អន្តរជាតិ
លោកម៉ាក្រុង៖ បារាំងនឹងចាយលុយរាប់រយលានដុល្លារបង្កើតយន្តហោះដែលបញ្ចេញឧស្ម័នតិច
× ប្រធានាធិបតីបារាំង ម៉ានុយអ៊ែល ម៉ាក្រុង ប្រកាសថា បារាំងនឹងជះប្រាក់រាប់រយលានដុល្លារក្នុងការអភិវឌ្ឍយន្តហោះដែលបញ្ចេញឧស្ម័នបំពុលតិចក្នុងរយៈពេលប៉ុន្មានឆ្នាំខាងមុខនេះ។
ក្នុងទស្សនកិច្ចទៅក្រុមហ៊ុនផលិតម៉ាស៊ីនយន្តហោះ Safran នៅខាងក្រៅរដ្ឋធានីប៉ារីស លោក អេម៉ានុយអែល ម៉ាក្រុង លើកឡើងថា រដ្ឋាភិបាលរបស់លោកនឹងចាយប្រាក់៣០០លានអឺរ៉ូ ឬ៣៣០លានដុល្លារអាម៉េរិកសម្រាប់ការស្រាវជ្រាវយន្តហោះ និងម៉ាស៊ីនរបស់វា។ សាច់ប្រាក់បានពីប្រភពសាធារណៈ និងឯកជន ក៏នឹងត្រូវប្រើជាមធ្យោបាយដល់ការអភិវឌ្ឍយន្តហោះខ្នាតតូច ឬថាមពលអ៊ីដ្រូសែន និងឥន្ធនៈកកើតឡើងវិញ រួមទាំងរោងចក្រជីវឥន្ធនៈផងដែរ។
«យើងជនជាតិបារាំងត្រូវតែជាជើងឯកនៃយន្តហោះមិនបំភាយឧស្ម័នខ្លាំងបំផុត ហើយវាស្ថិតនៅក្នុងសមត្ថភាពរបស់យើងក្នុងការធ្វើវា»។ លោក ម៉ាក្រុង សង្កត់ធ្ងន់បែបនេះ។
អាកាសចរណ៍ ជាវិស័យសំខាន់នៃសេដ្ឋកិច្ចបារាំងដែលមានក្រុមហ៊ុនឈានមុខគេរួមមានក្រុមហ៊ុន Safran, Airbus និង Dassault ។ បើយោងតាមអាជ្ញាធរស្ថិតិជាតិ Insee ឧស្សាហកម្ម នេះផ្ដល់ឱកាសការងាររហូតដល់៦៩១,០០០នាក់ក្នុងឆ្នាំ២០២០ ដែលស្មើ៧ភាគរយនៃកម្លាំងពលកម្មឧស្សាហកម្មរបស់បារាំងសរុបជាមួយនឹងប្រាក់ចំណូលប្រចាំឆ្នាំដល់ទៅ១៨៦ពាន់លានអឺរ៉ូ ឬ២០៣ពាន់លានដុល្លារឯណោះ។
ស្របពេលសកម្មភាពក្នុងវិស័យនេះហោះហើរកំពុងចាប់ផ្តើមងើបឡើងវិញបន្ទាប់ពីការធ្លាក់ចុះអំឡុងជំងឺកូវីដ-១៩ ឧស្សាហកម្មបារាំង និងអឺរ៉ុបប្រឈមមុខនឹងការប្រកួតប្រជែងដ៏ខ្លាំងក្លាពីអាម៉េរិក និងចិន ពិសេសការប្រជែងគ្នាផ្ដល់ជម្រើសដែលមិនប៉ះពាល់ដល់បរិស្ថាន ខណៈដែលការបំភាយឧស្ម័នផ្ទះកញ្ចក់ជាសកលក្នុងការដឹកជញ្ជូនតាមផ្លូវអាកាសមានរហូតដល់ទៅ៤ភាគរយ៕
© រក្សាសិទ្ធិដោយ thmeythmey.com