរមាជាដើម។ នេះបើតាមលោកស្រី Anousone Khamsingsavath ប្រធាននាយកដ្ឋានការងារនៃក្រសួងការងារ និងសុខុមាលភាពសង្គមឡាវ។ 

 

លោកស្រី Anousone Khamsingsavath បានបន្តថា កង្វះកម្លាំងពលកម្ម មិនត្រឹមតែប៉ះពាល់យ៉ាងធ្ងន់ធ្ងរដល់ស្ថានភាពសេដ្ឋកិច្ចសង្គមប៉ុណ្ណោះទេ ថែមទាំងធ្វើឲ្យផលិតកម្មត្រូវជាប់គាំងផងដែរ។ ហើយរដ្ឋាភិបាលឡាវ នឹងវិនិយោគលើអភិវឌ្ឍន៍ស្មើៗគ្នានៅទូទាំងប្រទេស ដើម្បីបែងចែកធនធានមនុស្ស ហើយទន្ទឹមនឹងនោះបង្កើតការងារថ្មី ដើម្បីរក្សាកម្លាំងពលកម្ម និងកែលម្អអត្រាអត់ការងារធ្វើនៅក្នុងប្រទេស។

 

គួរបញ្ជាក់ថា ក្នុងអំឡុងពេលពីខែមេសា ឆ្នាំ២០២២ ដល់ខែឧសភា ឆ្នាំ២០២៣ ឡាវបានបង្កើតការងារថ្មីជាង ១៥ពាន់កន្លែង និងបានកែលម្អកម្មរជំនាញបានជាង ១៧០០កន្លែង៕