ក្នុងកិច្ចប្រជុំក្រុមប្រឹក្សាសម្របសម្រួលពីភាពចាំបាច់នៃកម្លាំងប្រដាប់អាវុធរុស្ស៊ី នៅថ្ងៃទី១៨ ខែកក្កដា លោក Mikhail Mishustin ប្រមុខរដ្ឋាភិបាលរុស្ស៊ី បានអះអាងថា ការផ្តល់យន្តហោះចម្បាំងជំនាន់ទី៥ កំពុងត្រូវបានរៀបចំសម្រាប់យោធា។ ប្រមុខរដ្ឋាភិបាលរុស្ស៊ី បានបញ្ជាក់ថា អាទិភាពរបស់ក្រុមប្រឹក្សាសម្របសម្រួល គឺធានាថាការដឹកជញ្ជូន នឹងត្រូវបានអនុវត្តទាន់ពេលវេលា។ 

 

កន្លងមក ក្រសួងការពារជាតិរុស្ស៊ី បានទទួលយន្តហោះចម្បាំង Su-35S ដែលជាយន្តហោះចម្បាំងជំនាន់ទី  4++ ខណៈយន្តហោះចម្បាំងផ្សេងទៀត កំពុងផលិត។ មិនតែប៉ុណ្ណោះ កងទ័ពរុស្ស៊ី ក៏បានទទួលរថក្រោះ T-90M Proryv និង T-72BZMផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Tass។ 

 

ការធ្វើទំនើបកម្មរបស់រុស្ស៊ីបែបនេះ ធ្វើឡើងស្របពេលខ្លួន កំពុងជាប់ដៃធ្វើសង្រ្គាមជាមួយអ៊ុយក្រែន ដែលទទួលបានអាវុធទំនើបៗជាច្រើន ពីប្រទេសលោកខាងលិច។ 

 

សូមបញ្ជាក់ថា យន្តហោះជំនាន់ទី៥ របស់រុស្ស៊ី មាន Su-57 ដែលត្រូវបានអភិវឌ្ឍឡើង និងមានបំពាក់មុខងារជាច្រើនប្រភេទ នៅក្នុងការបំផ្លាញទីតាំងសត្រូវ ទាំងលើអាកាស និងលើដី និងធ្វើប្រតិបត្តិការបានជាច្រើន។ មិនតែប៉ុណ្ណោះ ល្បឿនយន្តហោះនេះ គឺលឿន និងអាចបំបាំងខ្លួន ពីរ៉ាដាសត្រូវបានថែមទៀត៕