តាមសេចក្តីថ្លែងការណ៍មួយចេញដោយអ្នកនាំពាក្យសេតវិមាន លោកស្រី Karine Jean-Pierre នៅថ្ងៃទី២២ ខែសីហា លោក ចូ បៃឌិន នឹងអវត្តមានក្នុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅក្រុងហ្សាការតា ឥណ្ឌូណេស៊ី ដោយលោកជាប់បំពេញទស្សនកិច្ចនៅឥណ្ឌា ដើម្បីចូលរួមក្នុងកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង ២០ (G20)។ 

 

«លោកប្រធានាធិបតី ចូ បៃឌិន នឹងធ្វើដំណើរនៅក្រុងញូវដែលី ឥណ្ឌា ពីថ្ងៃទី៧ ដល់ថ្ងៃទី១០ ខែកញ្ញា ដើម្បីចូលរួមកិច្ចប្រជុំមេដឹកនាំ G20»។ សេចក្តីថ្លែងការណ៍អ្នកនាំពាក្យសេតវិមានបានបញ្ជាក់បែបនេះ ដោយបន្តថា ក្នុងកិច្ចប្រជុំនោះ លោកបៃឌិន នឹងជជែកពីការដោះស្រាយបញ្ហាសកល ដូចជា ការប្រយុទ្ធប្រឆាំងអំពើពុករលួយ, ការកាត់បន្ថយផលប៉ះពាល់ពីសង្គម និងសេដ្ឋកិច្ច ដែលបង្កដោយសង្រ្គាមនៅអ៊ុយក្រែន ក៏ដូចជាបង្កើនសមត្ថភាពធនាគារអភិវឌ្ឍពហុភាគី ដូចជាធនាគារពិភពលោកជាដើម ដើម្បីកាត់បន្ថយភាពក្រីក្រ។ 

 

ក្នុងកិច្ចប្រជុំ G20 នេះ លោកបៃឌិន អាចនឹងជួបជាមួយលោក វ្ល៉ាឌីមៀ ពូទីន ប្រធានាធិបតីរុស្ស៊ី ដោយសារកន្លងមកមេដឹកនាំរុស្ស៊ី មិនទាន់បានច្រានចោលពីការចូលរួមក្នុងកិច្ចប្រជុំក្រុមប្រទេសអ្នកមានទាំង ២០ឡើយ។ 

 

ដោយឡែក លោកស្រី កាម៉ាឡា ហារីស អនុប្រធានាធិបតីអាម៉េរិក នឹងទៅឥណ្ឌូណេស៊ី ដើម្បីចូលរួមកិច្ចប្រជុំអាស៊ាន-អាម៉េរិក និងកិច្ចប្រជុំអាស៊ីបូព៌ា រួមទាំងមានកិច្ចពិភាក្សាជាមួយមេដឹកនាំប្រទេសផ្សេងទៀត។ 

 

បន្ថែមពីនេះ លោកស្រីហារីស និងមេដឹនាំអាស៊ាន នឹងពិនិត្យឡើងវិញការពង្រីកទំនាក់ទំនងរវាងអាម៉េរិក-អាម៉េរិក ដែលមិនធ្លាប់មានពីមុនមកផង។ ស្របគ្នានេះ អនុប្រធានាធិបតីអាម៉េរិក នឹងបញ្ជាក់ពីការប្តេជ្ញារបស់អាម៉េរិកចំពោះតួនាទីស្នូលរបស់អាស៊ានផង៕