ជាតិ
លោក ហ៊ុន ម៉ានី ប្រាប់សមាជិក ស.ស.យ.ក កុំចោលកិច្ចការសង្គម... លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា។ រូបភាពពីសសយក
× ភ្នំពេញ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានប្រាប់ដល់សមាជិកស.ស.យ.ក កុំចោលកិច្ចការសង្គម។ សម្រាប់លោក ហ៊ុន ម៉ានី ការងារសង្គម ជាការបង្ហាញនូវភាពជាគំរូ ទោះធ្វើតិចក្ដីច្រើនក្ដី តែជាការរួមចំណែកដល់សង្គមជាតិកម្ពុជា។
នាពិធីសំណេះសំណាលជាមួយសមាជិកស.ស.យ.ក តាមវិស័យ និងរចនាសម្ព័ន្ធចំណុះ នៅថ្ងៃទី២៣ កញ្ញានេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកទឹកចិត្តដល់សមាជិកឱ្យខិតខំបំពេញភារកិច្ច និងហ្វឹកហាត់សមត្ថភាពបន្ថែមទៀត។ លោក ម៉ានី ក៏មិនភ្លេចរំឭកដល់សមាជិករបស់លោក ឱ្យចូលរួមការងារសង្គមផងដែរ។
«ខ្ញុំដឹងថា ម្នាក់ៗមានការងារច្រើនណាស់។ ការងារស្នូលផង ក្រុមគ្រួសារផង និងកិច្ចការដទៃបន្ថែមទៀត។ ដូច្នេះមិនមានពេលគិតគូរ និងលះបង់ដើម្បីសង្គមជាតិ តាមរយៈការងារសង្គមអ្វីទេ។ ខ្ញុំដឹង ខ្ញុំយល់...។ តែខ្ញុំសុំមួយ កុំចោលកិច្ចការសង្គម»។ នេះជាការផ្ដាំផ្ញើរបស់លោក ហ៊ុន ម៉ានី ទៅកាន់សមាជិកស.ស.យ.ក នៅតាមវិស័យនានាប្រមាណ ៤០០នាក់ នាអគារខេមរានី។
ហេតុអ្វីកិច្ចការងារសង្គមសំខាន់? លោក ហ៊ុន ម៉ានី ថ្លែងពីលើវេទិកាថា ការងារសង្គម គឺជាការបង្ហាញនូវភាពជាគំរូ ដោយលោកលើកឧទាហរណ៍ពីការកកើតនៃភាសាបេះដូងដែលបង្ហាញពីកម្ពុជា តាមរយៈការធ្វើដៃរូបបេះដូងជាសញ្ញា។ ក្រៅពីបង្ហាញភាពជាគំរូ ការធ្វើកិច្ចការសង្គម ក៏ជាផ្នែកមួយផ្លាស់ប្ដូរផ្នត់គំនិតសង្គមតាមរយៈសកម្មភាពជាក់លាក់ណាមួយផងដែរ។
ប្រធានស.ស.យ.ក រូបនេះ បន្តមានប្រសាសន៍បែបនេះ៖«បើខ្ញុំ មិនមានស.ស.យ.ក មកដល់ពេលនេះ គេនៅតែស្គាល់ហ៊ុន ម៉ានី ជាកូនតេជោ ហ៊ុន សែន។ ដោយសារតែស.ស.យ.ក នេះហើយ បានគេចាប់ផ្ដើមស្គាល់ ហ៊ុន ម៉ានី ដែលមានការងារ សកម្មភាព និងស្នាដៃខ្លួនឯង។ បើអត់ស.ស.យ.ក គេអត់ស្គាល់ទេ»។
សូមបញ្ជាក់ថា សហភាពសហព័ន្ធយុវជនកម្ពុជា ជាស្ថាប័នមួយដែលតែងចូលរួមលើកិច្ចការងារសង្គម តាមរយៈការស្ម័គ្រចិត្ត។ គិតមកដល់ឆ្នាំ២០២៣នេះ ស.ស.យ.ក ដែលបន្តសកម្មភាពសមាគមយុវជនកម្ពុជា និងសមាគមយុវជនសាមគ្គីសង្គ្រោះជាតិកម្ពុជា មានអាយុ ៤៥ឆ្នាំហើយ៕
© រក្សាសិទ្ធិដោយ thmeythmey.com