អន្តរជាតិ
គ្រោះរញ្ជួយដីនៅចិនដែលធ្វើឱ្យមនុស្សយ៉ាងតិច ១៤៨ នាក់ស្លាប់ ធ្វើឱ្យខាតបង់សេដ្ឋកិច្ចរាប់សិបលានដុល្លារ
ទាហានចិនប្រមូលកំទេចកំទីបន្ទាប់ពីគ្រោះរញ្ជួយដីនៅភូមិ Chenjia នៃទីក្រុងDahejia
×![]()
ដោយ: VOA
គ្រោះរញ្ជួយដីដ៏ខ្លាំងក្លាដែលបានកើតឡើងនៅភាគពាយ័ព្យប្រទេសចិនកាលពីសប្ដាហ៍មុននិងបានធ្វើឱ្យមនុស្សយ៉ាងតិច ១៤៨ នាក់ស្លាប់ បានបណ្ដាលឱ្យមានការខាតបង់សេដ្ឋកិច្ចប្រហែលរាប់សិបលានដុល្លារនៅក្នុងផ្នែកកសិកម្មនិងនេសាទ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP ដែលយោងលើសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋរបស់ចិនកាលពីថ្ងៃសៅរ៍។
ការវាយតម្លៃបឋមរបស់មន្ត្រីនៅក្នុងខេត្ត Gansu បានបង្ហាញថា វិស័យកសិកម្មនិងនេសាទនៅក្នុងខេត្តនេះបានខាតបង់អស់ប្រហែល ៧៤ លាន ៦ សែនដុល្លារ។ នេះបើយោងតាមសេចក្ដីរាយការណ៍របស់ទូរទស្សន៍ CCTV របស់ចិន។ អាជ្ញាធរបានពិចារណាអំពីការប្រើប្រាស់ឱ្យមានប្រសិទ្ធភាពនូវថវិកាជំនួយដែលបានបង្កើតឡើងកាលពីប៉ុន្មានថ្ងៃមុនដើម្បីឱ្យវិស័យកសិកម្មអាចដំណើរការផលិតកម្មឡើងវិញឱ្យបានកាន់តែឆាប់តាមដែលអាចធ្វើបាន។ នេះបើយោងតាមសេចក្ដីរាយការណ៍របស់ទូរទស្សន៍ CCTV នេះ។
គ្រោះរញ្ជួយដីកម្រិត ៦,២ រ៉ិចទ័របានកើតឡើងកាលពីយប់ថ្ងៃទី ១៨ ខែធ្នូនៅក្នុងតំបន់ភ្នំមួយកន្លែងនៅចន្លោះខេត្ត Gansu និងខេត្ត Qinghai និងស្ថិតនៅចម្ងាយប្រមាណ ១.៣០០ គីឡូម៉ែត្រភាគនិរតីរដ្ឋធានីប៉េកាំង។
ទូរទស្សន៍ CCTV បានរាយការណ៍ថា មនុស្ស ១១៧ នាក់បានស្លាប់នៅក្នុងខេត្ត Gansu និង ៣១ នាក់បានស្លាប់នៅក្នុងខេត្ត Qinghai ដោយសារគ្រោះរញ្ជួយដីនេះ ហើយមនុស្ស ៣ នាក់ទៀតនៅបាត់ខ្លួននៅឡើយ។ មនុស្សជិត ១.០០០ នាក់បានរងរបួស ហើយផ្ទះសម្បែងជាង ១៤.០០០ ខ្នងត្រូវបានបំផ្លាញ។
ទូរទស្សន៍ CGTN ដែលជាបណ្ដាញទូរទស្សន៍អន្តរជាតិរបស់ចិន បានរាយការណ៍ថា ផ្ទះបណ្ដោះអាសន្នដំបូងចំនួន ៥០០ ខ្នងត្រូវបានសាងសង់សម្រាប់ពលរដ្ឋនៅក្នុងភូមិ Meipo នៃខេត្ត Gansu កាលពីថ្ងៃទី ២២ ខែធ្នូ។
មនុស្សជាច្រើនបានស្នាក់នៅក្នុងជម្រកបណ្ដោះអាសន្នដែលបង្កើតឡើងនៅក្នុងតំបន់នៅពេលដែលធាតុអាកាសបានធ្លាក់ចុះក្រោមសូន្យអង្សារសេ។ ពិធីបុណ្យសពបានធ្វើឡើងដោយពិធីខ្លះធ្វើតាមបែបសាសនាអ៊ិស្លាមដែលជាសាសនាដែលប្រជាពលរដ្ឋភាគច្រើនប្រតិបត្តិតាមនៅក្នុងតំបន់រងគ្រោះនោះ។
ភាគច្រើននៃគ្រោះរញ្ជួយដីនៅប្រទេសចិនកើតឡើងនៅភាគខាងលិចប្រទេស ដែលរួមមានទាំងខេត្ត Gansu ខេត្ត Qinghai ខេត្ត Sichuan និងខេត្ត Yunnan ក៏ដូចជាតំបន់ Xinjiang និងតំបន់ទីបេផងដែរ។ គ្រោះរញ្ជួយដីលើកនេះគឺជាគ្រោះរញ្ជួយដីដ៏ប្រល័យបំផុតមួយនៅក្នុងប្រទេសចិនក្នុងរយៈពេល ៩ ឆ្នាំកន្លងមកនេះ៕
ប្រែសម្រួលដោយលោក ភី សុភាដា
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
