លោក Shaikh Salman bin Ebrahim Al Khalifa ប្រធានសហព័ន្ធកីឡាបាល់ទាត់អាស៊ី (Asian Football Confederation ឬ AFC) បានបង្ហាញការគាំទ្រយ៉ាងពេញទំហឹងចំពោះបំណង របស់ អារ៉ាប៊ី សាអូឌីត ក្នុងការដេញថ្លៃ ធ្វើជាម្ចាស់ផ្ទះការប្រកួតពានរង្វាន់បាល់ទាត់ពិភពលោក (បុរស) ឆ្នាំ២០៣៤ (FIFA World Cup 2034)។ នេះ បើយោងទៅលើការផ្សាយរបស់ AFC កាលពីថ្ងៃទី៤ ខែតុលា កន្លងទៅ។

 

លោក Shaikh Salman Al Khalifa គាំទ្រចំពោះក្រុមប្រឹក្សា FIFA ដោយផ្ដល់ឱកាសឲ្យសហព័ន្ធបាល់ទាត់ទាំងអស់មកពីបណ្ដាទ្វីបនានា មានសិទ្ធដេញថ្លៃធ្វើជាម្ចាស់ផ្ទះ World Cup។ 

ជាមួយប្រជាប្រិយភាព នៃលីគកំពូលអារ៉ាប៊ី សាអូឌីត បន្ទាប់ពីមានការចូលរួមពីកីឡាករល្បីៗជាច្រើននៅទីនោះ សហព័ន្ធបាល់ទាត់អារ៉ាប៊ី សាអូឌីត (SAFF) ក៏បានដេញថ្លៃធ្វើជាម្ចាស់ផ្ទះ World Cup 2034 ផងដែរ។ ប្រធាន AFC និយាយថា នឹងធ្វើការឲ្យកាន់តែជិតស្និទ្ធថែមទៀត ដើម្បីឲ្យការដេញថ្លៃ និងការធ្វើជាម្ចាស់ផ្ទះ បានដោយជោគជ័យ។
 

«ខ្ញុំ រីករាយក្នុង ការកត់សម្គាល់ថា SAFF បង្ហាញចេតនារបស់ពួកគេក្នុងការដេញថ្លៃសម្រាប់ការប្រកួតបាល់ទាត់ពិភពលោក FIFA World Cup 2034 ។ គ្រួសារបាល់ទាត់អាស៊ីទាំងមូល នឹងឈររួបរួមគាំទ្រគំនិតផ្តួចផ្តើមដ៏សំខាន់របស់អារ៉ាប៊ី សាអូឌីត ហើយយើងប្តេជ្ញាធ្វើការយ៉ាងជិតស្និទ្ធជាមួយ គ្រួសារបាល់ទាត់ពិភពលោក ដើម្បីធានាបានជោគជ័យរបស់ខ្លួន។»។ ប្រធានរូបនេះ បាននិយាយដូច្នេះ។
 

បន្ទាប់ពីការសម្រេចចិត្តរបស់ FIFA ដើម្បីពិនិត្យឡើងវិញនូវយន្តការ នៃការធ្វើជាម្ចាស់ផ្ទះ FIFA World Cup ទ្វីបអាស៊ី នឹងមានឱកាសធ្វើជាម្ចាស់ផ្ទះការប្រកួតបាល់ទាត់លំដាប់ថ្នាក់ពិភពលោកនៅឆ្នាំ ២០៣៤ ដែលជាការរៀបចំលើកទី៣ នៅទ្វីបនេះ បន្ទាប់ពីព្រឹត្តិការណ៍ FIFA World Cup ឆ្នាំ 2002 សាធារណរដ្ឋកូរ៉េ រួមជាមួយជប៉ុន និង World Cup 2022 នៅប្រទេសកាតា៕