កីឡាជាតិ
ជាតិ
AFC U23 Asian Cup៖ គ្រូជប៉ុន Gyotoku ត្រូវដឹកនាំ U23 កម្ពុជា ជំនួសលោក Felix
× សហព័ន្ធកីឡាបាល់ទាត់ជាតិកម្ពុជា (FFC) បានប្រកាសពីសមាសភាពកីឡាករ ២៣រូប ដែលត្រូវប្រមូលផ្ដុំហ្វឹកហាត់ ដើម្បីចូលរួមប្រកួតវគ្គជម្រុះពានរង្វាន់ទ្វីបអាស៊ី AFC Asian Cup Qatar 2024 នៅកាតា។ ការប្រកួតនឹងធ្វើនៅអារ៉ាប៊ីសាអូឌីត ពីថ្ងៃទី៦-១២ ខែកញ្ញា ឆ្នាំ២០២៣។ ក្នុងចំណោម កីឡាករទាំង ២៣រូប វិសាខា មានកីឡាករច្រើនជាងគេចំនួន៥រូប ក្រោមការដឹកនាំរបស់គ្រូបង្វឹកជនជាតិជប៉ុន លោក Koji Gyotoku។
U23 កម្ពុជា ស្ថិតក្នុងពូល J ជាមួយម្ចាស់ការពារតំណែងជើងឯក អារ៉ាប៊ីសាអូឌីត លីបង់ និង ម៉ុងហ្គោលី ក្នុងការប្រកួតព្រឹត្តិការណ៍ AFC Asian Cup Qatar 2024 វគ្គជម្រុះ ដែលចាប់ផ្ដើមពីថ្ងៃទី៦-១២ ខែកញ្ញា ឆ្នាំ២០២៣។ អារ៉ាប៊ី សាអូឌីត នឹងដឹកនាំការប្រកួតក្នុងពូល J នេះ។
គ្រូបង្វឹកជនជាតិជប៉ុន លោក Koji Gyotoku នឹងត្រូវដឹកនាំក U23 កម្ពុជា ជំនួសលោក Felix G.Dalmas ដែលជាប់ភារកិច្ចដឹកនាំក្រុមឈុតធំ ក្នុងវគ្គជម្រុះ FIFA World Cup ឆ្នាំ២០២៦ ក្នុងតំបន់អាស៊ី។ លោក Gyotoku ធ្លាប់បានដឹកនាំក្រុមជម្រើសជាតិសាលាបាល់ទាត់ជាតិបាទីអាយុក្រោម១៨ឆ្នាំ និង១៩ឆ្នាំ ផងដែរ នាពេលកន្លងមក។
មុនមកកាន់ទឹកដីកម្ពុជា លោក Gyotoku ដែលជាអតីតកីឡាករលេងឲ្យក្លិបអាល្លឺម៉ង់ Werder Bremen ពីឆ្នាំ១៩៨៧-១៩៨៩ ក៏ធ្លាប់ធ្វើជាគ្រូបង្វឹកក្រុមជម្រើសជាតិប៊ូតង់ពីឆ្នាំ២០០៨-២០០៩ និងក្រុមជម្រើសជាតិនេប៉ាល់ពីឆ្នាំ២០១៦-២០១៨ ផងដែរ។
សមាសភាពកីឡាករ U23 កម្ពុជាទាំង ២៣ ដែលត្រូវប្រមូលផ្ដុំហ្វឹកហាត់ សម្រាប់ការប្រកួតវគ្គជម្រុះ AFC U23 Asian Cup មកពី ១១ក្លិប ក្នុងនោះមាន៖
- វិសាខា មានចំនួន ៥រូប ៖ ស៊ិន សុវណ្ណមករា, សារទី, ឡេង ណូរ៉ា, ស រតនា និង ភឿក ថាតថៃ
- បឹងកេត មានចំនួន ២រូប ៖ តាំង ប៊ុនឆៃ និង កយ សាលីម
- ភ្នំពេញក្រោន មានចំនួន ១រូប គឺ កើត ពេជ្រ
- ណាហ្គាវើលដ៍ មានចំនួន ៤រូប៖ ជា សុខម៉េង, ហួត វ៉ាន់ណេត, ផាត សុខា និង រ៉េត លីហេង
- ព្រះខ័នរាជ ស្វាយរៀង មានចំនួន ៣នាក់៖ ជូ ស៊ីនទី, មិន រតនៈ និង វីរៈ ដារ៉ា
- អង្គរថាយហ្គឺរ មានចំនួន ៣នាក់៖ អ៊ីម រ៉ាឃីម, សុផល ឌីម៉ង និង សុវណ្ណ ដូណា
- គិរីវង់សុខសែនជ័យ មាន ១រូប គឺ អ៊ាន ពិសី
- ព្រៃវែង មាន ២រូប គឺ វឿន វ៉ា និង ចាន់ សារ៉ាពេជ្រ
- អាយ អេស អាយ ដង្កោសែនជ័យ ១ រូប គឺ ហាវ សុខនេត្រ
- សាលាបាល់ទាត់ជាតិបាទី មានចំនួន ១រូប គឺ អ៊ីត សូនី៕
Tag:
បាល់ទាត់
AFC Asian Cup Qatar
© រក្សាសិទ្ធិដោយ thmeythmey.com