ព្រះសីហនុ៖ អង្គការអុកស្វាម និងអង្គការដៃគូ បានសហការរៀបចំវេទិកាប្រចាំឆ្នាំថ្នាក់តំបន់ រវាងបេឡាជាតិសន្តិសុខសង្គម ជាមួយថ្នាក់ដឹកនាំមូលដ្ឋាន និងតំណាងកម្មករនិយោជិត នៅថ្ងៃទី១៧ ខែកញ្ញានេះ នៅសណ្ឋាការឯករាជ្យ ខេត្តព្រះសីហនុ។ វេទិកាប្រព្រឹត្តទៅក្រោមប្រធានបទ« ដំណើរឆ្ពោះទៅរបបសន្តិសុខសង្គម ប្រកបដោយបរិយាបន្ន ឆ្លើយតបយេនឌ័រ និងជាសកលនៅកម្ពុជា» ។
វេទិកានេះរៀបចំឡើងក្នុងគោលបំណង ដើម្បីស្វែងយល់ពីបញ្ហាប្រឈម និងត្រឹះរិះ ស្វែងរកដំណោះស្រាយ រវាងអ្នកឯកទេស អ្នកតាក់តែងគោលនយោបាយ និងអ្នកផ្តល់សេវាក្នុងក្របខណ្ឌរបបសន្តិសុខសង្គម ជាមួយថ្នាក់ដឹកនាំមូលដ្ឋាន និងតំណាងកម្មករ និយោជិត ក្នុងន័យដើម្បីជំរុញកម្ពុជាឱ្យឆ្ពោះទៅរកប្រព័ន្ធគាំពារសង្គម ប្រកបដោយបរិយាបន្ន ឆ្លើយតបយេនឌ័រ និងជាសកល។
ក្នុងកម្មវិធី លោកស្រី សុខ ច័ន្ទឆវី ប្រធានកម្មវិធីនៃអង្គការអុកស្វាមប្រចាំកម្ពុជា បានលើកឡើងពីវឌ្ឍនភាពដ៏ល្អ នៃការអនុវត្តគោលនយោបាយគាំពារសង្គម របស់រាជរដ្ឋាភិបាលកម្ពុជា ដើម្បីកាត់បន្ថយភាពក្រីក្រ លើកកម្ពស់សុខុមាលភាពប្រជាពលរដ្ឋ ពិសេសនៅក្នុងអំឡុងពេលនៃវិបត្តិកូវីដ-១៩។ លោកស្រី សុខ ច័ន្ទឆវី គូសបញ្ជាក់ដូច្នេះថា៖«កិច្ចគាំពារសង្គម គឺជាយុទ្ធសាស្ត្រ និងវិធានការដ៏ចាំបាច់ ដែលចូលរួមចំណែកក្នុងការលូតលាស់កំណើនសេដ្ឋកិច្ច បង្កើតសុខុមាលភាព និងសាមគ្គីភាព បង្កើនធនធានមនុស្សប្រកបដោយគុណភាព និងសមភាពយេនឌ័រ ដោយទប់ស្កាត់ការធ្លាក់ចូលទៅក្នុងការភាពក្រីក្រកម្រិតធ្ងន់ធ្ងរ និងគម្លាតនៅក្នុងសង្គម»។
លោកស្រី សុខ ច័ន្ទឆវី ប្រធានកម្មវិធីអង្គការអុកស្វាម
យ៉ាងណាក៏ដោយ តំណាងអង្គការអុកស្វាមរូបនេះ ក៏មើលឃើញដែរថា នៅមានការងារ និងបញ្ហាប្រឈមមួយចំនួន ដែលទាមទារឱ្យមានការសហការគ្នា ដោះស្រាយ ដើម្បីឈានទៅការពង្រីកវិសាលភាព និងចីរភាពនៃគោលនយោបាយគាំពារសង្គម។ សម្រាប់អ្នកស្រី សុខ ច័ន្ទឆវី អាទិភាពទាំងនោះរួមមានយន្តការជំរុញ និងតាមដានការចុះបញ្ជី, ការពង្រីកការទទួលបានបណ្ណសមាជិក ប.ស.ស ប្រព័ន្ធគាំពារសង្គមឌីជីថល , ការផ្តល់កិច្ចគាំពារផ្នែកមាតុភាពពេញលេញ, ការពង្រឹងការយល់ដឹងរបស់ប្រជាពលរដ្ឋ, ការពង្រីកយន្តការគណនេយ្យភាពសង្គម និងយន្តការផ្តល់យោបល់ ការពិនិត្យលទ្ធភាព និងការបង្កើនការវិនិយោគ ដើម្បីជួយដល់អ្នកដែលត្រូវការគាំទ្រជាពិសេសជាដើម។
លោក លៀង ពន្លក ប្រធាននាយកដ្ឋានគោលនយោបាយសន្តិសុខសង្គម នៃបេឡាជាតិសន្តិសុខសង្គម បានឱ្យដឹងថា បច្ចុប្បន្នសេវាបេឡាជាតិសន្តិសុខសង្គម គ្របដណ្តប់បានប្រមាណ ៣៨ភាគរយ នៃកម្លាំងពលកម្មសរុបប្រមាណ ៧.៩លាននាក់ (តាមរបាយការណ៍របស់អង្គការ ILO)។ លោក លៀង ពន្លក បន្តអះអាងថា នឹងបន្តជំរុញឱ្យ សេវា ប.ស.ស ឱ្យអាចគ្របដណ្តប់ដល់ ៨០ ភាគរយ ឬស្មើនឹងកម្លាំងពលកម្ម ប្រមាណ ៧លាននាក់ នៃកម្លាំងពលកម្មដែលមាន។
លោក លៀង ពន្លក ប្រធាននាយកដ្ឋានគោលនយោបាយសន្តិសុខសង្គម នៃបេឡាជាតិសន្តិសុខសង្គម
«យើងក៏នឹងសម្រេចឱ្យបានដែរ គឺការពង្រឹង ពង្រីកសមត្ថភាពនៃការផ្តល់សេវា ប.ស.ស ដើម្បីធ្វើផ្តល់សេវាណាឱ្យឆ្លើយតបតម្រូវការដល់សមាជិកប.ស.ស។ ហើយយើងក៏នឹងខិតខំប្រឹងប្រែងក្នុងការធានា និរន្តរភាពមូលនិធិសមធម៌ ដើម្បីផ្តល់ការគាំពារដល់សមាជិកបានយូរអង្វែង»។ នេះបើតាមលោក លៀង ពន្លក ដោយលោកបានបញ្ជាក់បន្ថែមថា គិតត្រឹមខែសីហា ឆ្នាំ២០២៣នេះ ការចុះបញ្ជិការសមាជិក ប.ស.ស មានចំនួន ៣ ១៦០ ០០០នាក់។ ដោយឡែកគិតត្រឹមថ្ងៃទី៨ ខែកញ្ញា នេះ ប.ស.ស បានបើកប្រាក់ឧបត្ថម្ភដល់ស្ត្រីមានផ្ទៃពោះ និងស្រី្តជាម្តាយ ព្រមទាំងកុមារអាយុក្រោម២ឆ្នាំ បានជិត ៥.៥ម៉ឺននាក់ ដែលមានទឹកប្រាក់ស្មើនឹងប្រមាណ ៥លានដុល្លារ។
តាមរយៈវេទិកាប្រចាំឆ្នាំថ្នាក់តំបន់នាពេលនេះ ប្រធានកម្មវិធីនៃអង្គការអុកស្វាម លោកស្រី សុខ ច័ន្ទឆវី សង្ឃឹមថា ភាគីពាក់ព័ន្ធនឹងបន្តរួមសហការជំរុញឱ្យការរៀបចំកិច្ចគាំពារសង្គមនេះ មានបរិយាបន្ន និងឆ្លើយតបនឹងតម្រូវការយេនឌ័រ ៕