ជាតិ
ដាំកូនឈើ១០០០ដើមនៅសហគមន៍កំពង់ភ្លុក អបអរទិវាបុណ្យបរិស្ថានជាតិ និងអន្ដរជាតិ
×
ថោង ប្រណី
សៀមរាប៖ សហគមន៍កំពង់ភ្លុក និងអាជ្ញាធរបានរៀបចំកម្មវិធីដាំកូនឈើចំនួន១០០០ដើម ដើម្បីបំផុសចលនាថែរក្សាបរិស្ថាន ក៏ដូចជាអបអរសាទរទិវាបរិស្ថានជាតិ និងទិវាបរិស្ថានអន្ដរជាតិ។
កូនឈើសរុប១០០០ដើម ត្រូវបានដាំនៅមាត់បឹងទន្លេសាប នាថ្ងៃទី១៨ មិថុនា ស្របពេលដែល សហគមន៍រៀបចំព្រឹត្តិការណ៍ទេសចរណ៍បរិស្ថាន។
លោក ឃឹម ហ្វីណង់ អភិបាលរងខេត្តសៀមរាបបានលើកឡើងថា ការដាំកូនឈើនេះ គឺដើម្បីចូលរួមអបអរសាទរទិវាបរិស្ថានជាតិ និងទិវាបរិស្ថានអន្តរជាតិ ជាពិសេសគឺជាមិត្តរូបដ៏សំខាន់និងចាំបាច់បំផុតសម្រាប់អ្នកកំពង់ភ្លុក គឺការរៀបចំឡើងវិញឱ្យមានជាព្រឹត្តិការណ៍ផ្សេងៗ ដើម្បីទាញចំណាប់អារម្មណ៍ពីប្រជាពលរដ្ឋនៅក្នុងឃុំកំពង់ភ្លុក។ ព្រឹត្តិការណ៍ទាំងនោះមានបំណងបំផុសឱ្យពលរដ្ឋចូលរួមថែរក្សានិងអភិរក្សបរិស្ថានឲ្យរឹតតែល្អប្រសើរ ហើយធ្វើយ៉ាងណាឲ្យតំបន់ទេសចរណ៍មួយនេះកាន់តែមានភាពស្អាត មានអនាម័យ និងបន្ថែមនូវសោភ័ណភាពពណ៌បៃតងតាមរយៈការដាំដើមឈើ។
ចំពោះលោក ស៊ា សុផល ដែលជាប្រធានអង្គការមូលនិធិទំពាំងស្នងឬស្សី និងជាអ្នកចូលរួមផ្តួចផ្តើមរៀបចំឱ្យមានព្រឹត្តិការណ៍ទេសចរណ៍បរិស្ថាននេះឡើង មានយោបល់ថា ការដាំកូនឈើនេះគឺជាសកម្មភាពមួយក្នុងចំណោមសកម្មភាពជាច្រើននៅក្នុងព្រឹត្តិការណ៍ទេសចរណ៍បរិស្ថាន និងបុណ្យសមុទ្រទឹកសាបកម្ពុជាជាលើកដំបូងគេបង្អស់ គឺជានិមិត្តរូបតំណាងឲ្យចំនួនគ្រួសារទាំង១០០០គ្រួសារស្ថិតក្នុងឃុំកំពង់ភ្លុក់តែម្ដង។ ការដាំកូនឈើនេះ ក៏ដើម្បីអបអរសាទរដល់ទិវាបរិស្ថានជាតិនិងបរិស្ថានពិភពលោក ៥មិថុនា ក្រោមប្រធានបទ ស្តារឡើងវិញនូវប្រព័ន្ធអេកូឡូស៊ី និងប្រព័ន្ធជីវៈចំរុះបឹងទន្លេសាប។
ដោយឡែកលោក សុខ ប្លង់ មេឃុំកំពង់ភ្លុកវិញ បានលើកឡើងថា ការដាំកូនឈើក្នុងឱកាសនេះ គឺពិតជាបានរួមចំណែកធ្វើឱ្យឃុំកំពង់ភ្លុកពោរពេញទៅដោយធម្មជាតិពណ៌បៃតង និងអាចធ្វើឱ្យកំណើនទេសចរនៅទីនេះមានការកើនឡើងទៀតផង និងដើម្បីជួយជំរុញឱ្យជីវភាពប្រជាជនកាន់តែប្រសើរឡើង៕
© រក្សាសិទ្ធិដោយ thmeythmey.com