«ខ្ញុំមិននឹកស្មានថា ខ្លួនឯងនឹងហ៊ានវិលត្រលប់មកប្រកួតតំណាងជាតិក្នុងប្រភេទកីឡាគុនចម្រុះនេះវិញទៀតទេ ក្រោយខកខានប្រកួត៤ឆ្នាំ»។ នេះជាការរៀបរាប់របស់ សំ ថារ័ត្ន ដែលមិនជឿលើខ្លួនឯង ក្រោយដណ្តើមបានមេដាយសំរឹទ្ធពីការគុនចម្រុះពិភពលោកឆ្នាំ២០២៣ ដែលរៀបចំនៅថៃ។
  

មិនជឿខ្លួនឯង ដ្បិត ថារ័ត្ន មិនសូវមានពេលហ្វឹកហាត់ពេញលេញ ដោយសារឪពុកជរា ម្ដាយឈឺត្រូវមើលការខុសត្រូវ។ នៅមុនប្រកួតនេះ អតីតកីឡាការិនីជម្រើសជាតិគុនល្បុក្កតោ ក៏មានការបារម្ភច្រើនដែរ ខណៈនាងអះអាងថាការប្រកួតនេះ ទាំងឈរ អង្គុយ ដួលដេកទៅក្រោម ទាំងកាច់ក្លេ ទាមទារសេចក្ដីក្លាហានខ្លាំង និងទំហំនៃការហ្វឹកហាត់ច្រើន ព្រមទាំងសុខភាពផ្លូវចិត្តរឹងមាំដែរ។
 

ជុំវិញការទទួលបានលទ្ធផលដ៏គាប់ប្រសើរនេះ លោក សេង ប៊ុនសុង អនុប្រធានសហព័ន្ធកីឡាយុទ្ធគុនចម្រុះកម្ពុជា លើកឡើងថា៖ កីឡាយុទ្ធគុនចម្រុះកម្ពុជា ទើបតែ ចាប់ផ្តើមបង្កើតសហព័ន្ធ ប៉ុន្តែអាចរកបានមេដាយកម្រិតពិភពលោក ដែលនេះជារឿងល្អសម្រាប់វិស័យកីឡាគុនចម្រុះកម្ពុជា៕