ការប្ដេជ្ញានេះ ត្រូវបានលើកឡើងដោយលោក Rho Hyun Jun នាយកKOICAប្រចាំកម្ពុជា​ នៅចំពោះមុខ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ក្នុងពិធីចុះហត្ថលេខាលើកិច្ចព្រមព្រៀងគម្រោង «ការកសាងសមត្ថភាព និងការបង្កើតបរិយាកាសក្នុងជំនាញ ICT នៃការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) នៅកម្ពុជា» នៅទីស្ដីការក្រសួងការងារ​ នាព្រឹកថ្ងៃទី១៩ ខែកក្កដា​។ គម្រោងនេះ​ ត្រូវអនុវត្តចាប់ពីឆ្នាំ២០២៣ដល់២០២៧ ក្នុងគោលបំណង រួមចំណែកលើកកម្ពស់គុណភាព TVET តាមរយៈការកែលម្អកម្មវិធីសិក្សា និងបរិយាកាសបណ្តុះបណ្តាល រួមទាំងពង្រឹងសមត្ថភាពគ្រូបច្ចេកទេសក្នុងវិស័យ ICT។​

 

​លោក អ៊ិត សំហេង​ បានសំដែងការពេញចិត្តជាខ្លាំង នូវការចូលរួមអភិវឌ្ឍវិស័យអប់រំបណ្ដុះបណ្ដាលជំនាញបច្ចេកទេស និងវិជ្ជាជីវៈ (TVET) របស់KOICA ខណៈប្រទេសកូរ៉េខាងត្បូង កំពុងរីកចម្រើន លើវិស័យបច្ចេកវិទ្យានៅលើពិភពលោក។ លោក​​ សង្ឃឹម​ថា កូរ៉េខាងត្បូងតាមរយៈKOICA នឹងពង្រីកកិច្ចសហប្រតិបត្តិការ លើវិស័យ TVET នៅកម្ពុជាបន្ថែមទៀត ដើម្បីជួយអភិវឌ្ឍធនធានមនុស្ស ឱ្យកាន់តែឆ្លើយតប ទៅនឹងតម្រូវការទីផ្សារការងារ។ នេះបើតាមការចុះផ្សាយរបស់ក្រសួងការងារ។

 

លោក អ៊ិត សំហេង​ បានបញ្ជាក់យ៉ាងដូច្នេះ ៖ « គម្រោងកសាងសមត្ថភាព និងការបង្កើតបរិយាកាសក្នុងជំនាញICT នៃវិស័យTVETនៅកម្ពុជានេះ ពិតជាមានសារសំខាន់ក្នុងការចូលរួមចំណែកអភិវឌ្ឍវិស័យ TVETនៅកម្ពុជា។ ជាពិសេស វាចូលរួមគាំទ្រផែនការបណ្តុះបណ្តាលជំនាញវិជ្ជាជីវៈ ដល់យុវជនមកពីគ្រួសារក្រីក្រ និងងាយរងគ្រោះទូទាំងប្រទេស ចំនួន​១លាន៥សែននាក់ ដែលរាជរដ្ឋាភិបាលកម្ពុជា នឹងចាប់ផ្តើមនៅចុងឆ្នាំ២០២៣នេះ»។

 

ជាមួយគ្នានេះ លោក Rho Hyun Jun  បានលើកឡើងថា​ រដ្ឋាភិបាលសាធារណរដ្ឋកូរ៉េ បានចាត់ទុកកម្ពុជា ជាប្រទេសសំខាន់បំផុតទី២ ក្នុងតំបន់ក្នុងការជួយអភិវឌ្ឍជំនាញTVET។ ប្រធាន KOICA រូបនេះ ក៏ប្ដេជ្ញានាំមកនូវបទពិសោធន៍នៃការបណ្ដុះបណ្ដាលជំនាញនៅប្រទេសខ្លួន មកជួយបណ្ដុះបណ្ដាលដល់ប្រជាជនកម្ពុជា ដើម្បីជំរុញការអភិវឌ្ឍជីវភាពប្រជាជន អភិវឌ្ឍសេដ្ឋកិច្ចជាតិផងដែរ៕