កាលពីថ្ងៃទី១៧ ខែមិថុនានេះ អ្នកសារព័ត៌មានកម្ពុជា ១៤រូប បានធ្វើទស្សនកិច្ចទៅកាន់រោងចក្រផលិតមីជូរហឹររបស់ក្រុមហ៊ុន Guangxi Luobawang Technology Co., Ltd. ដែលជាក្រុមហ៊ុនផលិត និងចែកចាយមីជូរហឹរធំជាងគេមួយ ក្នុងចំណោមក្រុមហ៊ុន​ផ្សេងទៀត នៅក្នុងទីក្រុងលីវចូវនេះ។ 

 

លោក Chen Bo អគ្គនាយករងនៃក្រុមហ៊ុន Guangxi Luobawang Technology Co., Ltd. បានឱ្យដឹងថា ក្រុមហ៊ុនខ្លួនបានបើកដំណើរការរយៈពេល ៨ឆ្នាំហើយ ដោយការផ្តោតសំខាន់លើការផលិត និងកែច្នៃ មីជូរហឹរ។ បច្ចុប្បន្ន ផលិតផលមីជូរហឹររបស់ក្រុមហ៊ុននេះ មាន៥រសជាតិ គឺរសជាតិដើម, មានរសជាតិប៉េងប៉ោះ, រសជាតិឆ្អឹងស៊ុប, រសជាតិថែមហឹរ និងរសជាតិថែម(ក្អិន)ស្អុយ​។ 

 

 

បើតាម លោក Chen Bo បច្ចុប្បន្នក្រុមហ៊ុននេះ កំពុងផ្តល់ការងារ និងប្រាក់ចំណូលដល់ប្រជាពលរដ្ឋ ប្រមាណ៣ម៉ឺននាក់ តាមរយៈការធ្វើកិច្ចសន្យាទទួលទិញផលិផលកសិផល​ដែលជាវត្ថុធាតុដើមក្នុងការផលិតមីជូរហឹរនេះ។ លោក Chen Bo បញ្ជាក់ដូច្នេះ៖«ដោយសាររោងចក្រទិញវត្ថុធាតុដើមពីប្រជាកសិក​រ។ តាំងពីពេលរោងចក្របង្កើតដំបូង ក៏មានការបារម្ភដែរពីប្រជាកសិករដែរ។ ពួកគាត់ខ្លាចថារោងចក្រមិនទទួលទិញផលិតផលរបស់ពួកគាត់។ ប៉ុន្តែវិធីសាស្ត្ររបស់រោងចក្រ គឺផ្តល់លុយទៅកសិករសិន ហើយកាត់កងលុយវិញ នៅពេល​កសិករលក់កសិផលមកឱ្យរោងចក្រនៅពេលដាំដុះបាន»។

 

 

បើតាម លោក Chen Bo ក្នុងមួយឆ្នាំទៅមួយឆ្នាំ បរិមាណផលិតមីរបស់ក្រុមហ៊ុន គឺកើនឡើង២ខ្ទង់ ខណៈបរិមាណផលិត​ក្នុងឆ្នាំ២០២២ គឺមានចំនួន ១០០លានកញ្ចប់។ នៅក្នុងឆ្នាំ២០២៣នេះ លោកក៏នៅមានសុទិដ្ឋិនិយមចំពោះកំណើនផលិតកម្ម នៅក្នុងក្រុមហ៊ុនរបស់ខ្លួនផងដែរ ដោយសារប្រជាប្រិយភាព និងការនិយមចូលចិត្តរបស់អតិថិជន ទាំងក្រុងប្រទេសចិន និងក្រៅប្រទេស។

 

​ក្រៅពីលក់នៅប្រទេសចិន យីហោមីជូរហឹរ​របស់ក្រុមហ៊ុន Guangxi Luobawang Technology Co., Ltd. ក៏ត្រូវបានចែកចាយនៅ​ក្រៅ​ប្រទេស​ដែរ ដូចជា ទីផ្សារអាម៉េរិក ទីផ្សារនៅតំបន់អាស៊ី ​សិង្ហបុរី ម៉ាឡេស៊ី។​ ប្រទេសកម្ពុជា ក៏មានវត្តមានមីជូរហឹររបស់ក្រុមហ៊ុននេះដែរ។ «បច្ចុប្បន្ន តាមរយៈឈ្មួញចែកចាយ ផលិតផលមីជូរហឹរត្រូវបាននាំចូលទៅ​ប្រទេសកម្ពុជាហើយ​ ដោយសារតែតំបន់នេះនៅជិតនឹងប្រទេសកម្ពុជា។ ដូច្នេះការដឹកជញ្ជូនមានភាពងាយស្រួលផងដែរ។ ហើយតាមរយៈបុគ្គលិកទីផ្សាររបស់ក្រុមហ៊ុន ដោយសារតែរសជាតិរបស់ប្រជាពលរដ្ឋតំបន់លីវចូវ និងរសជាតិនៅកម្ពុជា ស្រដៀងគ្នា។ ដូច្នេះនៅកម្ពុជាក៏លក់ដាច់ដែរ ហើយរសជាតិដែលដាច់ជាងគេ គឺ(មីជូរហឹរ)រសជាតិដើម»។ នេះជាការបញ្ជាក់របស់លោកអគ្គនាយករងនៃក្រុមហ៊ុន Guangxi Luobawang Technology Co., Ltd. ដោយលោករំពឹងថា ផលិតផលមីជូរហឹរ នឹងទទួលបានការគាំទ្រកាន់តែច្រើនថែមទៀតពីប្រជាជនកម្ពុជា។

 

 

សូមជម្រាបថា កាលពីថ្ងៃទី១៥ ដល់២០មិថុនា អ្នកសារព័ត៌មានកម្ពុជា ចំនួន១៤រូប បានចូលរួមកម្មវិធី «អ្នកសារព័ត៌មានកម្ពុជា មើលខេត្តក្វាងស៊ី» ប្រទេសចិន ដែលជាកម្មវិធី រៀបចំឡើងដោយ កាសែត The Commercial News និង Cambodia Guangxi Cloud ASEAN International Communication Station ដែលជាអង្គភាពចំណុះ Guangxi Daily ។

 

ក្នុង​កម្មវិធីនេះ អ្នកសារព័ត៌មានបានទស្សនកិច្ចទីក្រុងសំខាន់របស់ខេត្តក្វាងស៊ី ដូចជាទីក្រុង Nanning ទីក្រុង Qinzhou ទីក្រុង​ Liuzhou ទីក្រុង Guilin និងកន្លែងផ្សេងដើម្បីចុះផ្សាយស្តីពីការតភ្ជាប់សកម្មភាពរបស់ក្វាងស៊ី  ជាមួយប្រទេសអាស៊ាន និងការសងសង់គម្រោងច្រករបៀងទាំងផ្លូវគោក និងផ្លូវទឹកថ្មីធំៗនៅភាគខាងលិច។ អ្នកសារព័ត៌មានកម្ពុជា ក៏​ទទួលបានបទពិសោធន៍បេតិកភណ្ឌវប្បធម៌អរូបី ស្រដៀងនឹងប្រទេសកម្ពុជា និងធ្វើបទសម្ភាសទីតាំងគំរូអភិវឌ្ឍន៍ឧស្សាហកម្មផងដែរ៕

​

 

: