គំនិតផ្ដួចផ្ដើម ICRI បានចេញមុខធានាឱ្យបាននូវការវិនិយោគសាធារណៈ និងឯកជន ដើម្បីជួយអភិរក្ស និងស្ដារប្រព័ន្ធអេកូឡូស៊ីផ្កាថ្ម ដែលផ្កាថ្មនេះបានទ្រទ្រង់មួយភាគបួននៃសត្វសមុទ្រ និងមនុស្សជាងមួយពាន់លាននាក់ជុំវិញពិភពលោក។ 

 

«អត្ថិភាពមុខងារនៃប្រព័ន្ធអេកូឡូស៊ីសំខាន់ៗទាំងនេះគឺកំពុងប្រឈមនឹងបញ្ហាដោយសារតែវិបត្តិអាកាសធាតុ និងកត្តាជាច្រើនផ្សេងទៀត។ ជាមួយគ្នានេះ ផ្កាថ្មក៏កំពុងស្ថិតនៅក្រោមសម្ពាធកាន់តែខ្លាំងឡើងៗ ដោយសារការកើនឡើងនៃជាតិពុលក្នុងសមុទ្រ ការអភិវឌ្ឍឆ្នេរសមុទ្រដែលបំផ្លិចបំផ្លាញ និងនាវានេសាទ»។ ICRI បញ្ជាក់បែបនេះ។ 

 

ICRI ក៏បានបន្ថែមទៀតថា ផ្កាថ្មទាំងនេះក៏កំពុងតែរងគ្រោះដោយសារតែការកើនឡើងនៃសីតុណ្ហភាពទឹកសមុទ្រ ដែលបានធ្វើឱ្យផ្កាថ្មបណ្តេញសារាយចម្រុះពណ៌ពីខ្លួន ហើយបង្កើតបានជាបាតុភូតប្រែពណ៌ទឹកថែមទៀត។

 

យ៉ាងណាក្ដី គម្រោងមូលនិធិនេះក៏ទទួលបានការព្រមានពីអ្នកជំនាញផងដែរ។ លោកស្រី Marian Wong សាស្ត្រាចារ្យជាន់ខ្ពស់មកពីសាកលវិទ្យាល័យ Wollongong អូស្ត្រាលីបាននិយាយថា បើទោះបីជាមូលនិធិផ្ដោតលើការពារ និងការស្តារឡើងវិញនៃបញ្ហាផ្កាថ្ម ជាដំណឹងល្អមួយ ការកើនឡើងសីតុណ្ហភាពគឺជាហានិភ័យធំជាងនេះដែលវាអាចនឹងបង្កទៅជាបាតុភូតកំដៅទឹកសមុទ្រ។ 

 

ជាមួយគ្នានេះ លោក Terry Hughes អ្នកជំនាញផ្កាថ្មនៅសាកលវិទ្យាល័យ James Cook អូស្ត្រាលីបាននិយាយដែរថា សមាជិកនៃ ICRI គួរតែផ្តោតការយកចិត្តទុកដាក់លើការកាត់បន្ថយការបំភាយឧស្ម័នផ្ទះកញ្ចក់វិញ។ 

 

ICRI បង្កើតឡើងក្នុងឆ្នាំ១៩៩៤ ដែលបច្ចុប្បន្នមានសមាជិក៤៥ប្រទេស ជាមួយនឹងបំណងធានាឱ្យបាននូវសុវត្ថិភាពដល់តំបន់ផ្កាថ្មត្រូពិចទឹករាក់ប្រវែង១២៥,០០០គីឡូម៉ែត្រការ៉េ និងពង្រីកបន្ថែមទ្វេដងការការពារតំបន់ផ្សេងទៀតឱ្យបានត្រឹមចុងទសវត្សរ៍នេះ៕