ចំនួនប្រជាជនរបស់សិង្ហបុរីបានកើនឡើង៥ភាគរយ ខណៈដែលជនបរទេសដែលធ្វើការក្នុងប្រទេសនេះបានវិលត្រឡប់ទៅវិញបន្ទាប់ពីជំងឺរាលដាលកូវីដ-១៩។
ប្រជាជន៥,៩លាននាក់នៅសិង្ហបុរីគិតត្រឹមខែមិថុនា ដោយកើនឡើងពី៥,៦លាននាក់កាលពីខែមិថុនាឆ្នាំមុន។ ក្នុងនោះ ៦១ភាគរយជាជនជាតិសិង្ហបុរី ៩ភាគរយជាអ្នកស្នាក់នៅអចិន្ត្រៃយ៍ និង ៣០ភាគរយជាជនបរទេសធ្វើការ ឬសិក្សានៅក្នុងប្រទេស។ អ្នកធ្វើការបរទេសចំនួន១៦២,០០០នាក់ ចូលសិង្ហបុរីចាប់ពីខែមិថុនាឆ្នាំ២០២២ ដល់ខែមិថុនា ឆ្នាំនេះ។
បើតាមនាយកដ្ឋានចំនួនប្រជាជន និងទេពកោសល្យជាតិ ការកើនឡើងដ៏ធំបំផុតបានមកពីកម្មករក្នុងវិស័យសំណង់ រោងចក្រផលិតកប៉ាល់សមុទ្រ និងផ្នែកកែច្នៃអាហារ ខណៈក្រុមហ៊ុនខ្លះក៏បានទទួលយកអ្នកធ្វើការបន្ថែមទៀតសម្រាប់គម្រោងដែលត្រូវបានពន្យារពេលដោយសារជំងឺកូវីដ-១៩។
ទីផ្សារការងារនៅតែមិនទាន់ទូលាយដដែលចាប់តាំងពីប្រទេសនេះបានទម្លាក់វិធានការរឹតបន្តឹងនានាកាលពីខែមេសាឆ្នាំមុន។ សេដ្ឋកិច្ចសិង្ហបុរី បានកើនឡើង៣,៦ភាគរយក្នុងឆ្នាំ២០២២។
យ៉ាងណាក៏ដោយ រដ្ឋាភិបាលរំពឹងថាកំណើនសេដ្ឋកិច្ចនឹងធ្លាក់ចុះនៅឆ្នាំនេះ។ កាលពីខែសីហា សិង្ហបុរីបានបង្រួមការព្យាករកំណើនផលិតផលក្នុងស្រុកសរុប (GDP) របស់ខ្លួនមកនៅត្រឹម០,៥ភាគរយទៅ១,៥ភាគរយនៅឆ្នាំនេះ ដែលធ្លាក់ពី០,៥ភាគរយទៅ២,២ភាគរយពីឆ្នាំមុន។
សូមបញ្ជាក់ថា ក្នុងឆ្នាំ២០២០ ចំនួនប្រជាជនសិង្ហបុរីបានធ្លាក់ចុះ២ភាគរយ។ វាជាលើកទីមួយហើយដែលចំនួនប្រជាជនប្រទេសនជបានធ្លាក់ចុះចាប់តាំងពីទសវត្សរ៍ឆ្នាំ១៩៧០ ខណៈដែលជនបរទេសចំនួន៤៧,០០០នាក់បានចាកចេញចំពេលមានការរឹតបន្តឹងយ៉ាងតឹងរ៉ឹងអំឡុងការផ្ទុះជំងឺកូវីដ-១៩។ ចំនួនប្រជាជនបានធ្លាក់ចុះបន្ថែមទៀតនៅឆ្នាំ២០២១ នៅដែលពលករបរទេស១៤៧,០០០ នាក់បានចាកចេញ ហើយចំនួនប្រជាជនធ្លាក់ចុះមកត្រឹម៥,៤៥លាននាក់៕