ការប្រកួតប្រជែងពានរង្វាន់កីឡាអេឡិចត្រូនិកអាស៊ីអាគ្នេយ៍ Mobile Legends Bang Bang Southeast Asia Cup 2023 លើកទី៥ បានបញ្ចប់ហើយនៅថ្ងៃទី១៨ ខែមិថុនា។ ក្រោយការប្រកួតប្រជែងគ្នារយៈពេល៦ថ្ងៃក្នុងចំណោមក្រុមចូលរួមទាំង១២ គេបានរកឃើញក្រុមជើងឯកហើយគឺ ONIC Esports មកពីឥណ្ឌូណេស៊ី និងជាការឈ្នះលើកទី២របស់ពួកគេផង។ Blacklist International របស់ហ្វីលីពីនទទួលបានត្រឹមរងជើងឯកព្រឹត្តិការណ៍ MSC 2023។
 

ក្រុមកម្ពុជា Burn X Flash ដែលឆ្លងចូលវគ្គពាក់កណ្តាលផ្តាច់ព្រ័ត្រជាលើកដំបូង ទទួលបានចំណាត់ថ្នាក់ទី៤ ក្រោយប្រកួតដណ្តើមយកលេខ៣ចាញ់ក្រុម Echo របស់ហ្វីលីពីនដោយលទ្ធផល ៣-២។
 

ព្រឹត្តិការណ៍ MSC 2023 ដែលរៀបចំលើកដំបូងនៅកម្ពុជា បានត្រៀមប្រាក់៣០ម៉ឺនដុល្លារ ដើម្បីផ្តល់រង្វាន់ដល់គ្រប់ក្រុមចូលរួមទាំង១២ ក្នុងនោះក្រុមជើងឯក ONIC Esports ទទួលបានប្រាក់រង្វាន់១៤ម៉ឺនដុល្លារ ក្រុមរងជើងឯក Blacklist International បាន៦ម៉ឺនដុល្លារ ក្នុងលេខ៣ Echo បាន៣ម៉ឺនដុល្លារ និងក្រុមលេខ៤ Burn X Flash បាន១៥០០០ដុល្លារ។
 

៤ក្រុមដែលធ្លាក់វគ្គ៨ក្រុមចុងក្រោយរួមមាន RSG Slate SG, Fire Flux Impunity, TODAK និង EVOS Legends ទទួលបានប្រាក់រង្វាន់ក្នុងមួយក្រុម៩០០០ដុល្លារ។ ឯ៤ក្រុមធ្លាក់ក្នុងវគ្គជម្រុះរួមមាន Team EVO, Outplay, Team Occupy និង Fenix Esports ទទួលបានប្រាក់លើកទឹកចិត្ត៤ពាន់ដុល្លារក្នុងមួយក្រុម៕