ពីវិមានរដ្ឋាភិបាលថៃនៅថ្ងៃទិ២៣ ខែសីហា លោកប្រាយុទ្ធ ចន្ទអូចា នាយករដ្ឋមន្រ្តីបណ្តោះអាសន្នថៃ បានអបអរលោក Srettha Thavisin នាយករដ្ឋមន្រ្តីជាប់ឆ្នោត ហើយថែមទាំងជូនពរឱ្យលោក Srettha ទទួលបានជោគជ័យ ក្នុងការកាន់កិច្ចការជាប្រមុខរដ្ឋាភិបាលបន្តពីលោកផង។ 

 

តំណែងនាយករដ្ឋមន្រ្តីបណ្តោះអាសន្នរបស់លោកប្រាយុទ្ធ ត្រូវបញ្ចប់ នៅពេលលោក Srettha ស្បថចូលកាន់តំណែង។ 

 

កន្លងមក លោកប្រាយុទ្ធ បានប្រកាសចូលនិវត្តន៍ពីនយោបាយ បន្ទាប់ពីកាន់តំណែងដ៏សំខាន់មួយនេះ ចាប់តាំងពីឆ្នាំ២០១៤មក។ 

 

លោក Srettha Thavisin ត្រូវបានសភាថៃបោះឆ្នោតគាំទ្រធ្វើនាយករដ្ឋមន្រ្តីថៃទី៣០ នៅក្នុងថ្ងៃទី២២ ខែសីហា នៅក្នុងសំឡេងគាំទ្រ៤៨២ ខណៈសំឡេងប្រឆាំងមានចំនួន ១៦៥សំឡេង។ ចំណែកអនុបវាទមានចំនួន៨១សំឡេង។

 

តាមការចុះផ្សាយរបស់សារព័ត៌មានក្នុងស្រុក លោក Srettha ទទួលបានការតែងតាំងពីមហាក្សត្រថៃ ជានាយករដ្ឋមន្រ្តីទី៣០ រួចហើយ ហើយកម្មវិធីផ្លូវការធ្វើនៅម៉ោង៦ល្ងាច ក្នុងថ្ងៃទី២៣ ខែសីហា។ នេះបើតាមការបញ្ជាក់របស់អ្នកនាំពាក្យរដ្ឋសភា លោក  Kampee Ditthakorn។ 

 

ក្រោយការតែងតាំងជាផ្លូវការពីមហាក្សត្រ លោក Srettha គ្រោងមានសន្និសីទសារព័ត៌មានមួយ។ បន្ថែមពីនេះ គណៈរដ្ឋមន្រ្តីថ្មី ត្រូវបានរំពឹងថា នឹងរៀបចំរួចរាល់នៅក្នុង ២ ឬ៣សប្តាហ៍ក្រោយ ពោលគឺមុនពេលនាយករដ្ឋមន្រ្តីថ្មីប្រកាសពីគោលនយោបាយរបស់រដ្ឋាភិបាលទៅកាន់សភា។ នេះបើតាមការចុះផ្សាយរបស់ Thai Enquirer។ 

យ៉ាងណាមិញ ឧបនាយករដ្ឋមន្រ្តី លោក Wissanu Krea-ngam នៅថ្ងៃទី២៣ ខែសីហា បានបញ្ជាក់ថា រដ្ឋាភិបាលថៃថ្មី ដែលដឹកនាំដោយបក្សភឿថៃ អាចនឹងចូលកាន់តំណែងនៅដំណាច់ខែកញ្ញាខាងមុខ។ ត្រង់ចំណុចនេះ លោកឧបនាយករដ្ឋមន្រ្តីបានពន្យល់ថា បើទោះមានការតែងតាំងលោក Srettha ពីព្រះមហាក្សត្រក៏ដោយ ប៉ុន្តែលោក Srettha មិនទាន់អាចកាន់តំណែងជាប្រមុខរដ្ឋាភិបាលបានឡើយ ដោយសារតែលោកមិនទាន់មានគណៈរដ្ឋមន្រ្តី និងមិនទាន់ស្បថចូលកាន់តំណែង។

 

មកទល់ពេលនេះ វាមិនទាន់មានព័ត៌មានច្បាស់ការណាមួយ ពាក់ព័ន្ធនឹងការផ្គូផ្គង់សមាភាពរបស់រដ្ឋាភិបាលថ្មីទេ៕