«ពីដំបូង នាងខ្ញុំគ្រាន់តែជាអ្នកគាំទ្រ ក្នុងឆ្នាំ២០១៩ ហើយក្រោយមកបានចូលជាសមាជិក Tiger Army មុនវិវឌ្ឍន៍ធ្វើជាអ្នកស្ម័គ្រចិត្តឆែកសំបុត្រ។ ក្នុងឆ្នាំ២០២១ អំឡុងពេលកូវីដ-១៩ ខ្ញុំបានសុំរៀមច្បងក្នុងក្លិបអង្គរថាយហ្គឺររៀននិយាយ រហូតបានជាប់ជាអ្នកអត្ថាធិប្បាយ»។ កញ្ញា ពិន មនីនាថ ឬហ្ស៊ីង បានបញ្ជាក់ដូច្នេះ ក្នុងបទសម្ភាសផ្ទាល់ជាមួយសារព័ត៌មាន ឌីជីថលថ្មីៗ នាខេត្តសៀមរាប។
ចាប់ផ្តើមពីឆ្នាំ២០២១ រហូតមកដល់ពេលបច្ចុប្បន្នកញ្ញា ហ្ស៊ីង ថាការងារមួយនេះ បានជួយសម្រួលដល់ជីវភាពរបស់នាងបានច្រើនគួរសម ហើយមានមនុស្សជាច្រើនបានស្គាល់នាងតាមរយៈការអត្ថាធិប្បាយកីឡាបាល់ទាត់នេះផងដែរ។ អ៊ីហ្ស៊ីង ថាសម្រាប់ទៅថ្ងៃអនាគតគឺមិនទាន់អាចនិយាយបាននោះទេ ថានឹងត្រូវឈប់ពីការងារមួយនេះ ឬបន្ត តែសម្រាប់ចិត្តរបស់នាងគឺស្រលាញ់ការងារជាពិធីការិនីបាល់ទាត់ និងមិនចង់បោះបង់ឡើយ។
កញ្ញា មនីនាថ ពេលជាពិធីការិនីបាល់ទាត់។ រូបពី Yi Xing
គ្រួសារជាត្តាធ្វើឱ្យកញ្ញា ហ្ស៊ីង ចេះមើលបាល់ទាត់
មិនមានចំណង់ចំណូលចិត្តលើវិស័យកីឡាបាល់ទាត់ច្រើននោះទេ តែថានៅឆ្នាំ២០១៦ មានការប្រកួតកីឡាបាល់ទាត់ពិភពលោក FIFA World Cup ទើបបណ្តាលឱ្យចិត្តចាប់ អារម្មណ៍លើវិស័យកីឡាមួយនេះបន្តិចម្តងៗ ហើយក៏ចាប់ចេះមើលបាល់ទាត់ជម្រើសជាតិ កម្ពុជា។
កញ្ញាលើកឡើងថា៖ «បើថាជាស្រលាញ់មិនសូវទេ ពីដំបូង ប៉ុន្តែដោយសារតែគ្រួសារ ចូលចិត្តមើលបាល់ទាត់ FIFA World Cup ពេលនោះខ្ញុំក៏ចូលរួមមើលដែរ។ គ្រាន់តែមើល ឃើញធម្មតាមិនសូវជាចាប់អារម្មណ៍ ដោយសារតែវ័យកំពុងតែរៀន ដោយឆ្លៀតពេលទំនេរមើលខ្លះៗ»។ កញ្ញាមនីនាថ បន្តថាចាប់ពីពេលនោះមកក៏ស្រលាញ់ និងចាប់ផ្តើមគាំទ្រ បាល់ទាត់នៅកម្ពុជា។
តើស្ត្រីវ័យក្មេងមានដើមកំណើតនៅខេត្តសៀមរាប រូបនេះមានកីឡាកររូបណាជានិមិត្តរូប របស់ខ្លួន? ទោះជាអ្នកគាំទ្រក្លិបបាល់ទាត់អង្គរថាយហ្គឺរ តែកញ្ញា ហ្ស៊ីង ថាមិនមានកីឡាករដែលជានិមិត្តរូបរបស់ខ្លួនឡើយ។ កីឡាករដែលកញ្ញា នាថ គោរពស្រឡាញ់នោះ មានម្នាក់ បានចូលនិវត្តន៍ពីបាល់ទាត់ហើយ និងមួយរូបទៀតកំពុងប្រកបអាជីពជាអ្នកចាំទីក្នុងក្លិប Tiffy Army។
«តារាក្នុងដួងចិត្តតាំងពីឆ្នាំ២០២១៦ គឺកីឡាករ អ៊ុំ សិរីរ័ត្ន និងឈិន ឈឿន»។ ពេញចិត្តកីឡាករទាំងពីររូបនេះ ក៏ព្រោះពិធីការិនីវ័យ ២២ឆ្នាំរូបនេះមើលឃើញថា សិរីរ័ត្ន និង ឈឿន មានលក្ខណៈសម្បត្តិស្លូតបូត។
កញ្ញា ពិន មនីនាថ អត្ថាធិប្បាយបាល់ទាត់ក្នុងកីឡដ្ឋានហនុមាន។ រូបពី Yi Xing
ជម្នះឧបសគ្គគ្រួសារ
ក្នុងវិថីជាអ្នកនិយាយកីឡាបាល់ទាត់ កញ្ញាវ័យក្មេងជាអ្នកស្រុកនៅតំបន់អង្គរ ថាការមកធ្វើជាពិធីការិនីនិយាយបាល់ទាត់ ត្រូវបានម្តាយហាមប្រាមដែរ តែព្រោះក្តីស្រឡាញ់ទើបជម្នះឧបសគ្គដើម្បីឆ្វេងយល់បន្ថែមពីអាជីពប្រើមាត់មួយនេះ។ មិនថាតែនៅក្នុងខេត្តសៀមរាបនោះទេ អ៊ីហ្ស៊ីង តែងតែខិតខំសួរនាំរៀមច្បង ដែលជាអ្នកមានបទពិសោធនៅទីក្រុងភ្នំពេញអំពីការអត្ថាធិប្បាយបន្ថែមទៀតផងដែរ។ «ពីដំបូងគាត់អត់ដែលឱ្យធ្វើដែរ តែដល់ពេលឃើញយើងមានទេព្យកោសល និងមានប្រជាប្រិយភាពគាត់ក៏ងាកមកគាំទ្រយើងវិញ»។
ការហាមប្រាមដោយទឹកចិត្តម្តាយតែងតែគិត និងព្រួយបារម្ភពីសុវត្ថិភាពរបស់កូនស្រី តែដល់ពេលបច្ចុប្បន្នគ្រួសាររបស់ មនីនាថ តែងតែមកមើល និងលើកទឹកចិត្តកូនស្រីដល់កីឡដ្ឋានផ្ទាល់ទៀតផង។ នារីវ័យក្មេងបន្តថាសម្រាប់គ្រួសាររបស់កញ្ញាក៏ទទួលបានការ គាំទ្រពីមជ្ឈដ្ឋានជុំវិញខ្លួនក៏ដូចជា មហាជននៅលើបណ្តាញសង្គមផងដែរ បន្ទាប់ពីបាន ឃើញជាមួយនឹងទេពកោសល្យរបស់នាង។
មិនរំពឹងថានឹងបន្តជាមួយអាជីពអត្ថាធិប្បាយ
យ៉ាងណា ចំពោះថ្ងៃខាងមុខបែបណានោះ កញ្ញាមានសម្រស់ស្រស់ស្អាត និងរាងដ៏តូចច្រឡឹងរូបនេះ មិនហ៊ានធានាថាខ្លួនអាចនឹងបន្តលើអាជីព ជាពិធីការិនីអត្ថាធិប្បាយកីឡា បាល់ទាត់ទៀតនោះទេ តែបើសម្រាប់ក្តីស្រលាញ់លើវិថីមួយនេះ គឺមិនអាចកាត់ថ្លៃបាន។ «សម្រាប់វិស័យបាល់ទាត់ ក្នុងនាមជាអ្នកអត្ថាធិប្បាយ ទៅថ្ងៃមុខខ្ញុំមិនអាចនិយាយមុនបាន ទេ ព្រោះថា អាចថាខ្ញុំមានការងាររវល់ប្រកបរបផ្សេងអីក៏អាចថាបាន ដែលយើងអត់អាចមើលឃើញ»។
កញ្ញា ពិន មនីនាថ ពេលអត្ថាធិប្បាយបាល់ទាត់នៅក្លិបបាល់ទាត់អង្គរថាយហ្គឺរ។ រូបពី Yi Xing
ជាមួយនឹងការងារជាពិធីការិនីបច្ចុប្បន្ន មិនសូវជារវល់ច្រើនទេសម្រាប់កញ្ញា ពិន មនីនាថ ដោយសារការប្រកួតលីគកំពូលកម្ពុជា ទើបចាប់ផ្តើម។ ហើយមួយវិញទៀត រដូវកាលពានរង្វាន់ ហ៊ុន សែន ខាប់ និងពានរង្វាន់យុវជនមិនទាន់ចូលមកដល់។ ក្រៅពីការងារជាអ្នកអត្ថាធិប្បាយកីឡាបាល់ទាត់ ហ្ស៊ីងហ្ស៊ីង ក៏រវល់ជាមួយកិច្ចការផ្ទះផងដែរដោយត្រូវជួយលក់ដូរម្តាយបន្តិចបន្តួចនៅផ្ទះ ក្នុងខេត្តសៀមរាប។
ក្នុងរយៈពេលជិតបួនឆ្នាំ លើវិស័យបាល់ទាត់ក្នុងស្រុក កញ្ញា អ៊ីហ្ស៊ីង ដែលគេស្គាល់ថាជាកញ្ញារូបស្រស់ខ្លួនតូចសម្លេងធំ មើលឃើញពីភាពរុងរឿងនៃវិស័យបាល់ទាត់ ក្នុងប្រទេស កម្ពុជា ក៏ដូចជាអ្នកគាំទ្រចាប់ផ្តើមកើនឡើងជាខ្លាំងមួយរយៈចុងក្រោយនេះ ហើយអ្នកគាំទ្រក្លិបបាល់ទាត់អង្គរថាយហ្គឺររូបនេះ ក៏រំពឹងថាមហាជននឹងនៅតែបន្តគាំទ្របាល់ទាត់ កម្ពុជា ក៏ដូចជាលីគកំពូលកម្ពុជាផងដែរ។
កញ្ញា មនីនាថ និយាយថា៖ «ពីមុនអាចនិយាយបានថា មិនសូវមានអ្នកចាប់អារម្មណ៍ ក៏ ប៉ុន្តែឥឡូវនេះសង្កេតឃើញថា ទាំងជម្រើសជាតិទាំងលីគកំពូលទាំងពានរង្វាន់ផ្សេង មាន សំទុះកើនឡើងច្រើនមែនទែន»។ យ៉ាងណាជាចុងក្រោយកញ្ញា ពិន មនីនាថ ក៏សំណូមពរ ទៅកាន់មហាជនផងដែរ បើស្រលាញ់កីឡាបាល់ទាត់ជម្រើសជាតិ សូមកុំភ្លេចជួយគាំទ្រ ការប្រកួតលីគកំពូលកម្ពុជាផង។ «បាល់ទាត់ជម្រើសជាតិខ្លាំង គឺដោយសារលីគកំពូល កម្ពុជាខ្លាំង»។ នេះជាការបន្ថែមរបស់ មនីនាថ៕