ជាតិ
មន្ត្រីសុខភាពសត្វ ដកហូតបានពងមាន់៦ម៉ឺនគ្រាប់ដែលនាំចូលខុសច្បាប់ពីវៀតណាម រូបភាពពីហ្វេសប៊ុកលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ
× មន្ត្រីជំនាញ នៃអគ្គនាយកដ្ឋានសុខភាពសត្វ បានឃាត់រថយន្ត២គ្រឿង ដែលដឹកស៊ុតមាន់សរុប ៦ម៉ឺនគ្រាប់ពីវៀតណាម ចូលមកកម្ពុជាដោយគ្មានលិខិតអនុញ្ញាត។
បើតាមគណនីហ្វេសប៊ុក លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ ការបង្ក្រាបនេះ ធ្វើឡើងនៅយប់ថ្ងៃទី ២៨ មិថុនា នៅ២ទីតាំងខុសគ្នា គឺរថយន្តមួយគ្រឿង ត្រូវបានសមត្ថកិច្ចឃាត់នៅចំណុចស្តុបផ្សារអង្គតាសោម ក្នុងស្រុកត្រាំកក់ ខេត្តតាកែវ។ រថយន្តដឹកស៊ុតមាន់ចំនួន ៣ម៉ឺនគ្រាប់ ចេញពីវៀតណាម ចូលមកកម្ពុជាតាមច្រកភ្នំដិន ស្រុកគិរីវង់ ខេត្តតាកែវ បម្រុងឆ្ពោះទៅចែកចាយនៅខេត្តព្រះសីហនុ។
ចំណែករថយន្តមួយគ្រឿងទៀត ត្រូវសមត្ថកិច្ចឃាត់នៅចំណុចភូមិស្ទឹង ឃុំអូរសារាយ ស្រុកត្រាំកក់ ខេត្តតាកែវ។ រថយន្តនេះ ក៏បានដឹកស៊ុតមាន់ ៣ម៉ឺនគ្រាប់ ពីវៀតណាម ចូលមកកម្ពុជា តាមច្រកភ្នំដិនដែរ ហើយបម្រុងយកស៊ុតទាំងនោះទៅលក់នៅខេត្តកំពង់ស្ពឺ។
វត្ថុតាងដែលឃាត់បាន ត្រូវបានយកទៅរក្សាទុក នៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីបន្តនីតិវិធីតាមច្បាប់។ នេះបើតាមហ្វេសប៊ុក លោក ហ៊ុន សារ៉ាត់ ដដែល៕
© រក្សាសិទ្ធិដោយ thmeythmey.com