ភ្នំពេញ៖ ក្រសួងអប់រំ យុវជន និងកីឡា ប្រកាសបើកការប្រឡងជ្រើសរើសគ្រូបង្រៀនកម្រិតមូលដ្ឋាន និងកម្រិតបរិញ្ញាបត្រឯកទេសអប់រំកាយ ចំនួន ១០០នាក់ ឱ្យចូលរៀននៅវិទ្យាស្ថានជាតិអប់រំកាយ និងកីឡា។ ការប្រឡងនេះ នឹងរៀបចំនៅថ្ងៃទី២២ តុលាខាងមុខ។
គ្រូបង្រៀនកម្រិតមូលដ្ឋានឯកទេសអប់រំកាយ ១២+២ ចំនួន ៧៥នាក់ និងកម្រិតបរិញ្ញាបត្រ ១២+៤ ចំនួន ២៥នាក់ នឹងមានឱកាសចូលរៀននៅវិទ្យាស្ថានជាតិអប់រំកាយ និងកីឡា។ ក្នុងការជ្រើសរើសនេះ ក្រសួងអប់រំ បានកំណត់ និងបែងចែកកន្លែងទៅបំពេញការងារនៅតាមបណ្ដាខេត្តនានា។
បើតាមក្រសួងអប់រំ ខេត្តសៀមរាប រើសច្រើនជាងគេ គឺ១៣នាក់។ ចំណែក ខេត្តព្រៃវែង រើស ១០នាក់, បាត់ដំបង ៩នាក់, ពោធិ៍សាត់ ៧នាក់ , ត្បូងឃ្មុំ និងបន្ទាយមានជ័យ ៧នាក់។ ដោយឡែក ខេត្តក្រចេះ រើស ៦នាក់, កំពង់ចាម និងកំពង់ធំ ៥នាក់។ រីឯ ខេត្តកំពង់ឆ្នាំង និងស្វាយរៀង រើស ៤នាក់។
ក្នុងសេចក្ដីជូនដំណឹង ក្រសួងអប់រំ បញ្ជាក់ថា ខេត្តស្ទឹងត្រែង, កោះកុង, កណ្ដាល និងឧត្តរមានជ័យ រើសចំនួន ៣នាក់។ ចំពោះ ខេត្តព្រះវិហារ, រតនគិរី, កំពង់ស្ពឺ, ប៉ៃលិន, ព្រះសីហនុ ជ្រើសរើស ២នាក់ និងខេត្តមណ្ឌលគិរី ១នាក់។
សម្រាប់ការប្រឡងនេះ បេក្ខជនទាំងពីរភេទ ត្រូវមានអាយុចាប់ពី១៧ ដល់២៥ឆ្នាំ នឹងត្រូវនៅលីវ។ ជាមួយគ្នានេះ បេក្ខនារី ត្រូវមានកម្ពស់ចាប់ពី ១,៥៥ម៉ែត្រ និងបេក្ខជន មានកម្ពស់ចាប់ពី ១,៦៥ម៉ែត្រឡើងលើ។
ការប្រឡង នឹងចាប់ផ្ដើមនៅថ្ងៃទី២២ ខែតុលា។ ការប្រឡងនេះ មានវិញ្ញាសាសរសេរ និងវិញ្ញាសាអនុវត្តកីឡា។ នេះបើតាមសេចក្ដីជូនដំណឹង ដែលចុះហត្ថលេខាដោយលោក ហង់ជួន ណារ៉ុន រដ្ឋមន្រ្តីក្រសួងអប់រំ កាលពីថ្ងៃ៦ កក្កដា៕