អន្តរជាតិ
កម្មករក្រុមហ៊ុន IMIP ធ្វើបាតុកម្មតវ៉ាដើម្បីស្ថានភាពការងារប្រសើរឡើង នៅមុខរោងចក្រ ក្នុងក្រុង Bungku នៃកោះ Sulawesi បន្ទាប់ពីករណីផ្ទុះស្លាប់កម្មករកាលពីចុងសប្តាហ៍មុន ថ្ងៃទី២៧ ខែធ្នូ ឆ្នាំ២០២៣។
×![]()
ដោយ: VOA
កម្មករឥណ្ឌូណេស៊ីរាប់រយនាក់ បានតវ៉ាប្រឆាំងនឹងស្ថានភាពនៅឯរោង ចក្រចម្រាញ់រ៉ែនីកែល ដែលផ្តល់ថវិកាដោយចិន ជាទីកន្លែងដែលការផ្ទុះបានសម្លាប់មនុស្សយ៉ាងតិចណាស់ក៏ ១៨ នាក់ និងមនុស្សរាប់សិបនាក់ទៀតបានរងរបួស កាលពីចុងសប្តាហ៍កន្លងទៅ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
គ្រោះថ្នាក់នេះបានកើតមានឡើងកាលពីព្រឹកថ្ងៃសៅរ៍សប្តាហ៍មុន នៅពេលដែលពួកកម្មករបានជួសជុលឡសម្រាប់រំលាយរ៉ែ នៅឯរោងចក្រមួយកន្លែង ដែលកាន់កាប់ដោយក្រុមហ៊ុន PT Indonesia Tsingshan Stainless Steel ឬ (ITSS) នៅក្នុងតំបន់ឧទ្យានឧស្សាហកម្ម Morowali នៅលើកោះ Sulawesi។
កោះ Sulawesi ជាមជ្ឈមណ្ឌលសម្រាប់ផលិតរ៉ែនីកែល ដែលជាលោហៈធាតុត្រូវបានប្រើប្រាស់នៅក្នុងការផលិតអាគុយរថយន្តអគ្គីសនីនិងដែកថែប ហើយការវិនិយោគដ៏ខ្លាំងរបស់ចិននៅក្នុងផ្នែកនេះបានធ្វើឱ្យមានចលាចលអំពីប្រាក់ឈ្នួល និងស្ថានភាពការងារ។
រូបភាពដែលទីភ្នាក់ងារព័ត៌មាន AFP បានឃើញបានបង្ហាញកម្មកររាប់រយនាក់បានចូលរួមនៅក្នុងការតវ៉ាប្រឆាំង នៅខាងក្រៅបរិវេណរោងចក្រនោះ។
បាតុករបានប្រគល់បញ្ជីមួយដែលមានការទាមទារចំនួន ២៣ ចំណុច ដល់អ្នកគ្រប់ គ្រងរោងចក្រ។ នេះបើតាមលិខិតមួយច្បាប់ដែលតំណាងសហជីពកម្មករបានប្រគល់ឱ្យប៉ូលិស។ ការទាមទារទាំងនោះ រួមមានការថែរក្សាឧបករណ៍រំលាយរ៉ែឱ្យបានប្រសើឡើង គ្លីនិកសុខភាពត្រូវកែលម្អដើម្បីដោះស្រាយគ្រាអាសន្ន ហើយកម្មករចិនត្រូវតម្រូវឱ្យរៀនភាសាឥណ្ឌូណេស៊ីជាដើម។
ក្នុងចំណោមអ្នកដែលបានស្លាប់នៅក្នុងផ្ទុះនោះ មានលោក Muhammad Taufik អាយុ ៤០ឆ្នាំ ជាជាងផ្សារដែលបានបន្សល់ទុកប្រពន្ធនិងកូន ២ នាក់។
លោក Parlin Hidayat ដែលជាបងប្អូនជីដូនមួយរបស់លោក Taufik បានប្រាប់ទីភ្នាក់ងារព័ត៌មាន AFP ថា៖ «ក្រុមគ្រួសារកំពុងកាន់ទុក្ខ លោកជាអ្នករកស៊ីចិញ្ចឹមគ្រួសារ»។
លោកបានបន្ថែមទៀតថា ក្រុមហ៊ុន ITSS បានផ្តល់ប្រាក់សំណងចំនួន ៣៦.០២៥ ដុល្លារអាមេរិក បន្ទាប់ពីគ្រោះថ្នាក់នេះ។
មនុស្ស ៣០នា ក់ត្រូវបានព្យាបាលនៅក្នុងមន្ទីរពេទ្យចំពោះមុខរបួសរបស់ពួកគេបន្ទាប់ពីការផ្ទុះនេះ។ នេះបើតាមការបញ្ជាក់របស់ប៉ូលិស៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
