ជាតិ
កម្ពុជា ស្វាគមន៍កិច្ចសហការនាំចូលជីកសិកម្មពីរុស្ស៊ី និងនាំកសិផលចេញទៅវិញ លោក ឌិត ទីណា រដ្ឋមន្រ្តីក្រសួងកសិកម្ម (ឆ្វេង) និងលោក អាណាតូលី បូរ៉ូវីក (Anatoly BOROVIK) ឯកអគ្គរដ្ឋទូតរុស្ស៊ីប្រចាំកម្ពុជា។ រូបភាព៖ក្រសួងកសិកម្ម
× ភ្នំពេញ៖ កម្ពុជា ស្វាគមន៍ចំពោះកិច្ចសហប្រតិបត្តិការរវាងកម្ពុជា-រុស្ស៊ី លើវិស័យកសិកម្ម ផ្តោតសំខាន់លើការជំរុញពាណិជ្ជកម្មកសិកម្ម ជាអាទិ៍ការនាំជីកសិកម្មពីរុស្ស៊ីមកកម្ពុជា និងការនាំចេញផលិតផលកសិកម្មរបស់កម្ពុជា ទៅកាន់ទីផ្សារប្រទេសរុស្ស៊ី។ ឱកាសនៃការបើកច្រកទីផ្សារកសិកម្មរបស់កម្ពុជានៅរុស្ស៊ីនេះ ត្រូវបានលើកឡើងដោយ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបជាមួយ លោក អាណាតូលី បូរ៉ូវីក (Anatoly BOROVIK) ឯកអគ្គរដ្ឋទូតរុស្ស៊ីប្រចាំកម្ពុជា នៅថ្ងៃទី ២៦ ខែកញ្ញា។
លោក អួន ស៊ីឡុត ប្រធានសមាគមស្វាយចន្ទីកម្ពុជា គាំទ្រចំពោះកិច្ចសហប្រតិបត្តិការនេះ ដោយហេតុថា រុស្ស៊ីជាប្រទេសផលិតជីកសិកម្មដ៏ធំមួយនៅលើពិភពលោក ខណៈជម្លោះជាមួយ អ៊ុយក្រែន បានធ្វើឱ្យតម្លៃជីក្នុងប្រទេសកម្ពុជា ក៏ដូចជាពិភពលោកហក់ឡើងខ្ពស់។ ប្រសិនបើកម្ពុជាអាចនាំចូលជីពីរុស្ស៊ីដោយផ្ទាល់បាន វានឹងជួយកាត់បន្ថយការចំណាយលើ ថ្លៃដើមផលិតរបស់កសិករ។
លោក អួន ស៊ីឡុត បន្ថែមដូច្នេះថា៖ «ការធ្វើកិច្ចសហប្រតិបត្តិការពាណិជ្ជកម្មនេះ គឺជារឿងល្អ ព្រោះថា រុស្ស៊ីជាប្រទេសផលិតជី និងមេជី ដ៏ធំមួយនៅលើពិភពលោក។ សូម្បីតែ រោងចក្ររបស់បណ្ដាប្រទេសលោកខាងលិច ដែលនៅវៀតណាម ថៃ ក៏ត្រូវទិញមេជីពីរុស្ស៊ីទាំងអស់។ តាំងពីមានសង្រ្គាមជាមួយអ៊ុយក្រែនមក បណ្ដាប្រទេសលោកខាងលិចទាំងនោះ អត់ទិញ ជីពីរុស្ស៊ីទេ ដូច្នេះ វាបានធ្វើឱ្យជីឡើងថ្លៃ»។
បើតាមប្រធានសមាគមស្វាយចន្ទី មុនវិបត្តិសង្រ្គាមរុស្ស៊ី-អ៊ុយក្រែន ជីមានតម្លៃ ៤៩០ដុល្លារ ប៉ុណ្ណោះ ក្នុងមួយតោនប៉ុន្តែពេលនេះ តម្លៃជីបានកើនដល់ ៧២៥ដុល្លារ ក្នុងមួយតោន។ បញ្ហានេះ កំពុងធ្វើឱ្យកសិករត្អូញត្អែរពីមាត់មួយទៅមាត់មួយ ហើយអ្នកខ្លះរងការខាតបង់ រហូតបោះបង់ របរកសិកម្មចោលតែម្ដង។ ប្រធានសមាគមស្វាយចន្ទីកម្ពុជា បាន ជំរុញឱ្យក្រសួងកសិកម្ម ពន្លឿនការងារឱ្យបានឆាប់រហ័ស ដើម្បីដោះស្រាយបញ្ហាកសិករទាន់ពេលវេលា។
ចំពោះការនាំចូលផលិតផលកសិកម្មកម្ពុជាទៅរុស្ស៊ីវិញ លោក អួន ស៊ីឡុត យល់ឃើញថា មានសញ្ញាវិជ្ជមានជាច្រើន ដោយសារតែរុស្ស៊ី មានទីផ្សារធំ ខណៈផលិតផលកសិកម្មលេចធ្លារបស់គេ មានតែស្រូវសាលីប៉ុណ្ណោះ។ ដោយឡែក គ្រឿងទេស និងផលិតកសិកម្មផ្សេងទៀត មិនសូវសម្បូរ ដូច្នេះប្រសិនបើ កសិផលកម្ពុជាអាចបង្ហាញខ្លួននៅទីផ្សាររុស្ស៊ីបាន វានឹងអាចជួយធ្វើពិពិធកម្មទីផ្សារកសិកម្មកម្ពុជា កាន់តែច្រើន៕
Tag:
ជីកសិកម្ម
កម្ពុជា-រុស្ស៊ី
ឌិត ទីណា
អាណាតូលី បូរ៉ូវីក
© រក្សាសិទ្ធិដោយ thmeythmey.com