ក្រោយលោក សេដ្ឋា ថាវីស៊ីន ជាប់ជានាយករដ្ឋមន្រ្តីថៃ មេដឹកនាំអាម៉េរិក សហភាពអឺរ៉ុប ចិន ឥណ្ឌា និងបណ្តាប្រទេសផ្សេងទៀត បានផ្ញើសារអបអរសាទរជាបន្តបន្ទាប់ ហើយថែមទាំងប្តេជ្ញាធ្វើការជាមួយរដ្ឋាភិបាលថៃថ្មីថែមទៀត។
នៅក្នុងសេចក្តីថ្លែងការណ៍មួយចេញផ្សាយដោយស្ថានទូតអាម៉េរិកនៅថ្ងៃទី២៤ ខែសីហា លោក អាន់តូនី ប្លីងខិន រដ្ឋមន្រ្តីការបរទេសអាម៉េរិក បានថ្លែងថា រដ្ឋាភិបាលក្រុងវ៉ាស៊ីនតោន រំពឹងធ្វើការជាមួយនាយករដ្ឋមន្រ្តីថៃ ដើម្បីបន្តកសាងកិច្ចព្រមព្រៀងភាពជាដៃគូ និងសម្ភ័ន្ធមិត្តជាយុទ្ធសាស្រ្ត រួមទាំងពង្រឹងសម្ព័ន្ធភាពប្រទេសទាំងពីរ។
«យើងនឹងសហការឱ្យបានជិតស្និទ្ធជាមួយរដ្ឋាភិបាលថៃថ្មី ក្នុងការបន្តអភិវឌ្ឍតម្លៃរួម និងគោលការណ៍តំបន់ឥណ្ឌូ-ប៉ាស៊ីហ្វិកសេរី, បើកចំហ, ការតភ្ជាប់, សន្តិភាព និងការងើបឡើងវិញ។
ស្របគ្នានេះ សហភាពអឺរ៉ុប ក៏បានអបអរលោក សេដ្ឋា ដែលត្រូវបានសភាបោះឆ្នោតធ្វើជានាយករដ្ឋមន្រ្តីថៃផង នៅក្នុងសេចក្តីថ្លែងការណ៍មួយដោយតំណាងជាន់ខ្ពស់សហភាពអឺរ៉ុប នៅថ្ងៃទី២៣ ខែសីហា។ ក្នុងសេចក្តីថ្លែងការណ៍នោះ សហភាពអឺរ៉ុប បានសន្យាធ្វើឱ្យកាន់តែជិតស្និទ្ធជាមួយរដ្ឋាភិបាលថៃថ្មី ដើម្បីពង្រឹងទំនាក់ទំនងទាំងពីរ ក្នុងការគាំទ្រសណ្តាប់ធ្នាប់អន្តរជាតិ ស្ថិរភាពក្នុងតំបន់ ការអភិវឌ្ឍប្រកបដោយចីរភាព ប្រជាធិបតេយ្យ សិទ្ធិមនុស្ស វិបុលភាព និងពាណិជ្ជកម្មប្រកបដោយភាពត្រឹមត្រូវ និងសេរី។
នាយករដ្ឋមន្រ្តីឥណ្ឌា លោក នារិន្ទ្រា ម៉ូឌី បានសរសេរលើបណ្តាញសង្គម Twitter នៅថ្ងៃទី២៣ ខែសីហា ដើម្បីអបអរលោកសេដ្ឋា ក្លាយជានាយករដ្ឋមន្រ្តីថ្មីផង។ លោកម៉ូឌីបានអះអាងថា រដ្ឋាភិបាលក្រុងញូវដែលី នឹងធ្វើការឱ្យកាន់តែជិតសិទ្ធជាមួយលោកសេដ្ឋា ដើម្បីនាំឱ្យទំនាក់ទំនងទ្វេភាគី ឈានទៅកម្រិតខ្ពស់បន្ថែមទៀត។
ជាការឆ្លើយតប នាយករដ្ឋមន្រ្តីថៃថ្មី បានអះអាងថា លោកនឹងធ្វើការជាមួយរដ្ឋាភិបាលឥណ្ឌា រួមទាំងពង្រឹងទំនាក់ទំនងទ្វេភាគី។
តាមរយៈបណ្តាសង្គម Twitter លោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី បានប្តេជ្ញាពង្រឹងទំនាក់ទំនងជាមួយថៃលើវិស័យជាច្រើន។
ចំណែកអ្នកនាំពាក្យក្រសួងការបរទេសចិន ដែលចាត់ទុកចិន និងថៃជាគ្រួសារតែមួយ បានអះអាងថា រដ្ឋាភិបាលក្រុងប៉េកាំង ត្រៀមខ្លួនជាស្រេច ក្នុងការធ្វើការជាមួយរដ្ឋាភិបាលក្រុងបាងកក ដើម្បីធានាពីទំនាក់ទំនងល្អរបស់ប្រទេសទាំងពីរ៕
ក្រៅពីនេះ អគ្គរដ្ឋទូតអ៊ីស្រាអែល និងអង់គ្លេសប្រចាំនៅថៃ ក៏បានអបអរលោកសេដ្ឋា ក្នុងការធ្វើជាប្រមុខរដ្ឋាភិបាលថៃថ្មីដែរ៕