នាទីស្នាក់ការគណៈកម្មាធិការជាតិអូឡាំពិកកម្ពុជា លោក ប៊ុយ សុភ័ណ្ឌ នៅថ្ងៃទី៧ ខែកញ្ញា បានធ្វើជាវាគ្មិនក្នុងកម្មវិធី Diversity Voyage ដែលមានសិស្សនិស្សិតកម្ពុជា និងជប៉ុន សរុបចំនួន ២៥នាក់។
 

ទីប្រឹក្សាគណៈកម្មាធិការជាតិអូឡាំពិកកម្ពុជារូបនេះ បានធ្វើបទបង្ហាញពី ភាពជោគជ័យ នៃការរៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម នាឆ្នាំ២០២៣។ ជាមួយគ្នានេះ លោក ប៊ុយ សោភ័ណ្ឌ ក៏បានបង្ហាញពីចក្ខុវិស័យ ក្នុងដំណើរឆ្ពោះទៅធ្វើជាម្ចាស់ផ្ទះព្រឹត្តិការណ៍កីឡាអូឡាំពិកយុវជនអាស៊ី លើកទី៥ នាឆ្នាំ២០២៩។

 

បន្ថែមលើសពីនេះ វាគ្មិនរូបនេះ ក៏បានចែករំលែកបទពិសោធន៍ផ្ទាល់ខ្លួន ដែលបានចូលរួមអភិវឌ្ឍ និងលើកកម្ពស់វិស័យកីឡា អស់រយៈពេលជាង ១១ឆ្នាំ។
 

លោក ប៊ុយ សោភ័ណ្ឌ បានប្រាប់សារព័ត៌មានថ្មីៗ តាមហ្វេសប៊ុកថា គោលបំណង នៃកម្មវិធីនេះ គឺដើម្បីអភិវឌ្ឍភាពជាពលរដ្ឋសកលសម្រាប់អ្នកចូលរួម និងពង្រឹងសមត្ថភាពចាំបាច់សម្រាប់ប្រជាជនដែលរស់នៅក្នុងពិភពលោកនៃសតវត្សរ៍ទី២១ តាមរយៈការសិក្សា និងបទពិសោធន៍។ កម្មវិធីនេះ ក៏ជាគោលបំណង ផ្តល់ឱកាសដល់និស្សិតកម្ពុជា និងនិស្សិតជប៉ុន ចូលរួមចំណែកលើកកម្ពស់តម្លៃកីឡាតាមរយៈការអប់រំនៅកម្ពុជា តាមរយៈការផ្លាស់ប្តូរយោបល់លើប្រធានបទសារៈសំខាន់នៃកីឡា និងគុណតម្លៃអូឡាំពិក។ 
 

និស្សិតជប៉ុនទាំងអស់នោះ បានសាទរ ចំពោះភាពជោគជ័យ នៃការធ្វើជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ហើយពួកគេ ក៏បានបង្ហាញពីការយល់ដឹងពីសារៈសំខាន់ នៃកីឡា និងគុណតម្លៃអូឡាំពិកផងដែរ។
 

គួរបញ្ជាក់ផងដែរថា កម្មវិធី “Diversity Voyage” ចាប់ផ្ដើមពីថ្ងៃទី៥-១២ ខែកញ្ញា ឆ្នាំ២០២៣។ កម្មវិធីនេះ ត្រូវបានរៀបចំឡើងដោយ អង្គការ Global Incubation X Fostering Talents (GiFT) របស់ជប៉ុន៕