បក្សឆ្ពោះទៅមុខ របស់លោក Pita Limjaroenrat មិនទទួលបានគាំទ្រពីសភាទាំងពីរថ្នាក់ ដើម្បីដឹកនាំរដ្ឋាភិបាលឡើយ ដោយសារគោលនយោបាយកែប្រែច្បាប់ប្រមាថព្រះមហាក្សត្រ។ ក្រោយបរាជ័យបែបនេះ លោក Srettha Thavisin បេក្ខភាពនាយករដ្ឋមន្រ្តី បានបញ្ជាក់យ៉ាងច្បាស់ៗថា ប្រសិនបើ បក្ស Pheu Thai ស្នើតែងតាំងបេក្ខជននាយករដ្ឋមន្រ្តីនៅក្នុងការបោះឆ្នោតសភាថ្ងៃទី២៧ ខែកក្កដា ខ្លួននឹងដកលទ្ធភាពនៃការកែប្រែច្បាប់ប្រមាថព្រះមហាក្សត្រចេញ។ 

 

«បើមិនដូច្នោះទេ បក្សនឹងមិនទទួលបានការគាំទ្រពីបក្សនយោបាយ​ និងព្រឹទ្ធសភា...។ បើបក្សយើងដឹកនាំ បញ្ហាច្បាប់ប្រមាថព្រះមហាក្សត្រ នឹងត្រូវឈប់»។ លោក Srettha បានសង្កត់ធ្ងន់បែបនេះ នៅថ្ងៃទី២០ ខែកក្កដា។ ទន្ទឹមនេះ លោក Srettha បានបន្តថា ប្រសិនបើច្បាប់ប្រមាថព្រះមហាក្សត្រត្រូវបានពិភាក្សាដោយវិជ្ជមាន សមាជិកព្រឹទ្ធសភា គួរផ្តល់ការគាំទ្រយ៉ាងមុតមាំដល់រដ្ឋបាលដឹកនាំដោយបក្សPheu Thai។ 

 

នៅក្នុងការបោះឆ្នោតសភាក្នុងការរើសនាយករដ្ឋមន្រ្តីខាងមុខ លោក Srettha ត្រូវបានរំពឹងថា នឹងជ្រើសជាបេក្ខភាពនាយករដ្ឋមន្រ្តី ក្រោយពីលោកPita មេដឹកនាំបក្សឆ្ពោះទៅមុខ មិនទទួលបានសំឡេងគាំទ្រពីសភាគ្រប់គ្រាន់។ 

 

កន្លងមក សមាជិកព្រឹទ្ធសភា និងបក្សនយោបាយជាច្រើន បានបញ្ជាក់រួចហើយថា ខ្លួនមិនគាំទ្របក្សឆ្ពោះទៅមុខឡើយ ដោយសារគោលនយោបាយធ្វើវិសោធនកម្មលើច្បាប់ប្រមាថព្រះមហាក្សត្រ៕