អគ្គនាយកដ្ឋានសុខភាពសត្វ បញ្ជាក់ថា នៅរដូវវស្សានេះ ទឹកជំនន់អាចកើតឡើងនៅតំបន់មួយចំនួនក្នុងប្រទេសកម្ពុជា ជាពិសេស តំបន់ជាប់មាត់ទន្លេ បឹង ស្ទឹង និងព្រែកជាដើម។ ការណ៍នេះ អាចបណ្ដាលឱ្យជំងឺឆ្លងសត្វផ្ទុះឡើងផងដែរ។ 
 

ជុំវិញបញ្ហានេះ ក្រសួងកសិកម្ម រុក្ខប្រមាញ់ និងនេសាទ បានអំពាវនាវឱ្យកសិករដែលចិញ្ចឹមសត្វ ត្រៀមលក្ខណៈសង្គ្រោះ និងទប់ស្កាត់ការឆ្លងរាលដាលជំងឺសត្វផ្សេងៗ។ ក្រសួង ស្នើឱ្យកសិករ រៀបចំទីទួលសុវត្ថិភាពដែលនៅជិតបំផុត, ត្រៀមចំណី-ទឹកឱ្យបានគ្រប់គ្រាន់ និងធ្វើអនាម័យសត្វឱ្យបានល្អ។
 

បន្ថែមពីលើនេះ ត្រៀមធ្នើរសម្រាប់ដាក់សត្វ, មធ្យោបាយសង្គ្រោះផ្សេងៗ និងតាមដានសុខភាពសត្វ។ ក្នុងករណីមានសត្វឈឺ ត្រូវបំបែកចេញពីសត្វជា និងរាយការណ៍ ជាបន្ទាន់ទៅភ្នាក់ងារសុខភាពសត្វភូមិ ឬអាជ្ញាធរមូលដ្ឋានដែលនៅជិតបំផុត ដើម្បីអន្តរាគមន៍ព្យាបាលបានទាន់ពេលវេលា៕