ជាតិ
រដ្ឋផ្តល់សេវាឡានក្រុង១០គ្រឿងដោយឥតគិតថ្លៃទៅមករវាងរុនតាឯក និងក្រុងសៀមរាប
×![]()
ដោយ: រួបរួម
សម្តេច ហ៊ុន ម៉ាណែត ឱ្យរដ្ឋបាលខេត្តសៀមរាប ចាត់ចែងសេវាដឹកជញ្ជូនពលរដ្ឋទៅមករវាងក្រុងសៀមរាប និងតំបន់ធម្មជាតិរុនតាឯក ដែលនឹងក្លាយជាទីក្រុងថ្មីមួយទៀតនាពេលខាងមុខ។ នាជំនួប សំណេះ សំណាលជាមួយពលរដ្ឋជិត៣០០០នាក់ រស់នៅភូមិធម្មជាតិរុនតាឯក និងតំបន់ពាក់ស្នែង ព្រឹកថ្ងៃសុក្រ ទី៨ ខែធ្នូ សម្តេចនាយករដ្ឋមន្ត្រី បានបញ្ជាក់ថា ជាសេវាដឹកជញ្ជូនដោយឥតគិតថ្លៃ។
«ដោយសារទីតាំងឆ្ងាយ ហើយបង្ករការលំបាកខ្លះក្នុងការធ្វើដំណើរទៅក្រុង ខ្ញុំសូមឱ្យខេត្តរៀបចំឡាន Bus ១០គ្រឿង សម្រាប់ជួយដឹកពេលព្រឹក ទៅហើយនិងមក ខេត្តសៀមរាប ដោយឥតគិតថ្លៃ»។ សម្តេចបានណែនាំឱ្យរដ្ឋបាលខេត្តសៀមរាប កំណត់ពេលវេលាច្បាស់លាស់នៃការចេញដំណើរប្រចាំថ្ងៃ។
សម្តេច ហ៊ុន ម៉ាណែត បានបញ្ជាក់ថា សេវាឡានក្រុងដោយឥតគិតថ្លៃនេះ អាចជួយសម្រាលបន្ទុកបានខ្លះ ជាពិសេសដែលរស់នៅក្នុងក្រុងសៀមរាប ហើយត្រូវធ្វើដំណើរទៅមក។ សម្តេចបានបញ្ជាក់ថា៖ « ចំនួននេះមិនច្រើនទេតែយើងខិតខំតាមលទ្ធភាព បើអ្នកណាទារលុយ ទៅរកមុខផ្ទះចៅហ្វាយខេត្ត»។
ទាក់ទងនឹងការអនុវត្តខុសគោលការណ៍ ប្រមុខរដ្ឋាភិបាលទទួលស្គាល់ថា ពេលខ្លះធ្វើដោយអចេតនា ហើយពេលខ្លះមានចន្លោះប្រហោង ដោយរដ្ឋាភិបាលត្រូវកែសម្រួល និងកែលម្អ ហើយបច្ចុប្បន្ន ពលរដ្ឋមិនចាំបាច់ធ្វើដំណើររាប់រយគីឡូម៉ែត្រទៅតវ៉ាដល់ផ្ទះសម្តេចនោះឡើយ ពោលគឺសម្រេចអាចដឹងបានភ្លាមៗ តាមបណ្តាញសង្គម ជាពិសេសហ្វេសប៊ុក។
ភូមិធម្មជាតិរុនតាឯក ស្ថិតនៅក្នុងឃុំរុនតាឯក ស្រុកបន្ទាយស្រី និងតំបន់ពាក់ស្នែង ស្ថិតស្ថិតនៅក្នុងឃុំ ពាក់ស្នែង ស្រុកអង្គរធំ ខេត្តសៀមរាប ជាភូមិឋានថ្មី សម្រាប់ពលរដ្ឋដែលបានផ្លាស់ទីចេញពីដីរមណីយដ្ឋានអង្គរ តំបន់បេតិកភណ្ឌពិភពលោក។
សម្តេច ហ៊ុន សែន អតីតនាយករដ្ឋមន្ត្រី បានរៀបចំចាត់ចែងចំពោះការផ្លាស់ប្តូរទីលំនៅទៅកាន់ភូមិឋានថ្មី។ «ខ្ញុំជឿថា លោកតា លោកយាយ បើគិតថា សម្តេចតេជោ មានបំណងអាក្រក់ទុច្ចរិតឱ្យប្រជាពលរដ្ឋចេញដើម្បីយកដីកន្លែងនោះ តំបន់នៅអង្គរនោះទៅលក់ឱ្យអ្នកវិនិយោគធ្វើអាគារមួយជាន់ខ្ញុំគិតថា លោកតា លោកយាយមិនមកទេ»។ សម្តេច ហ៊ុន ម៉ាណែត ដែលជានាយករដ្ឋមន្ត្រីបន្តវេន បានលើកឡើងយ៉ាងដូច្នេះ។
សម្តេច ហ៊ុន ម៉ាណែត ទទួលស្គាល់ថា ការផ្លាស់ប្តូរទីតាំងរស់នៅ ពិតជាជួបផលលំបាករយៈពេលខ្លះ ប៉ុន្តែរដ្ឋាភិបាលខិតខំដោះស្រាយបញ្ហាជាបន្តបន្ទាប់ ដោយប្តូរពីតំបន់មីន ទៅជាតំបន់មានផ្លូវរាប់ខ្សែប្រវែងជាង១៦០គីឡូម៉ែត្រ មានផ្លូវបេតុង ប្រព័ន្ធទឹកស្អាត អគ្គិសនី ពលរដ្ឋពីមានកម្មសិទ្ធិតូច ទៅមានដីសមរម្យ មានផ្ទះសម្បែង កម្មសិទ្ធិឯកជន មានសាលារៀន វត្ត មន្ទីរពេទ្យ៕
Tag:
រុនតាឯក
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
