សេដ្ឋកិច្ចអន្តរជាតិ
អន្តរជាតិ
រដ្ឋាភិបាលឡាវបន្តដំឡើងប្រាក់ឈ្នួលអប្បបរមាជាង៨៣ដុល្លារដល់កម្មករ កម្មករឡាវកំពុងធ្វើការនៅរោងចក្រមួយកន្លែង។ រូបភាពពី_ KPL ។
× រដ្ឋាភិបាលឡាវបានសម្រេចដំឡើងប្រាក់ឈ្នួលអប្បបរមាពី១លាន៣០ម៉ឺនគីបដល់ ១លាន៦០ម៉ឺនគីបក្នុងមួយខែ ដោយចាប់ផ្តើមពីថ្ងៃទី១ ខែតុលា ដើម្បីសម្រាលការលំបាកសម្រាប់ប្រជាជនក្នុងបរិបទនៃការកើនឡើងថ្លៃដើមរស់នៅ។
រដ្ឋាភិបាលឡាវបានសម្រេចដំឡើងប្រាក់ឈ្នួលអប្បបរមាដល់ពលករនៅក្នុងប្រទេសនេះពី ១លាន៣០ម៉ឺនគីប(ជាង៦៦ដុល្លារ) ដល់ ១លាន៦០ម៉ឺនគីប(ជាង៨៣ដុល្លារ) ក្នុងមួយខែដោយចាប់ផ្តើមពីថ្ងៃទី១ ខែតុលា។
នេះជាការកែសម្រួលលើកទី២ចំពោះការដំឡើងប្រាក់ខែគោលនៅឡាវក្នុងរយៈពេលជិត៤ខែ។ បើតាមសេចក្តីប្រកាសរបស់ការិយាល័យនាយករដ្ឋមន្ត្រីឡាវ ការសម្រេចចិត្តនេះត្រូវបានរដ្ឋាភិបាលយល់ស្របតាំងពីកិច្ចប្រជុំប្រចាំខែកក្កដា។
ក្នុងប៉ុន្មានឆ្នាំចុងក្រោយនេះ អតិផរណាខ្ពស់ និងការធ្លាក់ចុះជាបន្តបន្ទាប់នៃតម្លៃប្រាក់គីបបានជះឥទ្ធិពលយ៉ាងខ្លាំងដល់ជីវភាពរបស់កម្មករឡាវ។
ដើម្បីកាត់បន្ថយការលំបាករបស់ប្រជាពលរដ្ឋក្នុងបរិបទនៃការកើនឡើងថ្លៃដើម នៅចុងខែមេសារដ្ឋាភិបាលឡាវក៏បានយល់ព្រមកែសម្រួលប្រាក់ឈ្នួលអប្បបរមារបស់កម្មករពី ១លាន២០ម៉ីនគីប (ជាង៦១ដុល្លារ) ដល់ ១លាន៣០ម៉ឺនគីប(ជាង៦៦ដុល្លារ)ក្នុងមួយខែ។
បំណុលបរទេសដ៏ច្រើន តម្លៃនាំចូលខ្ពស់ និងកង្វះរូបិយប័ណ្ណបរទេសបានរួមចំណែកដល់ការធ្លាក់ចុះយ៉ាងខ្លាំងនៃតម្លៃប្រាក់គីបរបស់ឡាវ។ កាលពីខែមេសាអត្រាអតិផរណារបស់ឡាវមានរហូតដល់ ៤០ភាគរយ៕
Tag:
ឡាវ
អតិផរណា
ប្រាក់ឈ្នួល
© រក្សាសិទ្ធិដោយ thmeythmey.com