ឆ្លើយតបការរិះគន់នេះ អ្នកនាំពាក្យក្រសួងមហាផ្ទៃ អះអាងថា ការតែងតាំង និងដំឡើងឋានន្តរស័ក្តិដល់លោក ច័ន្ទវិចិត្រ គឺត្រឹមត្រូវស្របតាមលក្ខខណ្ឌមន្ត្រីនគរបាលជាតិ។ អ្នកនាំពាក្យក្រសួងមហាផ្ទៃ បកស្រាយទៀតថា បុគ្គលរូបនេះ មានលក្ខណសម្បត្តិគ្រប់គ្រាន់ ក្នុងការទទួលបានតួនាទី និងមុខតំណែង ស្របតាមលក្ខខណ្ឌ ដោយរូបគេមានការគោរពវិន័យ មានក្រមសីលធម៌ មានសមត្ថភាពបំពេញការងារ ចេះទំនាក់ទំនង និងមានចំណេះដឹង។
 

អ្នកនាំពាក្យក្រសួងមហាផ្ទៃ បានចេញសេចក្តីបំភ្លឺការពារជំហរលើការសម្រេចចិត្តតែងតាំង និងដំឡើងឋានៈដល់មន្ត្រីនគរបាល កាលពីថ្ងៃទី២១ កញ្ញា ដូច្នេះថា៖« ក្នុងករណីមន្ត្រីនគរបាលជាតិរូបណាម្នាក់ បានបំពេញការងារមានស្នាដៃល្អពិសេស ត្រូវបានដំឡើងឋានន្តរស័ក្តិមួយថ្នាក់ ដោយពុំគិតពីលក្ខខណ្ឌ និងអតីតភាពឡើយ»។
 

លោក ឡេង ច័ន្ទវិចិត្រ បានបញ្ចប់ការសិក្សាថ្នាក់បរិញ្ញាបត្រពាណិជ្ជសាស្រ្ត និងបានបញ្ចប់វគ្គសិក្សាបណ្ដុះបណ្ដាលកម្រិតបឋមវិជ្ជាជីវៈនគរបាល តាមការកំណត់របស់ក្រសួងមហាផ្ទៃ។ មុននឹងជាប់ក្របខណ្ដជាមន្ត្រីនគរបាលផ្នែកសន្តិសុខសាធារណៈ មន្ត្រីរូបនេះ ធ្លាប់ជាមន្រ្តីកិច្ចសន្យាផែនការសេដ្ឋកិច្ច និងហិរញ្ញវត្ថុ ផ្នែករដ្ឋបាលទូទៅ នៃអគ្គនាយកដ្ឋានភស្តុភារ និងហិរញ្ញវត្ថុ នៃក្រសួងមហាផ្ទៃ តាំងពីឆ្នាំ២០១៦មក។ នេះបើតាមក្រសួងមហាផ្ទៃ ដែលប្រើសិទ្ធិការពារខ្លួនស្របតាមច្បាប់ ក្នុងការបកស្រាយឆ្លើយតប ទៅនឹងការចុះផ្សាយនានា ដែលក្រសួងចាត់ទុកថា ផ្ទុយពីការពិត។
 

ជាមួយគ្នានេះ អ្នកនាំពាក្យដដែល អះអាងថា ក្រសួងមហាផ្ទៃ កំពុងកំណែទម្រង់ ដើម្បីប្រសិទ្ធភាពក្នុងការបម្រើឧត្តមប្រយោជន៍ដល់ប្រជាពលរដ្ឋ ស្របតាមគោលនយោបាយយុទ្ធសាស្ត្របញ្ចកោណ ដំណាក់កាលទី១៕