ភ្នំពេញ៖ ប្រធានសហព័ន្ធសេវាអប់រំនៅកម្ពុជា លោក គង់ សំនៀង មើលឃើញថា វីដេអូមួយចំនួនដែលបង្ហោះនៅលើបណ្តាញសង្គម មិនមានខ្លឹមសារអប់រំ ដូចជាចំណងជើងនោះឡើយ ផ្ទុយទៅវិញ វាជាការនាំឱ្យសីលធម៌ វប្បធម៌ ប្រពៃណីកាន់តែអាប់ឱន។ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ លោក ម៉ៃ វឌ្ឍនា ក៏យល់ឃើញដូចគ្នាផងដែរ ដោយលោកសង្កត់ធ្ងន់ថា ការផលិតវីដេអូដោយគ្មានវីជ្ជាជីវៈ ហើយជ្រកក្រោមពាក្យអប់រំនេះ ជារូបភាពបំផ្លាញវប្បធម៌ជាតិ។
«ជាការបោកប្រាស់អ្នកទស្សនាសុទ្ធសាធ ហើយបានប៉ះពាល់ដល់ប្រពៃណីទំនៀមទម្លាប់ខ្មែរ»។ នេះជាការយល់ឃើញរបស់លោក គង់ សំនៀង ចំពោះវីដេអូដែលបានប្រើចំណងជើងក្នុងន័យអប់រំ ប៉ុន្តែខ្លឹមសារ និងសកម្មភាពក្នុងសាច់រឿង សុទ្ធតែប្រាស់ចាក និងពោរពេញដោយរូបភាពអាសអាភាស។
លោក ម៉ៃ វឌ្ឍនា សមាជិកក្រុមប្រឹក្សាភិបាល នៃសាមាគមអ្នកនិពន្ធខ្មែរ រូបភាពរបស់សារព័ត៌មានថ្មីៗ
បើតាមប្រធានសហព័ន្ធសេវាអប់រំនៅកម្ពុជារូបនេះ ការផលិតវីដេអូខ្លីៗរបស់មនុស្សមួយចំនួននាពេលបច្ចុប្បន្ននេះ គឺជារូបភាពនៃការរកស៊ីផ្ទាល់ខ្លួនប៉ុណ្ណោះ ហើយវាត្រូវបានបង្ហោះនៅតាមបណ្តាញសង្គមយ៉ាងអាណាធិបតេយ្យ។
លោកបានគូសបញ្ជាក់ថា៖ « ពិតណាស់ ទោះបីទាំងអស់ហ្នឹង ជាការរកចំណូលរបស់ពួកគាត់ក៏ដោយ តែត្រូវបង្ហាញពីខ្លឹមសារអប់រំឱ្យបានច្រើន ព្រោះថារបស់ល្អវានឹងឋិតថេរបានវែងឆ្ងាយ តែរបស់មិនល្អវាបានតែមួយឆាវទេ ហើយទោះបីជាវាមិនដួលដោយឯកឯង ក៏ច្បាប់មិនទុកឱ្យនៅយូរដែរ»។
លោក គង់ សំនៀង ស្នើឲ្យអ្នកផលិតមាតិកាវីដេអូនៅលើបណ្តាញសង្គម រៀនសូត្រតាមវីដេអូល្អៗ ជាពិសេសការរៀបចំឈុតឆាកសម្តែងដែលត្រូវគិតគូរជាចាំបាច់ចំពោះប្រយោជន៍សង្គម។ ហើយលោកក៏បានស្នើឱ្យក្រសួងពាក់ព័ន្ធទាំងអស់សហការគ្នាចូលរួមផ្តល់ជាគំនិតយោបល់ និងគ្រប់គ្រងលើការផលិតវីដេអូ ផងដែរ។
លោក គង់ សំនៀង ប្រធានសហព័ន្ធសេវាអប់រំ នៅកម្ពុជា រូបភាព៖ ផ្តល់ជូនដោយ លោក គង់ សំនៀង ផ្ទាល់តែម្តង
អ្នកជំនាញអប់រំរូបនេះ បានមើលឃើញពីការខិតខំប្រឹងប្រែងរបស់ក្រសួងវប្បធម៌លើវិធានការផ្សេងៗ ប្រឆាំងអ្នកផលិតវីដេអូអសីលធម៌ ដោយតម្រូវឱ្យសុំទោស និងលុបវីដេអូចេញ ប៉ុន្តែលោកក៏ចង់ឃើញមានចំណាត់ការតាមផ្លូវច្បាប់មួយចំនួនផងដែរ។
ដូចគ្នាផងដែរ លោក ម៉ៃ វឌ្ឍនា សមាជិកក្រុមប្រឹក្សាភិបាលសមាគមអ្នកនិពន្ធខ្មែរ វាយតម្លៃថា អ្នកផលិតវីដេអូជាច្រើននាពេលបច្ចុប្បន្នេះ មិនមានវិជ្ជាជីវៈត្រឹមត្រូវឡើយ ដោយគ្រាន់តែផលិតទាក់ទាញការចូលទស្សនា និងទាញយកចំណូលដល់ខ្លួនប៉ុណ្ណោះ។
លោកបានលើកឡើងថា៖ «សេរីភាពក្នុងការផលិតបែបហ្នឹង ហាក់ដូចជាមិនបានផ្តល់ប្រយោជន៍អ្វី សម្រាប់ប្រទេសជាតិឡើយ តែបែរជាផ្តល់នូវភាពអសោច និងនាំឱ្យក្មេងជំនាន់ក្រោយខូចអនាគតទាំងមិនដឹងខ្លួន។ល។»។
សមាជិកក្រុមប្រឹក្សាភិបាលសមាគមអ្នកនិពន្ធខ្មែររូបនេះ បានកត់សម្គាល់ថា ការផលិតវីដេអូមិនត្រឹមត្រូវ ហើយបង្ហោះលើបណ្តាញសង្គម ផ្តល់គំរូអាក្រក់ដល់ក្មេង។ «យើងឃើញថា ក្មេងឥឡូវធំមុនអាយុហើយ ដែលមិនទាន់ដឹងអីប៉ុន្មានផង តែចេះបែបបទរឿងលើគ្រែទៅហើយ នេះក៏ដោយសារអ្នកជំនាន់មុនខ្លះបន្សល់ទុករឿងអាក្រក់ឱ្យហ្នឹង»។ កវី ជនបទ លោក ម៉ៃ វឌ្ឍនា គូសបញ្ជាក់បែបនេះ។
លោកបានបន្ថែមថា យុវជនដែលកំពុងមានឥទ្ធិពលក្នុងការផលិតវីដេអូ គួរបន្ថែមខ្លឹមសារអប់រំឱ្យច្រើនបំផុត ហើយជៀសវាងការគិតតែពីផលប្រយោជន៍ សម្រាប់ខ្លួនឯង ជាងប្រយោជន៍សង្គម និងគួររៀនសូត្រពីវិជ្ជាជីវៈជាមុនសិន។
មលោក ម៉ៃ វឌ្ឍនា បានជូនជាយោបល់បន្ថែមថា យុវជនដែលផលិតវីដេអូមិនសមរម្យ ទាំងខ្លឹមសារ កាយវិការ និងពាក្យសំដី គួរលុបវីដេអូទាំងនោះចេញពីទំព័របណ្តាញសង្គមរបស់ខ្លួន ដោយមិនត្រូវបន្សល់ទុក ឬសាបព្រោះទង្វើមិនល្អដល់សង្គមជាតិ នាសម័យឌីជីថលនោះឡើយ៕