ជាតិ
វីដេអូ
ការគិតគូរពីសុវត្ថិភាពម្ហូបអាហារលើការកែច្នៃជលផល ចំណេញទាំងអ្នកផលិត និងអ្នកហូប
× ភ្នំពេញ៖ ការធានាសុវត្ថិភាព និងអនាម័យម្ហូបអាហារ មានសារៈសំខាន់ ក្នុងការជួយការពារសុខភាពអ្នក ទទួលទានពីជំងឺ ដែលបង្កដោយអាហារ ឬការពុលអាហារជាដើម។ សុវត្ថិភាពម្ហូបអាហារជាចំណុចមួយ ដែលពលរដ្ឋគ្រប់រូបត្រូវបង្កើនការយកចិត្តទុកដាក់។
អ្នកស្រី ឌី សុម៉េង ម្ចាស់សិប្បកម្មផលិតត្រីងៀត សួង សោភ័ណ នៅក្នុងស្រុកស្ទោង ខេត្តកំពង់ធំ បាន ផ្លាស់ប្ដូរការធ្វើបែបបុរាណ ដែលមិនមានអនាម័យមកតាមលក្ខណៈស្ដង់ដារសុវត្ថិភាពវិញ។ មុននឹង ទទួលបានភាពស្អាត និងមានការទទួលស្គាល់ អ្នកស្រី ឌី សុម៉េង និងស្វាមី បានជួបផលលំបាកជាច្រើន។
«ពិបាកណាស់ ព្រោះកន្លែងខ្ញុំពីមុន គ្រាន់តែចាក់សាប និងរៀបចំធម្មតា។ ប៉ុន្តែពេលនេះ យើងបានកែប្រែ សូម្បីតែបុគ្គលិកយើងដែលធ្លាប់តែធ្វើតាមបែបបុរាណ ក៏គាត់ផ្លាស់ប្ដូរ»។ នេះជាការលើកឡើងរបស់អ្នកស្រី សុម៉េង។
ការយកចិត្តទុកលើសុវត្ថិភាពម្ហូបអាហារ បានធ្វើឱ្យអាជីវកម្មកែច្នៃជលផលរបស់អ្នកស្រី សុម៉េង កាន់តែ មានកេរ្តិ៍ឈ្មោះ។ បើតាមម្ចាស់សិប្បកម្ម ការផលិតត្រីងៀតដែលមានសុវត្ថិភាពដល់អ្នកទទួលទាន គឺជា ការផ្ដល់ទំនុកដ៏ចម្បង។ អ្នកស្រី សុម៉េង បញ្ជាក់ដូច្នេះ៖ «ពីដើម ហាលត្រីនៅបរិយាកាសខាងក្រៅ មានសត្វល្អិតរំខាន។ ពេលរដូវភ្លៀងក៏ពិបាកដែរ តែឥឡូវខ្ញុំ និងស្វាមី ចាប់ផ្ដើមគិតពីសុវត្ថិភាពម្ហូបអាហារ ដើម្បីផ្ដល់ទំនុកចិត្តដល់អ្នកលក់ដូរ និងអ្នកទទួលទាន»។
សិប្បកម្មផលិតត្រីងៀត សួង សោភ័ណ នៅក្នុងស្រុកស្ទោង ខេត្តកំពង់ធំ
តាមរយៈការផ្លាស់ប្ដូរដែលចំណាយពេល១៣ខែរបស់សិប្បកម្មផលិតត្រីងៀត សួង សោភ័ណ កញ្ញា អ៊ឹម រចនា អ្នកនាំពាក្យក្រសួងកសិកម្ម មើលឃើញថាជាការផ្លាស់ប្ដូរដ៏មានប្រសិទ្ធភាពប្រកបដោយអនាម័យ និងស្ដង់ដារ។ កញ្ញា អ៊ឹម រចនា លើកឡើងថា៖ «នៅពេលមានការកែលម្អផលិតកម្មដែលមានលក្ខណៈប្រពៃណីមកជាលក្ខណៈស្ដង់ដារនេះ ជាការកែប្រែដ៏សំខាន់ និងមានលក្ខណៈវិជ្ជមាន គួរតែលើកទឹកចិត្ត និងកោតសរសើរ»។
សិប្បកម្មផលិតត្រីងៀត សួង សោភ័ណ នៅក្នុងស្រុកស្ទោង ខេត្តកំពង់ធំ
តាមរយៈគម្រោងអភិវឌ្ឍន៍ជលផលក្រោយប្រមូលផល ដែលជាផ្នែកមួយនៃកម្មវិធី CAPFISH បានផ្ដោតសំខាន់លើការពង្រឹងសមត្ថភាពវិស័យឯកជន ដើម្បីឱ្យមានលទ្ធភាពអនុវត្តតាមស្ដង់ដារសុវត្ថិភាពម្ហូបអាហារ។ លោក ថោង រ៉ា អ្នកជំនាញសុវត្ថិភាពម្ហូបអាហាររបស់អង្គការយូនីដូ លើកឡើងពីការជំរុញសុវត្ថិភាពសម្ហូបអាហារយ៉ាងដូច្នេះ៖«យើងឃើញថាបញ្ហាសុវត្ថិភាពចំណីអាហារ ជាបញ្ហាសុខភាពសាធារណៈ ហើយមានជំងឺច្រើនជាង ២០០ប្រភេទ ដែលអាចកើតចេញពីការបរិភោគអាហារពុំមានសុវត្ថិភាព»។ ជាក់ស្ដែងបច្ចុប្បន្ននេះ UNIDO កំពុងគាំទ្រដល់ម្ចាស់សិប្បកម្មផលិតត្រីងៀត សួង សោភ័ណ ក្នុងការកែប្រែការកែច្នៃឱ្យស្របតាមតម្រូវការអប្បបរមាស្ដង់ដារ CQS។
សិប្បកម្មផលិតត្រីងៀត សួង សោភ័ណ នៅក្នុងស្រុកស្ទោង ខេត្តកំពង់ធំ
សូមបញ្ជាក់ថា គម្រោងអភិវឌ្ឍន៍ជលផលក្រោយប្រមូលផល CAPFISH ជាគម្រោងសហការផ្ដល់មូលនិធិដោយសហភាពអឺរ៉ុប និងអនុវត្តដោយរដ្ឋបាលជលផល និងអង្គការយូនីដូ។ តាមរយៈកម្មវិធីគាំទ្រសហគ្រាសជលផលខ្នាតតូច និងមធ្យម របស់គម្រោង CAPFISH បានគាំទ្រដល់សហគ្រាសជលផលចំនួន ២៨ ក្នុងការធ្វើទំនើបកម្មប្រតិបត្តិការអាជីវកម្ម៕
Tag:
សុវត្ថិភាពម្ហូបអាហារ
កសិកម្ម
ត្រីងៀត
© រក្សាសិទ្ធិដោយ thmeythmey.com