«ត្រឹមមានចំណេះដឹងតែម្យ៉ាង​ មិនគ្រប់គ្រាន់នោះ​ តែធនធានមនុស្សចាំបាច់ត្រូវមានវិជ្ជាសម្បទា​ បំណិនសម្បទា​ និងចរិយាសម្បទា​ ទើបអាចក្លាយជាពលរដ្ឋល្អ​»។ លោក ហង់ ជួន ណារ៉ុន ថ្លែងបែបនេះ នៅក្នុងពិធីបិទការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ប្រចាំឆ្នាំ ២០២៣ ​ដែលមានសិស្សចូលរួមប្រឡងចំនួន៤៨០នាក់។

 

 

តាមរយៈការប្រកាសលទ្ធផលសិស្សពូកែនេះ រដ្ឋមន្ត្រីអប់រំ មើលឃើញថា កម្ពុជា នឹងសម្បូរធនធានមនុស្សនាពេលអនាគត។លោក ហង់ជួន ណារ៉ុន បានបន្ថែមថា​៖  «ក្មួយៗជាសិស្សពូកែ និងជាជ័យលាភីនៅថ្ងៃនេះ នឹងក្លាយជាធនធានបញ្ញាវន្ត សម្រាប់ពេលអនាគតរបស់កម្ពុជា ស្របពេលដែលប្រទេសយើងកំពុងត្រូវការនូវមូលធនមនុស្សជាចាំបាច់ ដើម្បីអភិវឌ្ឍន៍ប្រទេស ឱ្យកាន់តែរីកចម្រើន ។ ជាពិសេសស្របតាមការរីកចម្រើននៃបច្ចេកវិទ្យា​ បដិវត្តឧស្សាហកម្មជំនាន់ទី៤​ និងសេដ្ឋកិច្ចឌីជីថល ដែលកំពុងផ្តោតលើបញ្ញាសិប្បនិមិត្ត និងការប្រើប្រាស់មនុស្សយន្ត»។

 

រដ្ឋមន្ត្រីអប់រំ ក៏បានកោតសរសើរ និងជំរុញឱ្យលោកគ្រូ​ អ្នកគ្រូ​ អ្នកអាណាព្យាបាល អាជ្ញាធរពាក់ព័ន្ធ និងមន្ទីរអប់រំ រួមគ្នាកសាងធនធានមនុស្សនៅកម្ពុជាថែមទៀត៕