U23 ឥណ្ឌូណេស៊ី ដែលទទួលបានចំណាត់ថ្នាក់លេខ២ល្អបំផុតក្នុងពូល B​ បានឡើងជួបម្ចាស់ផ្ទះថៃ ដែលបញ្ចប់ក្នុងចំណាត់ថ្នាក់កំពូលតារាងពូល A នៅវគ្គពាក់កណ្តាលផ្តាច់ព្រ័ត្រ នៅថ្ងៃទី២៤ ខែសីហា វេលាម៉ោង ៨យប់ នៅកីឡដ្ឋាន Rayong ប្រទេសថៃ ក្រោយការប៉ះគ្នារវាងម្ចាស់ការពារជើងឯកវៀតណាម និងម៉ាឡេស៊ី នៅម៉ោង ៤ រសៀល។
 

U22 ឥណ្ឌូណេស៊ី បានធ្វើឲ្យ U22 ថៃ ចាញ់ទាំងមិនអស់ចិត្តក្នុងជំនួបផ្តាច់ព្រ័ត្រព្រឹត្តិការណ៍ស៊ីហ្គេម លើកទី៣២ នៅប្រទេសកម្ពុជា។ ការប្រកួតដ៏តានតឹងកាលនោះ បានឈានដល់ថែមម៉ោង ១៥នាទី ២ដង ហើយក្រុមទាំង២នេះ មានការប្រទុស្ដសារ៉ាយ រហូតឈានដល់ការវាយតប់គ្នាផង។ លទ្ធផល បញ្ជប់ការប្រកួត ឥណ្ឌូណេស៊ី ឈ្នះ ថៃ ៥-២ ដើម្បីគ្រងមេដាយមាស។
 

ដោយឡែក ក្រុមទាំង ២ត្រូវជួបគ្នាម្ដងទៀត​ នៅក្នុងព្រឹត្តិការណ៍ AFF U23 វគ្គពាក់កណ្ដាលផ្ដាច់ព្រ័ត្រ។ លោក Ithsara Sritharo គ្រូ U23​ ថៃ បានលើកសរសើរកូនក្រុមខ្លួនថា មានកីឡាករល្អៗ ដែលអាចចូលរួមប្រកួតបាន ដោយពួកគេ គ្រាន់តែត្រូវការឱកាស ដើម្បីបង្ហាញសមត្ថភាពខ្លួនប៉ុណ្ណោះ។ នេះបើយោងទៅតាមការបង្ហោះរបស់គេហទំព័រ AFF។
 

ចំណែកគ្រូបង្វឹកឥណ្ឌូណេស៊ី លោក Shin Tae Yong បាននិយាយទំនងជាឌឺដងថា ក្រុមជម្រើសជាតិថៃ មានកីឡាករល្អៗ និងមានគុណភាព ​ប៉ុន្ដែ ចំពោះការប្រកួតនៅវគ្គពាក់កណ្ដាលផ្ដាច់ព្រ័ត្រ មិនអាចស្មានដឹងពីលទ្ធផលមុនបានទេ។ 
 

គ្រូបង្វឹករូបនេះ ដូចជាមិនសូវខ្វល់ចំពោះគុណភាពក្រុមថៃខ្ពស់ដល់កម្រិតណានោះទេ ប៉ុន្ដែអ្វី ដែលគ្រូសញ្ជាតិកូរ៉ាខាងត្បូង ចង់ឃើញនោះ គឺការលេងឲ្យកាន់តែប្រសើរ របស់ក្រុមជម្រើសជាតិឥណ្ឌូណេស៊ី ក្នុងវគ្គពាក់កណ្ដាលផ្ដាច់ព្រ័ត្រ។
 

 «ក្រុមថៃ មានកីឡាករល្អ ប៉ុន្ដែ នៅវគ្គពាក់កណ្ដាលផ្ដាច់ព្រ័ត្រ អ្វីៗ ក៏អាចកើតឡើងបានដែរ។ សម្រា​ប់ខ្ញុំ ខ្ញុំ គ្រាន់តែចង់ឃើញ កីឡាករខ្ញុំ ពង្រឹងការលេង ក្នុងការប្រកួតនេះ។»។ គ្រូជម្រើសជាតិឥណ្ឌូណេស៊ី បាននិយាយដូច្នេះ៕