ជាតិ
នំអត្តសញ្ញាណជនជាតិចាម្ប៍ «ផ្កា» មានក្បាច់ជាង ៨០
×
ភ្នំពេញ៖ ទិវានំប្រពៃណីចាម្ប៍ ត្រូវបានរៀបចំឡើងជាលើកទី២ នៅកម្ពុជា ដើម្បីផ្សព្វផ្សាយពីវប្បធម៌ ប្រពៃណីរបស់ជនជាតិចាម្ប៍។ លោក ពៀត ផល្លា ជាតំណាងក្រុមយុវជនជនជាតិចាម្ប៍ បានលើកឡើងថា នំសំខាន់ជាងគេក្នុងទិវានំប្រពៃណីចាម្ប៍ គឺនំផ្កា ហៅប៉ាក់។ នំនេះមានក្បាច់រហូតជាង៨០ និងត្រូវបានគេនិយមប្រើក្នុងពិធីមង្គលការ និងពិធីអបអរផ្សេងៗ។
ក្រុមយុវជនជនជាតិចាម្ប៍ បានបង្ហាញនំចាម្ប៍ចំនួន៦មុខ ក្នុងទិវានំប្រពៃណីចាម្ប៍លើកទី២ កាលរសៀលថ្ងៃទី ១០ខែធ្នូ ឆ្នាំ២០២៣ នៅមជ្ឈមណ្ឌលបុប្ផាណា។ នំទាំង៦មុខ រួមមាន នំប៉ាក់, នំតាបៃជាល, នំលឺទ្រាំ, តប៉ៃក្រាស់, ក្រាម និងនំពុម្ព។
ជាមួយគ្នាលោក ពៀត ផល្លា ជាតំណាងក្រុមយុវជនជនជាតិចាម្ប៍ បានបន្តថា៖ «ទិវានំប្រពៃណីចាម្ប៍ ប្រារព្ធឡើងក្នុងគោលបំណង ដើម្បីរឹតចំណងមិត្តភាពរវាងជនជាតិចាម្ប៍ ខ្មែរ និងជនជាតិដទៃទៀត។ ជាពិសេសការតាំងបង្ហាញ នំផ្កា ឬហៅនំប៉ាក់ ដែលជាអត្តសញ្ញាណមួយរបស់ជនជាតិចាម្ប៍។ នំចាម្ប៍ដែលយកមកបង្ហាញនេះ ធ្វើដោយដៃ តាមសហគមន៍ជនជាតិចាម្ប៍ ដែលមកពីដូចជាខេត្តកំពង់ឆ្នាំង និងខេត្តត្បូងឃ្មុំ»។
ទន្ទឹមនឹងនោះ ក្នុងកម្មវិធីនេះ ក៏ឃើញមានការប្រគំភ្លេង ដើម្បីដង្ហែផងដែរ។ ភ្លេងប្រគំនេះ ត្រូវបានគេហៅថា «រ៉ាបាណា» ដែលអ្នកចូលរួមដង្ហែ វាយស្គរផង និងច្រៀងផង ដែលជាភ្លេងប្រពៃណីមួយរបស់ជនជាតិចាម្ប៍មួយផងដែរ។ លោក ពៀត ផល្លា ចង់ឱ្យយុវជនចូលរួម និងថែរក្សាប្រពៃណីរបស់ខ្លួនឱ្យបានល្អ ទាំងម្ហូបអាហារ ឬការស្លៀកពាក់ក៏ដោយ។
ក្រៅពីនេះ លោក ផល្លា សង្ឃឹមថានៅឆ្នាំខាងមុខ នឹងអាចប្រារព្ធទិវានំប្រពៃណីចាម្ប៍ ដោយមានសាធារណជន ចូលរួមគាំទ្រ និងស្វែងយល់ពីវប្បធម៌ចាម្ប៍។ តាមរយៈកម្មវិធីនេះ រំពឹងថាអាចបណ្ដុះស្មារតីយុវជនជនជាតិចាម្ប៍ និងយុវជនសហគមន៍ផ្សេងៗទៀត មានការសហគ្នាទៅវិញទៅមកផងដែរ៕
Tag:
លោក ពៀត ផល្លា
ទិវានំប្រពៃណីចាម្ប៍
© រក្សាសិទ្ធិដោយ thmeythmey.com