សម្តេចរដ្ឋមន្រ្តីមហាផ្ទៃ មានប្រសាសន៍ក្នុងលក្ខណៈដាក់ខ្លួនដូច្នេះថា៖«គាត់ ចង់ធ្វើពិធីធំពេក ហើយខ្ញុំ សូមអង្វរគាត់ថា បើយកមកប្រគល់ឲ្យ [ខ្ញុំ] មានមន្រ្តីរាជការចូលរួម១០០នាក់ ២០០នាក់ បាន តែបើធ្វើពិធីធំពេក សូមទោស ពីព្រោះអត់បានរៀន។ ការពិតហើយ បណ្ឌិតកិត្តិយស មិនចាំបាច់រៀនទេ តែក៏មិនបានឆ្លុះបញ្ចាំងពីស្នាដៃដែរ ដល់អ៊ីចឹងទៅ ខ្ញុំ មិនហ៊ានទទួល ក៏សូមទោសគាត់វិញទៅ ព្រោះទទួលក៏ប៉ុណ្ណឹង មិនទទួលក៏ប៉ុណ្ណឹង»។ 
 

កាលពីថ្ងៃទី១៥ ខែមិថុនា ឆ្នាំ២០២៣ សាកលវិទ្យាល័យជាតិជាស៊ីមកំចាយមារ បានរៀបចំពិធីប្រគល់សញ្ញាប័ត្របណ្ឌិតកិត្តិយសផ្នែកអភិវឌ្ឍន៍ជនបទ ជូនសម្តេច ស ខេង ក្នុងវ័យ៧២ឆ្នាំ ហើយអ្នកដែលប្រគល់សញ្ញាប័ត្រនេះជូនសម្តេច គឺលោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។
 

លោក ហង់ជួន ណារ៉ុន ថ្លែងថា សម្តេច ស ខេង ពិតជាឥស្សរជនដ៏ស័ក្តិសមក្នុងការទទួលបានសញ្ញាប័ត្រកម្រិតបណ្ឌិត។ រដ្ឋមន្រ្តីអប់រំ បន្តថា ការប្រគល់សញ្ញាប័ត្រកិត្តិយស ជូនសម្តេច គឺជាការដឹងគុណរបស់សម្តេច ក្នុងការអភិវឌ្ឍជនបទ និងក្នុងវិស័យសិក្សាធិការ។

 

សម្តេច ស ខេង ប្រកាសថា ដរាបណានៅមានកម្លាំង និងធនធាន សម្តេច នៅតែបន្តគាំទ្រដល់វិស័យអប់រំ ដើម្បីជំរុញុការអភិវឌ្ឍថែមទៀត។

 

សូមបញ្ជាក់ថា សាកលវិទ្យាល័យជាតិជាស៊ីមកំចាយមារ ត្រូវបានបង្កើតឡើយដោយរដ្ឋាភិបាលកម្ពុជា ក្រោមគំនិតផ្តួចផ្តើមរបស់សម្តេច ស ខេង ជាមួយសម្តេច ជា ស៊ីម៕