ក្នុងកិច្ចសម្ភាសជាមួយសារព័ត៌មានថ្មីៗ លោក គីមឡុង អះអាងថា ការបោះឆ្នោតប្រកបដោយភាពល្អប្រសើរនៅអាណត្តិទី៧នេះ នឹងនាំផលចំណេញផ្នែកសេដ្ឋកិច្ច ដល់កម្ពុជា។ លោកថា សហគមន៍អន្តរជាតិ អ្នកវិនិយោគ ជាពិសេសភ្ញៀវទេសចរ នឹងឃើញពីសុខសន្តិភាព និងស្ថិរភាព​ខាងប្រជាធិបតេយ្យនៅកម្ពុជា។

 

 

បើតាមលោក គីមឡុង ដើម្បីឱ្យកម្ពុជាកាន់តែមានសេដ្ឋកិច្ចរីកចម្រើន រដ្ឋាភិបាលថ្មី គួរតែបន្តធ្វើកំណែទម្រង់គោលនយោបាយសេដ្ឋកិច្ច អប់រំ និងលើកកម្ពស់ការបណ្ដុះបណ្ដាលជំនាញ ឬវិជ្ជាជីវៈការងារ ដល់ពលរដ្ឋ។ លោកកត់សម្គាល់ឃើញ កម្ពុជាសព្វថ្ងៃសម្បូរធនធានធម្មជាតិ កសិផល និងយុវជន។ ដូច្នេះបើរដ្ឋាភិបាលថ្មីផ្ដោតសំខាន់ លើការកែច្នៃធនធានទាំងនេះ កម្ពុជានឹងមានសន្ទុះសេដ្ឋកិច្ចកើនឡើងខ្ពស់នៅតំបន់អាស៊ាន៕