ខ្មែរក្រហម
ជាតិ
សាលាក្ដីខ្មែរក្រហមត្រូវការថវិកា៣១,៦ លានដុល្លារសម្រាប់ឆ្នាំ២០១៤
× ក្រុមប្រទេសផ្ដល់ជំនួយសំខាន់ៗ សម្រាប់ដំណើរការសាលាក្ដីខ្មែរក្រហម បានអនុម័តទៅលើគម្រោងថវិកា សម្រាប់ប្រើប្រាស់នៅក្នុងឆ្នាំ២០១៤ ដែលមានចំនួនសរុប ៣១,៦ លានដុល្លារអាមេរិក និងសម្រាប់ឆ្នាំ២០១៥ ចំនួន ២៨,៩ លានដុល្លារ។ នេះបើយោងតាមសេចក្ដីប្រកាសព័ត៌មានរបស់សាលាក្ដីខ្មែរក្រហម នៅថ្ងៃទី១៩ ខែមីនានេះ។
សេចក្ដីប្រកាសព័ត៌មាននោះបានឲ្យដឹងថា ក្នុងឆ្នាំ២០១៤ ភាគី ជាតិនៃសាលាក្ដីខ្មែរក្រហម ត្រូវការថវិកា ៦,៤ លានដុល្លារ និងផ្នែកភាគីអន្តរជាតិត្រូវការថវិកា ២៥,២ លានដុល្លារ។ ចំណែកឯឆ្នាំ២០១៥ ភាគីជាតិត្រូវការថវិកាចំនួន ៦ លានដុល្លារអាមេរិក និងភាគីអន្តរជាតិត្រូវការថវិកា ២២,៩ លានដុល្លារអាមេរិកផងដែរ។
លោក នេត្រ ភក្ត្រា មន្ត្រីនាំពាក្យសាលាក្ដីខ្មែរក្រហម បានឲ្យដឹងថា នេះគឺគ្រាន់តែជាការអនុម័តទៅលើគម្រោងថវិកាដែលសាលាក្ដីបានស្នើសុំតែប៉ុណ្ណោះ សម្រាប់ថវិកាវិញគឺត្រូវរង់ចាំការសម្រេចរបស់ប្រទេសម្ចាស់ជំនួយ។លោកបន្តថា ចាប់ពីពេលនេះតទៅសាលាក្ដីនឹងធ្វើការកៀរគរថវិកា និងស្នើសុំឲ្យប្រទេសម្ចាស់ជំនួយផ្ដល់ថវិកាតាមការសន្យានោះ។
អ្នកនាំពាក្យរូបនេះក៏បានឲ្យដឹងថា សម្រាប់ឆ្នាំ២០១៤ នេះភាគីជាតិនៃសាលាក្ដីខ្មែរក្រហម មានថវិកាសម្រាប់ដំណើរការនៅត្រឹមដំណាច់ខែមីនានេះតែប៉ុណ្ណោះ ហើយសាលាក្ដីត្រូវការថវិកាសម្រាប់ចំណាយក្នុងរយៈពេល ៩ ខែបន្ថែមទៀត ក្នុងចំណោមថវិកាសម្រាប់ចំណាយសរុបចំនួន ៦,៤ សែនដុល្លារ។ លោកក៏បានបញ្ជាក់ថា ដោយឡែកសម្រាប់ភាគីអន្តរជាតិវិញ គឺមានថវិកាសម្រាប់ដំណើរការ សម្រាប់ចំណាយពេញមួយឆ្នាំ២០១៤ នេះរួចរាល់ហើយ។
ប្រធានការិយាល័យរដ្ឋបាលស្ដីទីរបស់សាលាក្ដីខ្មែរក្រហម លោក ក្រាញ់ តូនី បានថ្លែងថា លោកសូមស្វាគមន៍ចំពោះការអនុម័តគម្រោងថវិកាថ្មីនេះ ហើយលោកក៏បានអំពាវនាវឲ្យសហគមន៍ផ្ដល់ជំនួយទាំងអស់ សូមផ្ដល់ជំនួយជាចាំបាច់ដល់សាលាក្ដី៕
© រក្សាសិទ្ធិដោយ thmeythmey.com