មុនការប្រកួតរវាង ព្រំ សំណាង និង Dave Leduc នាថ្ងៃទី៥ ខែវិច្ឆិកា ឆ្នាំ២០២៣ កីឡាករប្រដាល់គុន Lethwei របស់មីយ៉ាន់ម៉ា បាននិយាយថា នឹងអាចផ្ទួល កីឡាករ ព្រំ សំណាង នៅត្រឹមតែ ២ នាទីដំបូងប៉ុណ្ណោះ ក្នុងការប្រកួតដែលមាន៩នាទីក្នុងមួយទឹក។ 
 

កីឡាករ Dave Leduc បានឆ្លើយតបអ្នកគាំទ្រ ទាំងមើលស្រាលដៃគូ មុនប្រកួតដូច្នេះ ៖«ខ្ញុំ អាចផ្ទួលត្រឹមតែ ២នាទីទេ ប៉ុន្ដែ ខ្ញុំ អាចប្រកួតបាន ៣០នាទី ប្រសិនជាគាត់ ចង់បាន។»។ 

ជុំវិញការលើកឡើងរបស់ Leduc បែបនេះ កីឡាករកម្ពុជា ព្រំ សំណាង បានប្រាប់សារព័ត៌មានថ្មីៗ តាមទូរស័ព្ទថា ប្រសិន ចាញ់កីឡាករសញ្ជាតិកាណាដានេះ ត្រឹមតែ២នាទីមែន រូបគេនឹងចូលនិវត្តិ ឈប់ប្រដាល់បន្ដទៀត។ កីឡាករប្រដាល់គុនខ្មែររូបនេះ បង្ហាញការ តាំងចិត្តលះបង់ដើម្បីគុនខ្មែរ និងអ្នកគាំទ្រកម្ពុជា ទាំងអស់។ សំណាង ក៏សង្ឃឹមកីឡាករមីយ៉ាន់ម៉ារូបនេះ នឹងធ្វើបានដូចមាត់ ដោយអំឡុងពេលប្រកួត កុំព្យាយាមវាយ ដកថយ និងរត់ពេញសង្វៀន។
 

«សូមវ៉ៃឲ្យខ្លាំង ដូចមាត់គាត់និយាយ។ កុំ បានតែនិយាយ! ដល់តែពេលប្រកួត វ៉ៃរត់ៗ។ ខ្ញុំ ចង់ប្រាប់គាត់ថា វ៉ៃឲ្យខ្លាំងដូចមាត់គាត់។ ប្រសិនជា ២នាទីផ្ទួល ខ្ញុំ បានមែន ខ្ញុំ ឈប់ប្រកួត។ ខ្ញុំ វាយមួយប្រកួតនេះ បូជាខ្លួនដើម្បីប្រជាជនខ្ញុំ និងគុនខ្មែរ។ ខ្ញុំ នឹងធ្វើឲ្យបាន។»។ កីឡាករ ព្រំ សំណាង បាននិយាយដូច្នេះ។
 

គួរបញ្ជាក់ផងដែរថា ការប្រកួតរវាងកីឡាករទាំង២នេះ គឺរុំអំបោះឆៅ និងវាយតែ១តឹកប៉ុណ្ណោះ ក្នុងរយៈពេល ៩នាទី ។ ការប្រកួត គ្រោងនឹងធ្វើនៅថ្ងៃទី៥ ខែវិច្ឆិកា ឆ្នាំ២០២៣ នៅរាជធានីភ្នំពេញ៕