សព្វថ្ងៃ ដំឡូងមីមានទីផ្សារ និងតម្លៃល្អគួរសម។ នេះជាការលើកឡើងរបស់លោក តេន ទុំ ប្រធានសហគមន៍កសិកម្មបៃតងគោកស្រុក ដែលរំពឹងថា តម្លៃដំឡូងមី នឹងបន្តឡើងទៀត ខណៈឈ្មួញថៃ និងវៀតណាម កំពុងប្រជែងគ្នាទិញពីកម្ពុជា។ 

 

លោក ​ប្រាប់សារព័ត៌មានថ្មីៗ ដូច្នេះថា៖« ឆ្នាំនេះ តម្លៃដំឡូវមីអាចបានខ្ពស់ជាងឆ្នាំមុន ក៏ព្រោះតែ ឥឡូវនេះ ខ្ញុំឃើញមានឈ្មួញថៃ ចូលមកទិញដែរ»។ ប្រធានសហគមន៍កសិកម្មបៃតងគោកស្រុក ខេត្តត្បូងឃ្មុំរូបនេះ បានពន្យល់ថា ៖«កាលណាមានឈ្មួញថៃមកចូលទិញ គឺជារឿងល្អ ព្រោះវាមានគូប្រជែងជាមួយវៀតណាម ដែលនាំឱ្យតម្លៃដំឡូងមីយើងមានការកើនឡើង»។  

 

បច្ចុប្បន្ន ដំឡូងមីស្រស់អាចលក់ចេញបានប្រមាណ៣៦០រៀលក្នុងមួយគីឡូក្រាម ធៀបនឹងឆ្នាំ២០២២ មានតម្លៃត្រឹមតែ៣២០រៀលប៉ុណ្ណោះក្នុងមួយគីឡូក្រាម។ យ៉ាងណា លោក តេន ទុំ ជឿថា ដំឡូងមីអាចឡើងថ្លៃដល់ជាង៤០០រៀលក្នុងមួយគីឡូក្រាម នៅខែតុលាខាងមុខ។

 

ក្រៅតែពីទទួលបានតម្លៃខ្ពស់ ដំឡូងមី ក៏លូតលាស់ល្អផងដែរ ដ្បិតរងផលប៉ះពាល់ដោយសារគ្រោះរាំងស្ងួត កាលពីដើមឆ្នាំក៏ដោយ។ លោក តេន ទុំ បានបញ្ជាក់ ការដាំដុះដំឡូងក្នុងឆ្នាំនេះ មិនជាបញ្ហាអ្វីនោះទេ​ ដោយរង់ចាំតែពេលប្រមូលផលប៉ុណ្ណោះ នាអំឡុងខែតុលា ឆ្នាំ២០២៣។ 

 

សហគមន៍កសិកម្មបៃតងគោកស្រុក មានសមាជិក៦៣គ្រួសារ ដែលដាំដំណាំ និងបន្លែចម្រុះ ក្នុងនោះមានអ្នកដាំដំឡូងមីប្រមាណ៦០ហិកតា។ ដោយឡែក ក្រៅពីសហគមន៍ ក៏មានពលរដ្ឋជុំវិញ ដាំដំឡូងមីប្រហែល៥ពាន់ហិកតា ទៀតដែរ។ 

 

អ្វីដែលលោក តេន ទុំ មើលឃើញ និងរំពឹងនោះក៏មិនខុសគ្នាពី លោក អឿន ណៃ ដែលជាកសិករដាំដំឡូងមី​ ៤ហិកតា នៅស្រុកជ័យសែន ខេត្តព្រះវិហារ ផងដែរ។​ លោកបានលើកឡើងថា​ ដំឡូងមីបានឡើងថ្លៃខ្ពស់រហូតដល់៣១០រៀលក្នុងមួយគីឡូក្រាម នារយៈពេលជិតមួយខែចុងក្រោយនេះ ដែលតម្លៃនេះល្មមឱ្យ លោក អាចចំណេញបានច្រើន។ 

 

លោក អឿន ណៃ ប្រាប់ដូច្នេះថា៖«ពីមុនបានតម្លៃតែ ២៥០ ទៅ២៦០រៀលទេក្នុងមួយគីឡូក្រាម តែចូលដល់ខែសីហានេះ វាឡើងបាន៣១០រៀលក្នុងមួយគីឡូក្រាម។ ដូច្នេះ វាអាចឡើងទៀត នៅខែកញ្ញា ឬតុលា»។

 

យោងតាមរបាយការណ៍របស់ក្រសួងពាណិជ្ជកម្ម ត្រឹមឆមាសទី១ ឆ្នាំ២០២៣ ការនាំចេញដំឡូងមីរបស់កម្ពុជា ទៅកាន់អន្តរជាតិមានតម្លៃជាង៣៣០លានដុល្លារ កើនឡើង១០ភាគរយ ធៀបនឹងរយៈពេលដូចគ្នាឆ្នាំ២០២២៕