លេខាធិការដ្ឋាននៃសមាគមប្រជាជាតិអាស៊ីអាគ្នេយ៍បានឲ្យដឹងថា RCEP កំពុងដំណើរការហើយនីតិវិធីដើម្បីទទួលសមាជិកថ្មី ដែលអាចនឹងរួចរាល់នៅឆ្នាំក្រោយ។ រហូតមកដល់ពេលនេះ មានតំបន់សេដ្ឋកិច្ចជាច្រើនរួមទាំងស្រីលង្កា និងហុងកុង បានបង្ហាញចំណាប់អារម្មណ៍ក្នុងការចូលរួមក្នុងប្លុកពាណិជ្ជកម្មនេះ។

 

យោងតាមអគ្គលេខាធិការរងអាស៊ានទទួលបន្ទុកសហគមន៍សេដ្ឋកិច្ច Satvinder Singh បានឲ្យដឹងថា នីតិវិធីសម្រាប់ការទទួលយកសមាជិកថ្មីកំពុងត្រូវបានព្រាង។ នៅពេលដែលបានបញ្ចប់ ភាគីដែលចាប់អារម្មណ៍អាចចាប់ផ្តើមដំណើរការចរចាជាផ្លូវការដើម្បីចូលរួម RCEP ។

 

ថ្លែងនៅក្នុងសន្និសីទថ្មីៗនេះនៅទីក្រុងហ្សាការតាជុំវិញការកំណត់ពេលវេលាជាក់លាក់សម្រាប់ការបំពេញច្បាប់នៃការចូលជាសមាជិក RCEP លោក Singh បាននិយាយថា ៖« វាពិបាកក្នុងការនិយាយ ប៉ុន្តែសង្ឃឹមថានៅឆ្នាំ ២០២៤» ។

 

បច្ចុប្បន្ន RCEP បានប្រមូលផ្តុំសមាជិកចំនួន ១៥ ដែលក្នុងនោះមានប្រទេសសមាជិកអាស៊ានចំនួន១០ និងប្រទេសជាដៃគូចំនួន៥ រួមមានចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។ 

 

កិច្ចព្រមព្រៀង RCEP ត្រូវបានចុះហត្ថលេខានៅថ្ងៃទី១៥ ខែវិច្ឆិកា ឆ្នាំ២០២០ នៅខាងក្រៅកិច្ចប្រជុំកំពូលអាស៊ានលើកទី ៣៧ ដែលដឹកនាំដោយវៀតណាម ហើយចូលជាធរមានជាផ្លូវការចាប់ពីថ្ងៃទី១ ខែមករា ឆ្នាំ ២០២២។

 

សេដ្ឋកិច្ច RCEP មានចំនួន ៣០ភាគរយនៃទំហំសេដ្ឋកិច្ចពិភពលោក។ កិច្ចព្រមព្រៀងនេះមានគោលបំណងលុបបំបាត់ ៩០ភាគរយនៃពន្ធនាំចូលក្នុងប្លុកនេះរយៈពេល ២០ឆ្នាំ៕