ជាតិ
ពីនេះ ពីនោះ
ទោះ «ប្រថុជ្ជន» ក្លាយមកពីពាក្យ «បុថុជ្ជន» តែនិយមន័យមិនដូចគ្នានោះឡើយ
× ពាក្យ «ប្រថុជ្ជន» ក្លាយមកពីពាក្យ «បុថុជ្ជន»។ នេះបើតាមការបញ្ជាក់ក្នុងវចនានុក្រមខ្មែរ២០២២ របស់ក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជា ក៏ដូចជាវចនានុក្រមខ្មែរសម្តេចព្រះសង្ឃរាជ ជួន ណាត។ ទោះបីជាយ៉ាងណាក៏ដោយ បើពិនិត្យទៅលើអត្ថន័យនៃពាក្យនីមួយៗ ការពន្យល់មិនដូចគ្នានោះឡើយ។
«ប្រថុជ្ជន» [គុ.] មានន័យថា ដែលប្រកុន, ប្រញឹកខ្លាំង, មមាញឹកពេក, ប្រញឹកប្រញាប់ហួសពេក, បន្ទាន់ណាស់។ ការប្រថុជ្ជន៖ ការប្រកុន ឬមមាញឹកណាស់។ កំពុងប្រថុជ្ជន៖ កំពុងប្រកុនខ្លាំង។ ពេលប្រថុជ្ជន៖ ពេលដែលកំពុងប្រញឹកហួសហេតុពេក។ រឿងប្រថុជ្ជន៖ រឿងហេតុដែលកំពុងប្រកុន។
ងាកទៅពាក្យ «បុថុជ្ជន» វិញ ពាក្យនេះ សំដៅដល់ជនមានកិលេសក្រាស់, ជនអ្នកមានសេចក្ដីសៅហ្មង, សត្វលោកក្រៅអំពីអរិយបុគ្គលទាំង៨ពួក : បុថុជ្ជនមានច្រើនប្រភេទ មានកល្យាណបុថុជ្ជន, បាបបុថុជ្ជន; បណ្ឌិតបុថុជ្ជន, ពាលបុថុជ្ជន ជាដើម។
ឧទាហរណ៍ផ្សេងៗ ពាក់ព័ន្ធនឹងពាក្យ «បុថុជ្ជន»។ មនុស្សបុថុជ្ជនទាំងអស់ សុទ្ធតែជាតណ្ហាទាស។
បុគ្គលជាបុថុជ្ជនណាមួយ ដែលកើតមានសេចក្ដីអៀនខ្មាស ខ្លាចបាបខំប្រឹងប្រព្រឹត្តចៀសចាកទុច្ចរិត ក៏ហៅថា នាគ ។ បុថុជ្ជនតែងចំពាក់ជក់ចិត្តក្នុងបញ្ចកាមគុណជាធម្មតា; បុគ្គលពាលច្រើនតែវិនាសខ្លួន ព្រោះបញ្ចកាមគុណ៕
© រក្សាសិទ្ធិដោយ thmeythmey.com